Okokohọ Ubrotọ “Ẹme Eruẹaruẹ Ọghẹnẹ” ọ Isẹri Jihova ọrọ 1999
1 Okenọ emọ Izrẹl e jọ igbrẹwọ na, Jihova ọ ta kẹ Mosis re o ru egba isiliva ivẹ. Okenọ a te tu ọgba ọvuọvo, isu erua na a ve kokohọ evaọ unuẹthẹ uwou-udhu egagọ na. A te tu egba ivẹ na u ve se ogbotu emọ Izrẹl na kpobi koko họ kugbe. (Ik. 10:1-4) Nẹnẹ na, kọ eva e gbẹ be were omai evaọ okenọ ma te yo iwhowhovia nọ, wọhọ edo egba, i re koko omai kpohọ ikokohọ ubrotọ k’ukpe k’ukpe mai na? Eva ikokohọ mai na ma re yo ithubro gbe ọkpọvio Jihova ẹkwoma Ẹme riẹ gbe ahwo nọ o ro mu. Onana u re fiobọhọ k’omai dikihẹ whawha evaọ iruo Ọghẹnẹ. Kọ ma gbẹ ghọghọ evaọ okenọ ma tẹ ruẹ idu—ẹsejọhọ idu buobu—erọ ibe egegagọ ẹrọwọ nọ i kokohọ kugbe evaọ uyoyou gbe udhedhẹ? Eva e rẹ ghinẹ were omai!—Ol. 122:1, 7, 8.
2 No October 1998 rite January 1999, a ru Ikokohọ Ubrotọ “Edhere Uzuazọ Ọghẹnẹ” nọ i bu te 106 evaọ ikpewho 22 evaọ Nigeria. A tudu họ omai kpobi awọ jẹ bọ omai ga ẹkwoma obọdẹ usu nọ ma wo kugbe inievo mai gbe ẹkwoma abọ sa-sa ọrọ ọruẹrẹfihotọ okokohọ na, maero eware nọ a rọ ẹro ruẹ gbe iyẹrẹ kpahe ẹnyaharo iruo ovuẹ Uvie na evaọ ekwotọ efa. Nọ ma ti kokohọ kẹ okokohọ ubrotọ ọrọ 1999 mai na, ma te wariẹ wo uvẹ okpokpọ nọ ma te rọ reawere ọ usu-inievo oghaghae mai na je yere Jihova fiki okugbe nọ ọ k’omai.
3 Nọ omaruẹrẹhọ kẹ Okokohọ Ubrotọ “Ẹme Eruẹaruẹ Ọghẹnẹ” ọrọ 1999 o be nyaharo na, ma gwọlọ kiẹ evuẹ jọ nọ wha gwọlọ re i fiobọhọ k’owhai ruẹ iwou nọ wha re wohọ evaọ okokohọ na. Ẹmeoyo ọvọvọ rai o ti dhesẹ ovuhumuo rai rọkẹ eruẹrẹfihotọ nọ a ru fiki rai na.
4 Ithubro kẹ Ewo Iwou nọ A re Wohọ: Ma te daoma vi ebe ọ Room Request buobu ro se ukoko kpobi. U re mu okere-obe ukoko na ẹro nọ eme nọ a kere fihọ obe ọ Room Request nọ a te rọ ze na e gba. WHO kere unu iwhowho-uvie nọ e gwọlọ uwou ỌVO HO, wọhọ “iwhowho-uvie 50,” evaọ oria nọ a re kere edẹ ahwo nana fihọ na. A re kere eme na kpobi kpatiẹ vevẹ. Iviena jọ u mu owhẹ ẹro nọ who kere odẹ, ikpe, sọ ọzae hayo aye, jegbe sọ ohwo nọ ọ gwọlọ uwou na yọ ọkobaro hayo owhowho-uvie. Ku emọ na kugbe unu ahwo na. Evaọ oke nọ u kpemu, ikoko jọ i kere unu ekpako na ọvo. Onana u re ru ọruẹrẹfihotọ iwou na jọ bẹbẹ gaga. Otẹrọnọ eme nọ whọ gwọlọ kere e gba obe na ha, whọ rẹ sai kere fihọ ẹwẹ-obe ọfa gheghe kugbei. Otẹrọnọ who kere vrẹ omọvo fihọ obe na, fodẹ oghẹrẹ nọ ahwo na a kpekpe te fihọ oria nọ a ru fihọ iẹe na. U re mu okere-obe ukoko na ẹro nnọ a kere eme fihọ obe ọ Room Request na gbagba taure o te ti vi ei se Ẹko-Iruo Uwou okokohọ na.
5 K’ukpe k’ukpe, ma rẹ lẹ inievo na re a yoẹme kẹ Ẹko-Iruo Uwou okokohọ na. Ma tẹ kezọ kẹ ẹjiroro nana, o tẹ kawo u re ru eware ivẹ gba:
6 Ma rẹ whaha araha igho buobu kẹ inievo mai: Nọ ma te yoẹme kẹ ọruẹrẹfihọ Society, osa iwou u re kpotọ kẹ inievo mai. Ukpenọ ma rẹ raha igho kẹ enọ i wo iwou, a rẹ sae raha igho nana ziezi ro fiobọhọ kẹ iviuwou ọ inievo mai gbe iruo akpọ soso na. Ma te tube wo igho nọ ma sai ro wohọ iwou eghaghae dede, u fo re ma tha omodawọ Ẹko-Iruo Uwou na uke. A dhesẹ ẹzi ọdawẹ k’amọfa ọnana eva 1 Jọn 3:17 yọ oye họ ehri-uzi nọ o rrọ emu ọ 1 Ahwo Kọrint 10:24.
7 Ma re dhesẹ ẹmeoyo kẹ ọkpọvio Society: Onana o rẹ j’omai oja gaga. Ahwo Hibru 13:17 o ta nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ [evawere] ru onana o [gbẹ jọ orọ] ofuhu, keme oyena u re wo erere kẹ owhai hi.” Nọ inievo mai a bi ru eruẹrẹfihotọ buobu kẹ okokohọ ubrotọ mai na, ma gwọlọ nọ a riẹ nọ ma be thọ ae uke vọvọ. Nọ a gwọlọ ẹmeoyo mai evaọ ẹme ọnana edẹ ivẹ hayo esa ọvo evaọ k’ukpe k’ukpe na, onana yọ emamọ edhere nọ ma rẹ rọ tha omodawọ rai uke. O tẹ make rọnọ ẹgwọlọ omobọ mai o wo ohẹriẹ, emamọ oriruo mai, nọ inievo mai gbe ahwo akpọ na a rẹ ruẹ, o rẹ wha ẹzi uyoyou, okugbe, gbe uketha haro.—Fil. 2:1-4.
8 Ẹgwọlọ Obọdẹ: Ọruẹrẹfihotọ ọnana ọ rọ kẹ ahwo nọ a gwọlọ uketha obọdẹ mi amọfa ọvo evaọ eruo eruẹrẹfihotọ rai kẹ okokohọ, maero ọruẹrẹfihotọ uwou. Ahwo nana a sae jẹ gwọlọ obufihọ evaọ idhere efa wọhọ epanọ ebẹbẹ iyero rai e rọ. Iwhowho-uvie hayo ekobaro nọ i wo emamọ uruemu ọvo, kugbe emọ rai nọ e rrọ kpatiẹ, enọ i wo ẹgwọlọ obọdẹ nọ Ogbẹgwae Iruo Ukoko na u kuenu kẹ ọvo họ enọ i te kẹ obufihọ evaọ ọruẹrẹfihọ Ẹgwọlọ Obọdẹ na. Ukoko nọ ahwo na a no ze a re ru eruẹrẹfihotọ efa nọ a rẹ rọ sẹro ahwo nọ a wo ẹgwọlọ obọdẹ, ukpenọ a re fi owha-iruo onana họ ogbẹgwae okokohọ na uzou. Ekpako gbe amọfa nọ a riẹ kpahe uyero ohwo na a rẹ sai fiobọhọ. Onana o gwọlọ nọ iwhowho-uvie a re roro kpahe ẹgwọlọ ahwo nọ a rọ iruo odibọgba oke-kpobi, enọ e kpako no, enọ e be mọ, gbe amọfa. Iwhowho-uvie a rẹ sai fiobọhọ ẹkwoma ahwo nana nọ a rẹ rehọ gb’oma hayo r’ẹrote ẹgwọlọ rai evaọ obọdẹ idhere efa.—Jem. 2:15-17; 1 Jọn 3:17, 18.
9 Dede na, Ẹko-Iruo Uwou na a te daoma re a gwọlọ iwou nọ i fo kẹ iwhowho-uvie nọ i wo ẹgwọlọ obọdẹ otẹrọnọ ahwo ukoko na a sai fiobọhọ kẹ ae he. Iwhowho-uvie enana e rẹ ta ẹbẹbẹ rai kẹ okere-obe ukoko na. Okere-obe na ọ vẹ t’ẹme na kugbe Ogbẹgwae Iruo Ukoko na re a ruẹ sọ o lọhọ kẹ ukoko na re u fiobọhọ kẹ ahwo nana evaọ ọruẹrẹfihotọ iwou obọrai nọ a re wohọ. Otẹrọnọ ukoko na o gbẹ sae kẹ obufihọ nọ a gwọlọ họ, okere-obe na ọ sae rehọ obe ọ Room Request na rọkẹ ahwo otiọye na, onọ ọye omariẹ o re kere eme fihọ obehru ẹwẹ-obe ọsosuọ na nnọ, “SPECIAL NEEDS” (ẸGWỌLỌ OBỌDẸ). Ahwo nọ a wo ẹgwọlọ obọdẹ ọvo a re kere eme fihọ obe nana nọ a kpoka họ na. Ohwo nọ ọ gwọlọ uwou na o re kere eme fihọ iẹe. O re zihe iei bru okere-obe na, o ve rri rie sọ o gba ọ vẹ jẹ riẹ oware nọ o lẹliẹ ohwo na te kẹ ororokẹ otiọye na. Okere-obe na ọ rẹ fodẹ ẸBẸBẸ OHWO NA VEVẸ evaọ oria nọ a dhesẹ fihọ uke obe na. A re ru onana evaọ ẹruoke taure oke okokohọ na o te ti te. Okere-obe na o ve vi obe na se Ẹko-Iruo Uwou na. A ti kere ileta se ohwo nọ ọ gwọlọ uwou na ovavo kpahe oria nọ o ti wohọ.
10 ORỌNIKỌ ahwo nọ a wo ẹgwọlọ obọdẹ a re kpohọ okokohọ na a vẹ yare oria nọ a re wohọ nọ a te t’obei hi, keme Ẹko-Iruo Uwou na o rẹ gwọlọ yo mi Ogbẹgwae Iruo Ukoko na tao.
11 Ibuobu i dhesẹ ovuhumuo rai via no rọ kpahe ọruẹrẹfihotọ nọ a ru kẹ eria nọ a re wohọ evaọ etoke ikokohọ na. Kọ eva e were owhẹ epọvo na rọkẹ eruẹrẹfihotọ buobu nọ a ru k’owhẹ? Eva e rẹ were Society re a ruẹrẹ eria nọ a re wohọ kpahe evaọ etoke okokohọ na, nọ u re fiobọhọ k’omai kpobi t’ẹro vi irere abọ-ẹzi erọ okokohọ na gbe eme riẹ na.
12 Ekpohọ Okokohọ Ọfa: A ghale ukoko kpobi fihọ okokohọ nọ ọ mae kẹle iẹe. Ro no unu iwhowho-uvie nọ a fihọ okokohọ ọvuọvo ze, Society ọ rẹ riẹ unu ahwo nọ a ti kpohọ okokohọ ọvuọvo re a ru ọruẹrẹfihotọ kẹ eria ẹkeria nọ i re te, iwou, ebe, gbe eware efa. Dede na, otẹrọnọ whọ gwọlọ kpohọ okokohọ ọfa nọ a ghale owhẹ fihọ họ fiki oware jọ yọ whọ gwọlọ uwou, okere-obe ukoko na ọ rẹ sae k’owhẹ obe ọ Room Request na. Whọ rẹ sai kere eme fihọ iẹe, okere-obe na ọ vẹ wh’obọ họ iẹe taure who te ti vi ei kpohọ okokohọ nọ whọ gwọlọ nya na.
13 Ẹvẹrẹ Obọ rọ t’Ẹme Rọkẹ Idiezọ Na: A ti ru ọruẹrẹfihotọ re inievo-emezae gbe emetẹ nọ i te zizie a fa eme okokohọ na kpobi fihọ ẹvẹrẹ ọ Obọ rọ t’Ẹme America evaọ ikokohọ nana: Ota 2, November 5-7; Kaduna 3, November 19-21; Uli 7, December 10-12; gbe Ubogo 9, December 17-19, 1999. Ma tuduhọ ahwo nọ a diezọ awọ evaọ ikoko kpobi evaọ Nigeria re a muọ omaa họ eruo re o tẹ kawo a ve kpohọ okokohọ ọvo jọ evaọ usu rai na. Ekpako na e rẹ daoma gaga re a ruẹ nọ ahwo nọ a diezọ nọ a rẹ riẹotọ ẹvẹrẹ ọ Obọ rọ t’Ẹme Amer-ica nọ e rrọ ukoko rai a riẹ kpahe ọruẹrẹfihotọ nana jẹ riẹ sọ ahwo na a gwọlọ uketha jọ re a sae nya.
14 Ikokohọ eyena ọvo a te jọ ruẹrẹ eria fihọ kẹ ahwo nọ a diezọ nọ a te fa eme okokohọ na kẹ evaọ ẹvẹrẹ obọ rọ t’ẹme. A te jọ uvumọ okokohọ ọfa fa eme na fihọ ẹvẹrẹ obọ rọ t’ẹme he. Otẹrọnọ ohwo nọ o diezọ avọ ohwo nọ ọ rẹ r’obọ t’ẹme a kpohọ okokohọ ọfa jọ, ma kuvẹ ọ imava itieye na nọ a rẹ keria kẹle ohwohwo, orọnikọ a re dikihẹ aro omọvo jọ hayo unu ahwo buobu hu.
15 Koko Ugho họ kẹ Okokohọ Na: Fiba eruẹrẹfihotọ efa, ENẸNA họ oke nọ a re ro muọ ugho họ ekoko kẹ okokohọ ubrotọ na. Ahwo jọ a dina thabọ no oria okokohọ na. Ofariẹ, ahwo jọ a wo iviuwou ilogbo. Rọkẹ ahwo nana gbe omai kpobi, o gwọlọ ugho nọ a re ro ru unevaze, ofa-ojẹ, emuore evaọ etoke okokohọ na, ebe, te ekpokpọ nọ a siobọno kpobi, gbe araha idudhe efa. O gwọlọ nọ ahwo nọ a wo iviuwou ilogbo a rẹ m’omaa fihotọ je koko ugho họ ziezi re uviuwou na soso o sai kpohọ okokohọ na. Obọdẹ edhere jọ o sae jọ eroro oma unuigho nọ o rẹ rehọ kpobi. O rrọ oware areghẹ re a roro epanọ eware e be ghare te kugbe evaọ okenọ whọ tẹ be m’omaa ra. Ghale unuigho nọ who roro na fihọ unu emerae nọ e rrọ umuo oke onana rite ẹdẹ okokohọ ubrotọ rai na. Unuigho nana whọ rẹ hai koko k’amara k’amara. Amara kpobi, kaki fi unuigho onana họ akotọ wọhọ ugho okokohọ. Whọ sai fi ei họ ẹkpẹti ọsese jọ hayo ẹvẹlopu. Yọ, a rẹ sae ghale ugho ọ k’amara k’amara na kpohọ abane a vẹ hai koko ei họ k’oka k’oka. Oware nọ u w’uzou na họ whọ rẹ hẹrẹ bẹsenọ amara ọvo hayo ivẹ i re kiọkọ re okokohọ o te te re who te ti muọ ugho họ ekoko kẹ erẹ ẹgbukpe ọnana ha.—Itẹ 21:5.
16 Ru Eware Kpobi kẹ Oruaro Ọghẹnẹ: O rrọ uduotahawọ re a yo kpahe ajiri nọ a be rọ kẹ odẹ Jihova fiki ọ uruemu ezi ọ inievo mai evaọ ikokohọ na. Kpahe emamọ uruemu nọ ahwo nọ a kpohọ okokohọ jọ a dhesẹ, oriughe jọ o kere nọ: “Mẹ reawere omakokohọ na. Mẹ te ruẹ uvumọ egagọ nọ e wọhọ ọnana ha. Epanọ okokohọ na ọ rro te na, uvumọ iporisi e jariẹ hẹ, uvumọ ohọre o jariẹ hẹ, yọ ẹko-iruo ọ uvru gbe a ruẹ o jariẹ.” Oruiruo jọ evaọ oria jọ nọ inievo mai e kpahe evaọ etoke okokohọ na ọ ta nọ: “Ahwo rai họ ahwo nọ a mai woma nọ mẹ ruẹ no evaọ etenẹ.” Ọfa jọ ọ kpahe nọ: ‘O rẹ were omai re ma fi ahwo rai họ uwou. A rrọ wowolẹ.’ Eme enana yọ obọdẹ isẹri n’obọ ahwo otafe ze. Emamọ odẹ nọ ma wo no o kẹ Jihova orro no jẹ lẹliẹ e rehọ omai seha.—1 Tẹs. 4:12; 1 Pita 2:12.
17 Dede na, ma wo ekpehre iyẹrẹ jọ no ikokohọ jọ ze kpahe emaha gbe ekpako nọ i je mu nya evaọ okenọ a jẹ t’eme na. Ejọ e keria evaọ imoto be kezọ kẹ ile. A ruẹ umutho ahwo jọ nọ a no Ọgwa Okokohọ na evaọ etoke nọ okokohọ ọ be nyaharo na a te kpohọ ehọtẹle gbe eria idieda. Efa i kpohọ ubienẹ jọ nyai gbiku. Ahwo jọ a zihe kpo evaọ okenọ abọ-ohiohiẹ o kuhọ no evaọ Ẹdoka. Ma gwọlọ re eware itienana e wariẹ roma via evaọ ikokohọ enukpe nana ha. Ma tuduhọ ahwo kpobi awọ inọ iviena wha dhesẹ oma-oyọrọ. Ma tẹ jẹ kareghẹhọ esẹ gbe ini re a r’ẹrote emọ rai. Otẹrọnọ whọ te rọo ho, hayo edhere jọ ọ riẹ nọ whọ sai ro fiobọhọ kẹ ahwo nọ a wo emọ ibuobu na, iviena ru ere.—Gal. 6:2.
18 Ohwo kpobi nọ o bi kpohọ ikokohọ mai, jọ ọ riẹ nnọ oria ọ egagọ ọ rrọ na. Uvumọ ohwo ọ rẹ rehọ uvẹ na rọ thueki hi. Obe ọ Our Ministry o ta, evaọ ẹwẹ-obe avọ 134, edhe-ẹme avọ 3, inọ: “Ekoko itee ikiẹrẹe Ọghẹnẹ o rẹ whaha omai no uvẹ omakugbe uvie mai nọ ma rẹ rọ wha ẹgwọlọ obọ mai hayo isiuru eki-ọthuọ efa haro. Ẹjiroro ọ usu mai kugbe amọfa eva iwuhrẹ Ileleikristi . . . gbe evaọ okenọ ma te kpohọ ikokohọ okogho gbe ikokohọ ilogbo họ re ma gọ Jihova ọvo, re-emu eva emejọ abọ-ẹzi riẹ jẹ reawere uduotahawọ ohwohwo. (Rom 1:11, 12; Hib. 10:24, 25)” Fikiere o thọ re ma re-okuodẹ ọrọ uvẹ usu-omakugbe uvie na ẹkwoma eware nọ ma rẹ zẹ je ruiruo kẹ ahwo wọhọ ekiọthuọ eva obọ ikokohọ na. Onana u kiekpahe ifoto erehọ re. Uvumọ ohwo o re whowho eki ifoto riẹ eva okokohọ na ha (wọhọ epaọ ebaje nọ a rẹ wha ro dhesẹ eki ọ ifoto riẹ) hayo yare oghẹrẹ eki otiọye na.
19 Ma tuduhọ owhai awọ re wha ru ọruẹrẹfihotọ enẹna re wha kpohọ Okokohọ Ubrotọ “Ẹme Eruẹaruẹ Ọghẹnẹ” ọrọ 1999 na evaọ edẹ esa na kpobi. Ma bi lele owhai rẹro eyo “uru aghọghọ gbe ile akpẹwẹ” abọ-ẹzi erọ ahwo nọ a be gọ Ọghẹnẹ wọhọ ogbotu okugbe na. (Ol. 42:4) Jọ Jihova ọ ghale ọruẹrẹfihọ kpobi nọ ma bi ru rọkẹ omokpokpọ abọ-ẹzi mai na!
[Ọjọriẹ kẹ Ugboma Ekpako Na: Nọ uko obeva onana u te te owhai obọ no, iviena wha whowho oria gbe ẹdẹ okokohọ nọ Society o fihọ kẹ ukoko rai evaọ Ewuhrẹ Odibọgba gbe Uwuhrẹ Uwou-Eroro n’ọtha na. U re woma otẹrọnọ a re kpoka họ oria gbe ẹdẹ okokohọ ukoko rai na evaọ uko obeva na a vẹ tae mu ebọdo ovuẹ na.
Okere-obe ukoko na ọ rẹ rẹrote eme nọ i kpomahọ okokohọ gbe iwhowhovia evaọ iwuhrẹ obaro. Ekpako na kpobi a re fiobọhọ re a ruẹ nọ eme nọ i kpomahọ okokohọ na a ru rai evaọ ẹruoke, sasasa, je ru ai ziezi.]
[Box on page 3]
Oke Iprogramo
Edisoi-Oka: 9:20 a.m. - 4:50 p.m.
Ẹdẹ-Ọmaha: 9:00 a.m. - 4:30 p.m.
Ẹdoka: 9:00 a.m. - 3:20 p.m.