Okokohọ Ubrotọ “Otu-Iwuhrẹ Ẹme Ọghẹnẹ” ọ Isẹri Jihova ọrọ 2001
1 Aizaya ọruẹaro na o dhesẹ Jihova wọhọ Owuhrẹ Ologbo, ọnọ ọ rehọ edhere ọs’ọmọ tuduhọ omai awọ nọ: “Ọnana họ edhere na, wha nyae.” (Aiz. 30:20, 21) Kọ ẹvẹ ma re ro yo eme ọ Jihova nọ ọ be ta rọkẹ erere mai na? Jihova ọ rẹ t’ẹme kẹ ahwo riẹ ẹkwoma Ebaibol na jegbe ebe nọ a kporo no Ebaibol ze, iwuhrẹ ukoko, ikokohọ okogho, gbe ikokohọ ubrotọ enọ ‘ọrigbo nọ o wo ẹrọwọ avọ areghẹ na’ ọ ruẹrẹhọ. (Mat. 24:45) Ma rẹ kẹ Jihova uyere inọ ọ gbẹ be kpọ omai evaọ edhere nọ o fo nọ ma rẹ nya.
2 K’ukpe k’ukpe, okokohọ ubrotọ ọ rẹ k’omai uvẹ nọ ma re ro kokohọ kugbe ibe enọ e rọwo jẹ gaviezọ kẹ ithubro Jihova ziezi. Ukpe n’ukpo, ahwo 576,874 a kpohọ Okokohọ Ubrotọ “Enọ I Bi Ru Ẹme Ọghẹnẹ” ọrọ omosasọ abọ-ẹzi na. Evaọ 2001, a ti ru Ikokohọ Ubrotọ edẹ esa ọrọ “Otu-Iwuhrẹ Ẹme Ọghẹnẹ” wariẹ orẹwho na họ. Ma riẹ nọ who bi rri kparo re who ru ọruẹrẹfihotọ ra re whọ jariẹ, fikiere ma be kẹ ithubro obotọ na re i fiobọhọ k’owhẹ.
3 Ithubro kẹ Ewo Uwou nọ A re Wohọ: Ma te daoma vi ebe ọ Room Request buobu ro se ukoko kpobi. U re mu okere-obe ukoko na ẹro nọ eme nọ a kere fihọ obe ọ Room Request nọ a te rọ ze na e gba. WHO kere unu iwhowho-uvie nọ e gwọlọ uwou ỌVO HO, wọhọ “iwhowho-uvie 50,” evaọ oria nọ a re kere edẹ ahwo nana fihọ na. A re kere eme na kpobi kpatiẹ vevẹ. Iviena jọ u mu owhẹ ẹro nọ who kere odẹ, ikpe, sọ ọzae hayo aye, jegbe sọ ohwo nọ ọ gwọlọ uwou na yọ ọkobaro hayo owhowho-uvie. Ku emọ na kugbe unu ahwo na. Evaọ oke nọ u kpemu, ikoko jọ i kere unu ekpako na ọvo. Onana u re ru ọruẹrẹfihotọ iwou na jọ bẹbẹ gaga. Otẹrọnọ eme nọ whọ gwọlọ kere e gba obe na ha, whọ rẹ sai kere fihọ ẹwẹ-obe ọfa gheghe kugbei. Otẹrọnọ who kere vrẹ omọvo fihọ obe na, fodẹ oghẹrẹ nọ ahwo na a kpekpe te fihọ oria nọ a ru fihọ iẹe na. U re mu okere-obe ukoko na ẹro nnọ a kere eme fihọ obe ọ Room Request na gbagba taure o te ti vi ei se Ẹko-Iruo Uwou okokohọ na. A rẹ kaki vi efọmo na taure ẹdẹ okokohọ o te te.
4 K’ukpe k’ukpe, ma rẹ tuduhọ inievo na awọ re a yoẹme kẹ Ẹko-Iruo Uwou okokohọ na. Ma tẹ kezọ kẹ ẹjiroro nana, o tẹ kawo u re ru eware ivẹ gba:
5 O rẹ whaha araha igho kẹ inievo mai: Nọ ma te yoẹme kẹ ọruẹrẹfihọ Society, osa iwou u re kpotọ kẹ inievo mai. Ukpenọ ma rẹ raha igho kẹ enọ i wo iwou, a rẹ sae raha igho nana ziezi ro fiobọhọ kẹ iviuwou ọ inievo mai gbe iruo akpọ soso na. Ma te tube wo igho nọ ma sae rọ rehọ iwou eghaghae dede, u fo re ma tha omodawọ Ẹko-Iruo Uwou na uke. A dhesẹ ẹzi ọdawẹ k’amọfa ọnana eva 1 Jọn 3:17, yọ oye họ ehri-uzi nọ o rrọ emu ọ 1 Ahwo Kọrint 10:24 na.
6 U re dhesẹ ẹmeoyo kẹ ọkpọvio Society: Onana o rẹ j’omai oja gaga. Ahwo Hibru 13:17 o ta nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ [evawere] ru onana o [gbẹ jọ orọ] ofuhu, keme oyena u re wo erere kẹ owhai hi.” Nọ inievo mai a bi ru eruẹrẹfihotọ buobu kẹ okokohọ ubrotọ mai na, ma gwọlọ nọ a riẹ nọ ma be thọ ae uke vọvọ. Nọ a gwọlọ ẹmeoyo mai evaọ ẹme ọnana edẹ ivẹ hayo esa ọvo evaọ k’ukpe k’ukpe na, onana yọ emamọ edhere nọ ma rẹ rọ tha omodawọ rai uke. O tẹ make rọnọ ẹgwọlọ omobọ mai u wo ohẹriẹ, emamọ oriruo mai, nọ inievo mai gbe ahwo akpọ na a rẹ ruẹ, o rẹ wha ẹzi uyoyou, okugbe, gbe uketha haro.—Fil. 2:1-4.
7 Ẹgwọlọ Obọdẹ: Ọruẹrẹfihotọ ọnana ọ rrọ kẹ ahwo nọ a gwọlọ uketha obọdẹ mi amọfa evaọ eruo eruẹrẹfihotọ rai kẹ okokohọ ọvo, maero ọruẹrẹfihotọ uwou. Ahwo nana a sae jẹ gwọlọ obufihọ evaọ idhere efa wọhọ epanọ iyero rai sa-sa e rọ. Iwhowho-uvie hayo ekobaro nọ i wo emamọ uruemu ọvo, kugbe emọ rai nọ e rrọ kpatiẹ, enọ i wo ẹgwọlọ obọdẹ nọ Ogbẹgwae Iruo Ukoko na u kuenu kẹ ọvo họ enọ i te kẹ obufihọ evaọ ọruẹrẹfihọ Ẹgwọlọ Obọdẹ na. Ukoko nọ ahwo na a no ze o re ru eruẹrẹfihotọ efa nọ a rẹ rọ sẹro ahwo nọ a wo ẹgwọlọ obọdẹ, ukpenọ a re fi owha-iruo onana họ ogbẹgwae okokohọ na uzou. Ekpako gbe amọfa nọ a riẹ kpahe uyero ohwo na a rẹ sai fiobọhọ. Onana o gwọlọ nọ iwhowho-uvie a re roro kpahe ẹgwọlọ ahwo nọ a rọ iruo odibọgba oke-kpobi, enọ e kpako no, enọ e be mọ, gbe amọfa. Iwhowho-uvie a rẹ sai fiobọhọ ẹkwoma ahwo nana nọ a rẹ rehọ gb’oma hayo rẹrote ẹgwọlọ rai evaọ obọdẹ idhere efa.—Jem. 2:15-17; 1 Jọn 3:17, 18.
8 Dede na, Ẹko-Iruo Uwou na a te daoma re a gwọlọ iwou nọ i fo kẹ iwhowho-uvie nọ i wo ẹgwọlọ obọdẹ otẹrọnọ ahwo ukoko na a sai fiobọhọ kẹ ae he. Iwhowho-uvie enana a rẹ ta ẹbẹbẹ rai kẹ okere-obe ukoko na. Okere-obe na ọ vẹ t’ẹme na kugbe Ogbẹgwae Iruo Ukoko na re a ruẹ sọ o lọhọ kẹ ukoko na re u fiobọhọ kẹ ahwo nana evaọ ọruẹrẹfihotọ iwou obọ rai nọ a re wohọ. Otẹrọnọ ukoko na o gbẹ sae kẹ obufihọ nọ a gwọlọ họ, okere-obe na ọ sae rehọ obe ọ Room Request na rọkẹ ahwo otiọye na, onọ ọye omariẹ o re kere eme fihọ obehru ẹwẹ-obe ọsosuọ na nnọ, “SPECIAL NEEDS” (ẸGWỌLỌ OBỌDẸ). Ahwo nọ a wo ẹgwọlọ obọdẹ ọvo a re kere eme fihọ obe nana nọ a kpokahọ na. Ohwo nọ ọ gwọlọ uwou na o re kere eme fihọ iẹe. O re zihe iei bru okere-obe na, o ve rri rie sọ o gba ọ vẹ jẹ riẹ oware nọ o lẹliẹ ohwo na te kẹ ororokẹ otiọye na. Okere-obe na o re DHESẸ ẸBẸBẸ OHWO NA VEVẸ evaọ oria nọ a dhesẹ fihọ uke obe na. A re ru onana evaọ ẹruoke taure oke okokohọ na u te ti te. Okere-obe na o ve vi obe na se Ẹko-Iruo Uwou na. A ti kere ileta se ohwo nọ ọ gwọlọ uwou na ovavo kpahe oria nọ o ti wohọ.
9 ORỌNIKỌ ahwo nọ a wo ẹgwọlọ obọdẹ a re kpohọ okokohọ na a vẹ yare oria nọ a re wohọ nọ a te t’obei hi, keme Ẹko-Iruo Uwou na o rẹ gwọlọ yo mi Ogbẹgwae Iruo Ukoko na tao.
10 Ibuobu i dhesẹ ovuhumuo rai via no rọ kpahe ọruẹrẹfihotọ nọ a ru kẹ eria nọ a re wohọ evaọ etoke ikokohọ na. Kọ eva e were owhẹ epọvo na rọkẹ eruẹrẹfihotọ buobu nọ a ru k’owhẹ? Eva e rẹ were Society re a ruẹrẹ eria nọ a re wohọ evaọ etoke okokohọ na kpahe, nọ u re fiobọhọ k’omai kpobi t’ẹrovi irere abọ-ẹzi erọ okokohọ na gbe eme ọruẹrẹfihotọ na.
11 Ekpohọ Okokohọ Ọfa: A ghale ukoko kpobi fihọ okokohọ nọ ọ mae kẹle iẹe. Rono unu iwhowho-uvie nọ a fihọ okokohọ ọvuọvo ze, Society ọ rẹ riẹ unu ahwo nọ a ti kpohọ okokohọ ọvuọvo re a ru ọruẹrẹfihotọ kẹ eria ẹkeria nọ i re te, iwou, ebe, gbe eware efa. Dede na, otẹrọnọ whọ gwọlọ kpohọ okokohọ ọfa nọ a ghale owhẹ fihọ họ fiki oware jọ yọ whọ gwọlọ uwou, okere-obe ukoko na ọ rẹ sae k’owhẹ obe ọ Room Request na. Whọ rẹ sai kere eme fihọ iẹe, okere-obe na ọ vẹ wh’obọhọ iẹe taure who te ti vi ei kpohọ okokohọ nọ whọ gwọlọ nya na.
12 Ẹvẹrẹ Obọ rọ t’Ẹme Rọkẹ Enọ I Diezọ: A ti ru ọruẹrẹfihotọ re inievo-emezae gbe emetẹ nọ i te ziezi a fa eme okokohọ na kpobi fihọ ẹvẹrẹ ọ Obọ rọ t’Ẹme America evaọ ikokohọ nana: Ota 2, November 2-4, 2001; North 4, November 16-18, 2001; Uli 7, December 7-9, 2001; gbe Ubogo 10, January 11-13, 2002. Ma tuduhọ ahwo nọ a diezọ evaọ ikoko kpobi evaọ Nigeria awọ re a muọ omaa họ ẹma re o tẹ kawo a ve kpohọ okokohọ ọvo jọ evaọ usu rai na. Ekpako na e rẹ daoma gaga re a ruẹ nọ ahwo nọ a diezọ nọ a rẹ riẹotọ ẹvẹrẹ ọ Obọ rọ t’Ẹme America nọ e rrọ ukoko rai a riẹ kpahe ọruẹrẹfihotọ nana jẹ riẹ sọ ahwo na a gwọlọ uketha jọ re a sae nya.
13 Ikokohọ enana ọvo a te jọ ruẹrẹ eria fihọ kẹ ahwo nọ a diezọ nọ a te fa eme okokohọ na kẹ evaọ ẹvẹrẹ obọ rọ t’ẹme. A te jọ uvumọ okokohọ ọfa fa eme na fihọ ẹvẹrẹ obọ rọ t’ẹme he. Otẹrọnọ ohwo nọ o diezọ avọ ohwo nọ ọ rẹ r’obọ t’ẹme a kpohọ okokohọ ọfa jọ, ma kuvẹ ọ imava itieye na nọ a rẹ keria kẹle ohwohwo, orọnikọ a re dikihẹ aro omọvo jọ hayo unu ahwo buobu jọ họ.
14 Koko Ugho họ kẹ Okokohọ Na: Fiba eruẹrẹfihotọ efa, ENẸNA họ oke nọ a re ro muọ ugho họ ekoko kẹ okokohọ ubrotọ na. Ahwo jọ a dina thabọ no oria okokohọ na. Ofariẹ, ahwo jọ a wo iviuwou ilogbo. Rọkẹ ahwo nana gbe omai kpobi, o gwọlọ ugho nọ a re ro ru unevaze, ofa-ojẹ, emuore evaọ etoke okokohọ na, ebe, te ekpokpọ nọ a siobọno kpobi, gbe araha idudhe efa. O gwọlọ nọ ahwo nọ a wo iviuwou ilogbo a rẹ m’omaa fihotọ je koko ugho họ ziezi re uviuwou na soso o sai kpohọ okokohọ na. Obọdẹ edhere jọ nọ a re ro ru onana o sae jọ eroro oma unuigho nọ o rẹ rehọ kpobi. O rrọ oware areghẹ re a roro epanọ eware e be ghare te kugbe evaọ okenọ whọ tẹ be m’omaa ra. Ghale unuigho nọ who roro na fihọ unu emerae nọ e rrọ umuo oke onana rite ẹdẹ okokohọ ubrotọ rai na. Unuigho nana whọ rẹ hai koko k’amara k’amara. Amara kpobi, kaki fi unuigho onana họ akotọ wọhọ ugho okokohọ. Whọ sai fi ei họ ẹkpẹti ọsese jọ hayo ẹnvẹlopu. Yọ, a rẹ sae ghale ugho ọ k’amara k’amara na kpohọ abane a vẹ hai koko iei họ k’oka k’oka. Oware nọ u w’uzou na họ whọ rẹ hẹrẹ bẹsenọ amara ọvo hayo ivẹ i re kiọkọ re okokohọ na o te te re who te ti muọ ugho họ ekoko kẹ erẹ ẹgbukpe ọnana ha.—Itẹ 21:5.
15 Ekuhọ: Nọ oke na u bi sikẹle re who kpohọ okokohọ ubrotọ na, ru ei fihọ oware olẹ se Jihova re whọ sae jariẹ evaọ abọ kpobi ọrọ edẹ esa na kpobi je wo erere nọ ọ maero no ọruẹrẹfihotọ na ze. Kọ who mi uvẹ oke evaọ oria iruo ra rọkẹ edẹ esa okokohọ nọ whọ gwọlọ nya no? Otẹrọnọ who ti ru ere he, ru ere ababọ oke oraha. A rẹ rọwo uvẹ oke nọ a kake yare he he. Ọrigbo nọ o wo ẹrọwọ avọ areghẹ na ọ ruẹrẹ Okokohọ Ubrotọ “Otu-Iwuhrẹ Ẹme Ọghẹnẹ” en’ukpe ọnana họ re o kẹ omai uthubro abọ-ẹzi jẹ bọ ẹrọwọ mai ga. Fikiere mu ọruẹrẹfihotọ họ eru enẹna re whọ jariẹ, be nya lele ohrẹ ọso-ilezi na inọ: “Oghale u te Ọghẹnẹ eva ogbotu na”!—Ol. 68:26.
[Ọjọriẹ kẹ Ugboma Ekpako Na: Nọ uko obeva onana u te te owhai obọ no, iviena wha whowho oria gbe ẹdẹ okokohọ nọ Society o fihọ kẹ ukoko rai evaọ Ewuhrẹ Odibọgba gbe Uwuhrẹ Uwou-Eroro n’otha na. U re woma otẹrọnọ a re kpokahọ oria gbe ẹdẹ okokohọ ukoko rai na evaọ uko obeva na a vẹ tae mu ebọdo ovuẹ na.
Okere-obe ukoko na ọ rẹ rẹrote eme gbe iwhowhovia nọ i kpomahọ okokohọ na evaọ iwuhrẹ obaro. Ekpako na kpobi a re fiobọhọ re a ruẹ nọ eme nọ i kpomahọ okokohọ na a ru rai evaọ ẹruoke, sasasa, je ru ai ziezi.]
[Box on page 3]
Oke Iprogramo
Edisoi-Oka
9:20 a.m. – 4:40 p.m.
Ẹdẹ-Ọmaha
9:00 a.m. – 4:20 p.m.
Ẹdoka
9:00 a.m. – 3:20 p.m.