Okokohọ Ubrotọ “Ẹrọwọ Fihọ Ẹme Ọghẹnẹ” ọ Isẹri Jihova ọrọ 1997
1 “Keme ẹdẹ ọvo eva ọgua ra o woma vi [odu ọvo] eva oria ofa.” (Ol. 84:10) Okenọ ọnọ ọ so ilezi na ọ jẹ gọ evaọ etẹmpol Jihova, ọ riẹ nọ Ọghẹnẹ erumeru na ọ rọ etẹe. Okenọ orẹwho na o te kokohọ kẹ ehaa ẹgbukpe yọ egegagọ uzẹme a vọ Jerusalẹm, emọ Izrẹl a re duku usu awere nọ a te kokohọ ọgua etẹmpol na. O rẹ kareghẹhọ ai okugbe orẹwho rai wọhọ usu ahwo ọvo nọ e rọ otọakpọ nọ Jihova o ku oghale gbe aruoriwo riẹ ku. Kukpe kukpe, ma wo uvẹ nọ ma re ro wo abọ evaọ usu yena ọrọ okugbe gbe oghọghọ kugbe inievo emezae gbe emetẹ idu buobu. Evaọ oke mai nana okokohọ ubrotọ ẹgbukpe yọ abọ ọvo jọ evaọ usu idhere nọ Jihova o bi ro koko ahwo riẹ họ kẹ ohrẹ gbe okuomagbe.
2 Ẹruorote ahwo Jihova buobu enọ e jẹ rria Jerusalẹm gbe ekẹloma riẹ evaọ etoke ehaa na yọ oware nọ o gwọlọ ọruẹrẹhọ. Re a yọrọ ẹkpatiẹ gbe udhedhẹ o gwọlọ ẹkẹ ọkpọvio kpahe iwou nọ a rẹ rria, oke nọ a re ro kokohọ, gbe eruẹrẹfihotọ efa. Nọ eme enana i kpomahọ egagọ uzẹme rai na, emọ Izrẹl a rẹ rehọ evawere nya lele ithubro enana.—Ol. 42:4; 122:1.
3 Inievo udhusoi buobu a raha euwa idu buobu no re a ruẹrẹ ẹko sa-sa okokohọ na họ jẹ ruẹrẹ iwou nọ a rẹ rria eva ikpewho ikokohọ 23 na họ. Inievo enana a bi ruiruo kugbe Ẹko-Iruo Okokohọ Ukoko-Ulogbo re a ruẹrẹ eware sa-sa nọ i kpomahọ ẹkpatiẹ okokohọ na họ. Ẹsejọ ma riẹ unu oke, omodawọ, gbe igho nọ e be ro ọruẹrẹhọ ikokohọ ubrotọ ẹgbukpe mai hi, rekọ mai kpobi ma ghine wo ovuhumuo ẹzi omolahiẹ inievo ẹrọwọ enana, kọ ogbẹrọ ere?
4 Nọ eruẹrẹfihọ e be nyaharo kẹ Okokohọ Ubrotọ “Ẹrọwọ Fihọ Ẹme Ọghẹnẹ” ọrọ 1997 mai na, ma wo eme jọ nọ ma jọ gwọlọ ezọgaviẹ rai gaga. Ẹmeoyo rai u re ti dhesẹ epanọ who wo ovuhumuo te kẹ eruẹrẹfihotọ nọ a bi ru fiki rai na. Dede nọ ma fodẹ eme enana jọ no vẹre, ugbe fo re mai omomọvo o vuhu owha-iruo nọ o wo mu vevẹ evaọ aro Jihova evaọ obufihọ kẹ eruẹrẹfihotọ okokohọ mai na.
5 Ithubro kẹ Ewo Iwou nọ A re Wohọ: Ma te daoma re ma rehọ ebe ọ Room Request nọ i te ro se ukoko kpobi. U re mu okere-obe ukoko na ẹro nọ eme nọ a kere fihọ obe ọ Room Request nọ a te rọ ze na e gba. WHO kere unu iwhowho-uvie nọ e gwọlọ uwou ỌVO HO, wọhọ “iwhowho-uvie 50,” fihọ oria nọ a re kere edẹ ahwo enana fihọ. A re kere eme na kpobi vevẹ. Iviena jọ u mu owhẹ ẹro nọ who kere odẹ, ikpe, sọ ọzae hayo aye, gbe nọ sọ ohwo nọ ọ gwọlọ uwou na yọ ọkobaro hayo owhowho-uvie ukoko. Ku emọ na kugbe unu ahwo na. Evaọ oke nọ u kpemu, ikoko jọ a re kere unu ekpako na ọvo. Onana u re ru ọruẹrẹfihotọ iwou jọ bẹbẹ gaga. Otẹrọnọ eme nọ whọ gwọlọ kere e gba obe na ha, whọ rẹ sai kere fihọ ẹwẹ-obe ọfa gheghe. Otẹrọnọ who kere vrẹ omọvo fihọ obe na, fodẹ oghẹrẹ nọ ahwo na a kpekpe te fihọ oria nọ a ru fihọ iẹe na. U re mu okere-obe ukoko na ẹro nọ o kere eme fihọ obe ọ Room Request na gbagba taure a te viei se Ẹko-Iruo Uwou Okokohọ na.
6 Kukpe kukpe, ma rẹ lẹ inievo na re a yoẹme kẹ Ẹko-Iruo Uwou Okokohọ na. Ma tẹ kezọ kẹ ẹjiroro nana, o tẹ kawo u re ru eware ivẹ gba:
7 O rẹ whaha araha igho buobu nọ inievo emetẹ gbe emezae mai a hae raha, enọ ibuobu rai e rọ iyogbere: Nọ ma te yoẹme kẹ ọruẹrẹfihotọ Ukoko-Ulogbo, osa iwou i re kpotọ kẹ inievo mai. Ukpenọ ma rẹ raha igho buobu fihọ ehọtẹle jẹ nyabru ahwo nọ i wo iwou, a rẹ sae raha igho enana ziezi ro fiobọhọ kẹ iviuwou mai gbe iruo akpọ soso na. Ma te tube wo igho nọ ma re ro wohọ iwou eghaghae dede, ma re fiobọhọ kẹ omodawọ Ẹko-Iruo Uwou na. Onana yọ ẹzi ọdawẹ kẹ amọfa nọ a dhesẹ eva 1 Jọn 3:17 gbe ehri-uzi nọ o rọ 1 Ahwo Kọrint 10:24.
8 U re dhesẹ ẹmeoyo kẹ ọruẹrẹhọ Ukoko-Ulogbo na: Onana o rẹ j’omai oja gaga. Ahwo Hibru 13:17 o ta nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ [evawere] ru onana o [gbẹjọ orọ] ofuhu, keme oyena u re wo erere kẹ owhai hi.” Nọ inievo mai a bi ru eruẹrẹfihotọ buobu kẹ okokohọ ubrotọ mai na, ma gwọlọ nọ a riẹ nọ ma be thai uke vọvọ. Nọ a gwọlọ ẹmeoyo mai evaọ ẹme ọnana edẹ ivẹ hayo esa ọvo evaọ kukpe kukpe na, onana yọ omamọ edhere nọ ma rẹ rọ tha omodawọ rai uke. O tẹ make rọnọ ẹsalọ omobọ mai u wo ẹhẹriẹ, emamọ oriruo mai, onọ inievo mai gbe ahwo akpọ na a rẹ ruẹ, o rẹ wha ẹzi uyoyou, okugbe, gbe ukeotha haro.—Fil. 2:1-4.
9 Ẹgwọlọ Obọdẹ: Ọruẹrẹfihotọ ọnana ọ rọ kẹ ahwo nọ a gwọlọ obufihọ obọdẹ ọvo ro mi amọfa evaọ eruo eruẹrẹfihotọ okokohọ rai, maero ọruẹrẹfihotọ uwou, evaọ etoke okokohọ na. A sae jẹ gwọlọ obufihọ evaọ idhere efa re, wọhọ epanọ ẹbẹbẹ eyero rai o rọ. Iwhowho-uvie hayo ekobaro nọ i wo emamọ uruemu ọvo, kugbe emọ rai nọ e rọ kpatiẹ, enọ Ogbẹgwae Iruo Ukoko na a jẹrehọ evo họ enọ i te kẹ obufihọ ọruẹrẹfihotọ Ẹgwọlọ Obọdẹ na. Ikoko nọ ahwo na a no ze a re ru eruẹrẹfihotọ efa nọ a rẹ rọ sẹro ahwo nọ i wo ẹgwọlọ obọdẹ, ukpenọ a re fi owha-iruo ọnana họ ogbẹguae okokohọ na uzou. Ekpako gbe amọfa nọ e riẹ kpahe eyero ohwo na a rẹ sai fiobọhọ. Onana o gwọlọ nọ iwhowho-uvie a re roro kpahe ẹgwọlọ ahwo nọ e rọ iruo odibọgba oke-kpobi, enọ e kpako no, enọ oma o rọ họ, gbe amọfa. Iwhowho-uvie a rẹ sai fiobọhọ ẹkwoma ahwo nana nọ a rẹ rehọ gb’oma hayo rẹro te ẹgwọlọ rai evaọ emamọ idhere efa.—Jem. 2:15-17; 1 Jọn 3:17, 18.
10 Dede, Ẹko-Iruo Uwou na a te daoma re a gwọlọ iwou nọ i fo kẹ iwhowho-uvie nọ i wo ẹgwọlọ obọdẹ otẹrọnọ ahwo ukoko na a sai fiobọhọ kẹ ai hi. Iwhowho-uvie enana a rẹ ta ẹbẹbẹ rai kẹ okere-obe ukoko na. Okere-obe na ọ vẹ t’ẹme na kugbe Ogbẹgwae Iruo Ukoko na re a ruẹ sọ o lọhọ kẹ ukoko na re a fiobọhọ kẹ ahwo nana re ae ọvo a gwọlọ uwou kẹ ai. Otẹrọnọ ukoko na o gbẹ sai fiobọ nọ a gwọlọ na họ họ, okere-obe na ọ vẹ rehọ obe ọ Room Request na rọ kẹ ahwo itieye na, ọnọ o re kere vevẹ fihọ obehru ẹwẹ-obe ọsosuọ na, eme na “ẸGWỌLỌ OBỌDẸ.” Ahwo nọ i wo ẹgwọlọ obọdẹ ọvo a re kere eme fihọ obe nana nọ a kpoka họ na. Ohwo nọ ọ gwọlọ uwou na o ve kere eme fihọ iẹe. O re zihe iei bru okere-obe na, ọnọ o re rri rie sọ a kere i rie gba ọ vẹ jẹ riẹ oware nọ o lẹliẹ ohwo na te kẹ ororokẹ otiọye na. Okere-obe na ọ rẹ fodẹ ẸBẸBẸ OHWO NA VEVẸ evaọ oria nọ o rọ uke obe na. A re ru onana evaọ ẹruoke taure oke okokohọ na u te zi te. Okere-obe na o ve vi obe na se Ẹko-Iruo Uwou na. A ti kere ileta se ohwo nọ ọ gwọlọ uwou na ovavo kpahe oria nọ o ti wohọ.
11 ORỌNIKỌ ahwo nọ i wo ẹgwọlọ obọdẹ a re kpohọ okokohọ na a vẹ yare oria nọ a re wohọ nọ a te te obei hi, keme Ẹko-Iruo Uwou na a rẹ gwọlọ yo mi Ogbẹgwae Iruo Ukoko na tao.
12 Ekpohọ Okokohọ Ọfa: A ruẹrẹhọ no re ukoko kpobi o kpohọ okokohọ nọ o mae kẹliẹe. Ro no unu iwhowho-uvie nọ a fihọ okokohọ ọvuọvo ze, Ukoko-Ulogbo ọ rẹ riẹ unu ahwo nọ i ti kpohọ okokohọ ọvuọvo re a ruẹrẹhọ kẹ eria ẹkeria nọ i re te, iwou, ebe, gbe eware efa. Ghele, otẹrọnọ whọ gwọlọ kpohọ okokohọ nọ o hẹriẹ oma no ọnọ a fihọ kẹ ukoko ra whọ tẹ jẹ gwọlọ uwou, okere-obe ukoko na ọ rẹ sae k’owhẹ obe ọ Room Request na. Whọ rẹ sai kere eme fihọ iẹe, okere-obe na ọ vẹ wh’obọ họ iẹe taure who te ti vi ei kpohọ okokohọ nọ whọ gwọlọ nya na.
13 Ekuhọ: U ri vevẹ k’omai kpobi inọ Jihova ọ be tha ọruẹrẹfihotọ ikokohọ ubrotọ na uke. Nọ inievo na buobu enọ i bi kpohọ okokohọ ubrotọ na a gwọlọ iwou na, o rẹ sai mu omai ẹro nọ Jihova ọ te rẹro te ẹgwọlọ ọnana. Nọ eme enana i kpomahọ egagọ uzẹme mai na, ma rẹ nya lele ithubro nọ a kẹ na avọ oghọghọ. Nọ ma te dhesẹ nọ ma “wo orọwọ evaọ [oware] osese” o rẹ lẹliẹ omai wo eghale nọ e be hẹrẹ ahwo nọ Jihova o you.—Luk 16:10.
14 Aizaya 33:20 o ta nọ: “Wha ri Zayọn, otọ ẹwho nọ ma rẹ jọ ru eha mai na!” U re gb’omai unu nọ ma te roro kpahe ogbotu ahwo evawere nọ i re zurie ziọ Jerusalẹm gbe enọ e rehọ unevaze kuyo kẹ ujaje Jihova re ‘eva e ruẹse were ai ziezi.’ (Izie. 16:15) Ikokohọ ubrotọ ẹgbukpe mai o rẹ k’omai uvẹ nọ ma rẹ rọ rehọ uthubro Ọghẹnẹ jẹ reawere emamọ usu inievo emezae gbe emetẹ mai. Jọ Jihova ọ ghale omodawọ ra nọ whọ be ruẹrẹ oma kpahe kẹ etoke okokohọ ubrotọ “Ẹrọwọ Fihọ Ẹme Ọghẹnẹ” ọrọ 1997 na!
[Ọjọriẹ kẹ Ugboma Ekpako na: Nọ uko obeva onana u te te owhai obọ no, iviena whowho oria gbe ẹdẹ okokohọ nọ Ukoko-Ulogbo a fihọ kẹ ukoko rai evaọ Ewuhrẹ Odibọgba gbe Uwuhrẹ Uwou-Eroro notha na. U re woma otẹrọnọ a re kpoka họ oria gbe ẹdẹ okokohọ ukoko rai na evaọ uko obeva na a vẹ tae mu ebọdo ovuẹ na.
Okere-obe ukoko na ọye o re ru eme nọ i kpomahọ okokohọ gbe iwhowhovia evaọ iwuhrẹ obaro. Ekpako na kpobi a re fiobọhọ re a ruẹ nọ eme nọ i kpomahọ okokohọ na a ru rai vẹrẹ, vevẹ, avọ ẹgba.]
[Box on page 4]
Oke Iprogramo
Edisoi-Oka
9:20 a.m. -4:40 p.m.
Ẹdẹ-Ọmaha
9:00 a.m. -4:20 p.m.
Ẹdoka
9:00 a.m. -3:20 p.m.