Ẹkpẹti Onọ

◼ Didi omayọrọ u fo okenọ ma tẹ rọ kugbe ohwo nọ o wo oma-owezẹ sa evaọ odibọgba mai?

Ma wo ẹjiroro nọ ma re ro rẹro nọ inievo emezae gbe emetẹ mai a gwọlo kru ute uruemu nọ o mai kpehru evaọ uruemu omobọ rai. Ghele, ma be rria akpọ nọ ọ rọ gbegbe nọ a bi jo ru onọ uje nọ uruemu ezi o rọ họ. Nọ o rọ nọ iroro mai e rọ fuafo na, ma rẹ yọrọ oma ẹsikpobi re ma whaha afuẹwẹ hayo omadhehọ oware nọ u fo ho. Onana u kugbe oma nọ ma rẹ yọrọ nọ ma tẹ rọ odibọgba na.

Evaọ usiuwoma ota ma rẹ nyaku ahwo nọ a wo oghẹrẹ oma-owezẹ sa enọ o wọhọ nọ a bi dhesẹ isiuru kẹ uzẹme na. Otẹrọnọ mai ọvo a rọ usu yọ ohwo ọfa ọ rọ uwou na ha, u re woma re ma jọ unuẹthẹ ta usiuwoma na ukpenọ ma rẹ rueva. Otẹrọnọ isiuru e riẹ, ma rẹ ruẹrẹ fihọ re ma rehọ owhowho-uvie ọfa lele oma okenọ ma te bi zihe hayo nọ amọfa evaọ uviuwou na a tẹ riẹ. Onana o gbẹ lọhọ họ, u re woma re ma rehọ uwuhrẹ na kẹ ohwo nọ ọ rọ oma-owezẹ ọvo na kugbe ọnọ o wo uwou na. Onana u kugbe iwuhrẹ Ebaibol nọ ma re ru kugbe ohwo nọ o wo oma-owezẹ sa.—Mat. 10:16.

Ma rẹ yọrọ oma nọ ma tẹ be salọ ohwo nọ ma re lele nyusu evaọ odibọgba na. Dede nọ iwhowho-uvie nọ i wo oghẹrẹ oma-owezẹ sa a rẹ sai ruiruo kugbe ẹsejọ, onana o rẹ mai woma nọ ahwo a tẹ rọ buobu. Gheghe, makọ evaọ odibọgba na, o rọ oware areghẹ hẹ re mai ọvo a raha oke kugbe ohwo nọ oma-owezẹ riẹ o hẹriẹ no omai nọ ọ rọ ọzae hayo aye mai hi. Fikiere, oniọvo nọ ọ be te ghale ahwo na ọ rẹ rehọ areghẹ ghale iwhowho-uvie na, kugbe emọ-uzoge, nọ i re ruiruo kugbe.

Ma te wo areghẹ, ma re ru oma mai hayo amọfa “zoruẹ” hẹ.—2 Kọr. 6:3.