Okokohọ Ubrotọ “Enọ I Bi Ru Ẹme Ọghẹnẹ” ọ Isẹri Jihova ọrọ 2000
1 “Evaọ udevie ogbotu na mẹ jẹ te kẹ owhẹ akpẹwẹ; me ti jiri owhẹ evaọ iraro ahwo buobu.” (Ol. 35:18) Dai roro oghẹrẹ nọ eva e hae were Devidi te nẹnẹ re ọ ruẹ ahwo idu buobu nọ a kokohọ avọ udhedhẹ rọkẹ uthubro eva ikokohọ ilogbo mai na! Kọ whọ jọ usu ahwo 519,613 nọ i kpohọ ọvo jọ evaọ Okokohọ Ubrotọ “Ẹme Eruẹaruẹ Ọghẹnẹ” na? No urere ọ October 1999 rite emuhọ January 2000, a ru ikokohọ ilogbo 110 evaọ ikpewho 22 evaọ Nigeria. Ikokohọ ubrotọ mai evaọ 2000 na e te k’omai uvẹ okpokpọ nọ ma ti ro kokohọ kugbe ibe enọ i bi jiri Jihova, enọ i ‘se ẹgwọlọ abọ-ẹzi rai gboja’ jẹ be wereva je wo osegboja re a ‘yo ẹme nọ ẹzi na ọ be ta kẹ ukoko na.’—Mat. 5:3; Evia. 2:29.
2 Ithubro kẹ Ewo Uwou nọ A re Wohọ: Ma te daoma vi ebe ọ Room Request buobu ro se ukoko kpobi. U re mu okere-obe ukoko na ẹro nọ eme nọ a kere fihọ obe ọ Room Request nọ a te rọ ze na e gba. WHO kere unu iwhowho-uvie nọ e gwọlọ uwou ỌVO HO, wọhọ “iwhowho-uvie 50,” evaọ oria nọ a re kere edẹ ahwo nana fihọ na. A re kere eme na kpobi kpatiẹ vevẹ. Iviena jọ u mu owhẹ ẹro nọ who kere odẹ, ikpe, sọ ọzae hayo aye, jegbe sọ ohwo nọ ọ gwọlọ uwou na yọ ọkobaro hayo owhowho-uvie. Ku emọ na kugbe unu ahwo na. Evaọ oke nọ u kpemu, ikoko jọ i kere unu ekpako na ọvo. Onana u re ru ọruẹrẹfihotọ iwou na jọ bẹbẹ gaga. Otẹrọnọ eme nọ whọ gwọlọ kere e gba obe na ha, whọ rẹ sai kere fihọ ẹwẹ-obe ọfa gheghe kugbei. Otẹrọnọ who kere vrẹ omọvo fihọ obe na, fodẹ oghẹrẹ nọ ahwo na a kpekpe te fihọ oria nọ a ru fihọ iẹe na. U re mu okere-obe ukoko na ẹro nnọ a kere eme fihọ obe ọ Room Request na gbagba taure o te ti vi ei se Ẹko-Iruo Uwou okokohọ na.
3 K’ukpe k’ukpe, ma rẹ tuduhọ inievo na awọ re a yoẹme kẹ Ẹko-Iruo Uwou okokohọ na. Ma tẹ kezọ kẹ ẹjiroro nana, o tẹ kawo u re ru eware ivẹ gba:
4 O rẹ whaha araha igho kẹ inievo mai: Nọ ma te yoẹme kẹ ọruẹrẹfihọ Society, osa iwou u re kpotọ kẹ inievo mai. Ukpenọ ma rẹ raha igho kẹ enọ i wo iwou, a rẹ sae raha igho nana ziezi ro fiobọhọ kẹ iviuwou ọ inievo mai gbe iruo akpọ soso na. Ma te tube wo igho nọ ma sae rọ rehọ iwou eghaghae dede, u fo re ma tha omodawọ Ẹko-Iruo Uwou na uke. A dhesẹ ẹzi ọdawẹ k’amọfa ọnana eva 1 Jọn 3:17 yọ oye họ ehri-uzi nọ o rrọ emu ọ 1 Ahwo Kọrint 10:24 na.
5 U re dhesẹ ẹmeoyo kẹ ọkpọvio Society: Onana o rẹ j’omai oja gaga. Ahwo Hibru 13:17 o ta nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ [evawere] ru onana o [gbẹ jọ orọ] ofuhu, keme oyena u re wo erere kẹ owhai hi.” Nọ inievo mai a bi ru eruẹrẹfihotọ buobu kẹ okokohọ ubrotọ mai na, ma gwọlọ nọ a riẹ nọ ma be thọ ae uke vọvọ. Nọ a gwọlọ ẹmeoyo mai evaọ ẹme ọnana edẹ ivẹ hayo esa ọvo evaọ k’ukpe k’ukpe na, onana yọ emamọ edhere nọ ma rẹ rọ tha omodawọ rai uke. O tẹ make rọnọ ẹgwọlọ omobọ mai u wo ohẹriẹ, emamọ oriruo mai, nọ inievo mai gbe ahwo akpọ na a rẹ ruẹ, o rẹ wha ẹzi uyoyou, okugbe, gbe uketha haro.—Fil. 2:1-4.
6 Ẹgwọlọ Obọdẹ: Ọruẹrẹfihotọ ọnana ọ rrọ kẹ ahwo nọ a gwọlọ uketha obọdẹ mi amọfa evaọ eruo eruẹrẹfihotọ rai kẹ okokohọ ọvo, maero ọruẹrẹfihotọ uwou. Ahwo nana a sae jẹ gwọlọ obufihọ evaọ idhere efa wọhọ epanọ ebẹbẹ iyero rai e rọ. Iwhowho-uvie hayo ekobaro nọ i wo emamọ uruemu ọvo, kugbe emọ rai nọ e rrọ kpatiẹ, enọ i wo ẹgwọlọ obọdẹ nọ Ogbẹgwae Iruo Ukoko na u kuenu kẹ ọvo họ enọ i te kẹ obufihọ evaọ ọruẹrẹfihọ Ẹgwọlọ Obọdẹ na. Ukoko nọ ahwo na a no ze a re ru eruẹrẹfihotọ efa nọ a rẹ rọ sẹro ahwo nọ a wo ẹgwọlọ obọdẹ, ukpenọ a re fi owha-iruo onana họ ogbẹgwae okokohọ na uzou. Ekpako gbe amọfa nọ a riẹ kpahe uyero ohwo na a rẹ sai fiobọhọ. Onana o gwọlọ nọ iwhowho-uvie a re roro kpahe ẹgwọlọ ahwo nọ a rọ iruo odibọgba oke-kpobi, enọ e kpako no, enọ e be mọ, gbe amọfa. Iwhowho-uvie a rẹ sai fiobọhọ ẹkwoma ahwo nana nọ a rẹ rehọ gb’oma hayo rẹrote ẹgwọlọ rai evaọ obọdẹ idhere efa.—Jem. 2:15-17; 1 Jọn 3:17, 18.
7 Dede na, Ẹko-Iruo Uwou na a te daoma re a gwọlọ iwou nọ i fo kẹ iwhowho-uvie nọ i wo ẹgwọlọ obọdẹ otẹrọnọ ahwo ukoko na a sai fiobọhọ kẹ ae he. Iwhowho-uvie enana a rẹ ta ẹbẹbẹ rai kẹ okere-obe ukoko na. Okere-obe na ọ vẹ t’ẹme na kugbe Ogbẹgwae Iruo Ukoko na re a ruẹ sọ o lọhọ kẹ ukoko na re u fiobọhọ kẹ ahwo nana evaọ ọruẹrẹfihotọ iwou obọrai nọ a re wohọ. Otẹrọnọ ukoko na o gbẹ sae kẹ obufihọ nọ a gwọlọ họ, okere-obe na ọ sae rehọ obe ọ Room Request na rọkẹ ahwo otiọye na, onọ ọye omariẹ o re kere eme fihọ obehru ẹwẹ-obe ọsosuọ na nnọ, “SPECIAL NEEDS” (ẸGWỌLỌ OBỌDẸ). Ahwo nọ a wo ẹgwọlọ obọdẹ ọvo a re kere eme fihọ obe nana nọ a kpokahọ na. Ohwo nọ ọ gwọlọ uwou na o re kere eme fihọ iẹe. O re zihe iei bru okere-obe na, o ve rri rie sọ o gba ọ vẹ jẹ riẹ oware nọ o lẹliẹ ohwo na te kẹ ororokẹ otiọye na. Okere-obe na ọ rẹ fodẹ ẸBẸBẸ OHWO NA VEVẸ evaọ oria nọ a dhesẹ fihọ uke obe na. A re ru onana evaọ ẹruoke taure oke okokohọ na u te ti te. Okere-obe na o ve vi obe na se Ẹko-Iruo Uwou na. A ti kere ileta se ohwo nọ ọ gwọlọ uwou na ovavo kpahe oria nọ o ti wohọ.
8 ORỌNIKỌ ahwo nọ a wo ẹgwọlọ obọdẹ a re kpohọ okokohọ na a vẹ yare oria nọ a re wohọ nọ a te t’obei hi, keme Ẹko-Iruo Uwou na o rẹ gwọlọ yo mi Ogbẹgwae Iruo Ukoko na tao.
9 Ibuobu i dhesẹ ovuhumuo rai via no rọ kpahe ọruẹrẹfihotọ nọ a ru kẹ eria nọ a re wohọ evaọ etoke ikokohọ na. Kọ eva e were owhẹ epọvo na rọkẹ eruẹrẹfihotọ buobu nọ a ru k’owhẹ? Eva e rẹ were Society re a ruẹrẹ eria nọ a re wohọ evaọ etoke okokohọ na kpahe, nọ u re fiobọhọ k’omai kpobi t’ẹrovi irere abọ-ẹzi erọ okokohọ na gbe eme riẹ na.
10 Ekpohọ Okokohọ Ọfa: A ghale ukoko kpobi fihọ okokohọ nọ ọ mae kẹle iẹe. Rono unu iwhowho-uvie nọ a fihọ okokohọ ọvuọvo ze, Society ọ rẹ riẹ unu ahwo nọ a ti kpohọ okokohọ ọvuọvo re a ru ọruẹrẹfihotọ kẹ eria ẹkeria nọ i re te, iwou, ebe, gbe eware efa. Dede na, otẹrọnọ whọ gwọlọ kpohọ okokohọ ọfa nọ a ghale owhẹ fihọ họ fiki oware jọ yọ whọ gwọlọ uwou, okere-obe ukoko na ọ rẹ sae k’owhẹ obe ọ Room Request na. Whọ rẹ sai kere eme fihọ iẹe, okere-obe na ọ vẹ wh’obọhọ iẹe taure who te ti vi ei kpohọ okokohọ nọ whọ gwọlọ nya na.
11 Ẹvẹrẹ Obọ rọ t’Ẹme Rọkẹ Enọ I Diezọ: A ti ru ọruẹrẹfihotọ re inievo-emezae gbe emetẹ nọ i te ziezi a fa eme okokohọ na kpobi fihọ ẹvẹrẹ ọ Obọ rọ t’Ẹme America evaọ ikokohọ nana: Ota 2, November 3-5, 2000; Kaduna 4, November 17-19, 2000; Uli 7, December 8-10, 2000; gbe Ubogo 9, January 5-7, 2001. Ma tuduhọ ahwo nọ a diezọ evaọ ikoko kpobi evaọ Nigeria awọ re a muọ omaa họ ẹma re o tẹ kawo a ve kpohọ okokohọ ọvo jọ evaọ usu rai na. Ekpako na e rẹ daoma gaga re a ruẹ nọ ahwo nọ a diezọ nọ a rẹ riẹotọ ẹvẹrẹ ọ Obọ rọ t’Ẹme America nọ e rrọ ukoko rai a riẹ kpahe ọruẹrẹfihotọ nana jẹ riẹ sọ ahwo na a gwọlọ uketha jọ re a sae nya.
12 Ikokohọ enana ọvo a te jọ ruẹrẹ eria fihọ kẹ ahwo nọ a diezọ nọ a te fa eme okokohọ na kẹ evaọ ẹvẹrẹ obọ rọ t’ẹme. A te jọ uvumọ okokohọ ọfa fa eme na fihọ ẹvẹrẹ obọ rọ t’ẹme he. Otẹrọnọ ohwo nọ o diezọ avọ ohwo nọ ọ rẹ r’obọ t’ẹme a kpohọ okokohọ ọfa jọ, ma kuvẹ ọ imava itieye na nọ a rẹ keria kẹle ohwohwo, orọnikọ a re dikihẹ aro omọvo jọ hayo unu ahwo buobu jọ họ.
13 Koko Ugho họ kẹ Okokohọ Na: Fiba eruẹrẹfihotọ efa, ENẸNA họ oke nọ a re ro muọ ugho họ ekoko kẹ okokohọ ubrotọ na. Ahwo jọ a dina thabọ no oria okokohọ na. Ofariẹ, ahwo jọ a wo iviuwou ilogbo. Rọkẹ ahwo nana gbe omai kpobi, o gwọlọ ugho nọ a re ro ru unevaze, ofa-ojẹ, emuore evaọ etoke okokohọ na, ebe, te ekpokpọ nọ a siobọno kpobi, gbe araha idudhe efa. O gwọlọ nọ ahwo nọ a wo iviuwou ilogbo a rẹ m’omaa fihotọ je koko ugho họ ziezi re uviuwou na soso o sai kpohọ okokohọ na. Obọdẹ edhere jọ nọ a re ro ru onana o sae jọ eroro oma unuigho nọ o rẹ rehọ kpobi. O rrọ oware areghẹ re a roro epanọ eware e be ghare te kugbe evaọ okenọ whọ tẹ be m’omaa ra. Ghale unuigho nọ who roro na fihọ unu emerae nọ e rrọ umuo oke onana rite ẹdẹ okokohọ ubrotọ rai na. Unuigho nana whọ rẹ hai koko k’amara k’amara. Amara kpobi, kaki fi unuigho onana họ akotọ wọhọ ugho okokohọ. Whọ sai fi ei họ ẹkpẹti ọsese jọ hayo ẹnvẹlopu. Yọ, a rẹ sae ghale ugho ọ k’amara k’amara na kpohọ abane a vẹ hai koko iei họ k’oka k’oka. Oware nọ u w’uzou na họ whọ rẹ hẹrẹ bẹsenọ amara ọvo hayo ivẹ i re kiọkọ re okokohọ na o te te re who te ti muọ ugho họ ekoko kẹ erẹ ẹgbukpe ọnana ha.—Itẹ 21:5.
14 Ru Ọruẹrẹfihotọ re Whọ Jariẹ Evaọ Edesa na Kpobi: Kọ Setan ọ daoma re ọ kpọ ovao ra no ezọgaviẹ kẹ eware abọ-ẹzi no? U yoma gaga, emu abọ-ẹzi nọ o w’uzou o bi vru siọ inievo mai avọ iviuwou rai ba. Evaọ oghẹrẹ vẹ? Ẹkwoma abọ Edisoi-Oka ọrọ okokohọ ubrotọ na nọ a bi kpohọ họ. Evaọ ẹsejọ a muẹrohọ iẹe no inọ ithubro abọ-ẹzi gbe okuomagbe ọrọ abọ Edisoi-Oka na i bi vru mi inievo mai buobu.
15 O sae jọ nọ inievo mai a wo ehoo kpahe uvẹ nọ a rẹ yare mi ahwo nọ a bi ru iruo kẹ re a ro kpohọ obọ okokohọ na. Kọ ere o rrọ k’owhẹ? Kọ eme whọ gbẹ lẹ se Jihova kpahe ẹme na ha re whọ jẹ gbaudu dhesẹ uyero ra vevẹ kẹ ohwo nọ ọ rehọ owhẹ iruo na? Kareghẹhọ oware uwoma nọ u no rie ze kẹ Nehemaya, ọnọ ọ jọ oghẹrẹ uyero utioye na. (Neh. 2:1-6) Otẹrọnọ who wo iruo obọ ra, jọ u no owhẹ eva ze re who ru obusino nọ u fo re whọ sae nya evaọ edesa na kpobi. Wo ẹrọwọ kpahe unevaze Ọsẹ obọ odhiwu mai nọ o re ro fiobọhọ k’owhẹ, riẹ nọ otẹrọnọ whọ rehọ isiuru Uvie na rọ karo, ọ te k’owhẹ ekwakwa nọ i t’owhẹ ewo evaọ uzuazọ.—Mat. 6:32b, 33.
16 Ẹvẹ Ikokohọ Ilogbo Mai I Re Kpomahọ Owhẹ? Oniọvo-ọmọtẹ jọ nọ o kpohọ okokohọ ologbo jọ o kere nọ: “Uyere u te owhai fiki okokohọ ubrotọ ọrọ 1999 na. Usu onya kugbe inievo nọ mẹ rẹ ruẹ ẹsiẹvo ẹgbukpe na o rẹ wha oghọghọ ulogbo s’omẹ. Mẹ riẹ uzẹme na evaọ okenọ mẹ jọ ọmọ ikpe ikpegbọ nọ o dihọ, yọ avọ isiuru ilogbo mẹ kareghẹhọ orọ ọsosuọ nọ ohwo nọ o je wuhrẹ Ebaibol kugbe omẹ ọ rọ wha omẹ kpohọ okokohọ ologbo. Me rri oma mẹ wariẹhọ evaọ ọgwa ọyena nọ ma jẹ so ole Uvie na ‘Ogbotu Inievo,’ mẹ tẹ viẹ. Mẹ tẹ nọ oma mẹ nọ, ‘avọ emamọ ahwo nana kpobi nọ e wariẹ omẹ họ na, ẹvẹ Jihova ọ sae rọ gwọlọ omẹ?’ Ẹdẹ ọyena me te ku ei họ inọ mẹ rẹ gọ Jihova vọvọ.” Ẹvẹ o kẹ udu osasa te! O ghinẹ rrọ omawere re a kuomagbe ahwo ọfuafo Jihova, o gbẹ rrọ ere?
17 Evaọ etoke edẹ urere na, ma gwọlọ okokohọ ubrotọ k’ukpe k’ukpe mai vi epaọ anwẹdẹ kpobi. O rrọ ọruẹrẹfihotọ nọ o no obọ Jihova ze re o sẹro omokpokpọ gbe ẹdọmu abọ-ẹzi mai. Fikiere, gbae mu re who kpohọ edesa ọ Okokohọ Ubrotọ “Enọ I Bi Ru Ẹme Ọghẹnẹ” ọrọ enukpe ọnana. Ẹvẹ whọ sae rọ nya lele ọtamuo ra na? Kake yare ọnọ ọ rehọ owhẹ iruo re ọ k’owhẹ uvẹ nọ who re ro kpohọ okokohọ na kpobi. Otẹrọnọ who wo ugho tere he, jọ oke onana muọ ugho nọ whọ sai ro kpohọ okokohọ na họ ekoko. Yare Jihova re o fiobọhọ k’owhẹ fi ọzadhe kpobi kparobọ. Nọ who bi ru ere na, whọ rẹ sai rri kparo kpohọ omawere usu oruọruọ orọ inievo ra jegbe eyo eme uzuazọ ebẹdẹ bẹdẹ no obọ Ọsẹ oyoyou obọ odhiwu mai, Jihova ze.—Wawo Jọn 6:68.
[Ọjọriẹ kẹ Ugboma Ekpako Na: Nọ uko obeva onana u te te owhai obọ no, iviena wha whowho oria gbe ẹdẹ okokohọ nọ Society o fihọ kẹ ukoko rai evaọ Ewuhrẹ Odibọgba gbe Uwuhrẹ Uwou-Eroro n’otha na. U re woma otẹrọnọ a re kpokahọ oria gbe ẹdẹ okokohọ ukoko rai na evaọ uko obeva na a vẹ tae mu ebọdo ovuẹ na.
Okere-obe ukoko na ọ rẹ rẹrote eme gbe iwhowhovia nọ i kpomahọ okokohọ na evaọ iwuhrẹ obaro. Ekpako na kpobi a re fiobọhọ re a ruẹ nọ eme nọ i kpomahọ okokohọ na a ru rai evaọ ẹruoke, sasasa, je ru ai ziezi.]
[Box on page 3]
Oke Iprogramo
Edisoi-Oka: 9:20 a.m. – 4:40 p.m.
Ẹdẹ-Ọmaha: 9:00 a.m. – 4:20 p.m.
Ẹdoka: 9:00 a.m. – 3:20 p.m.