Okokohọ Ubrotọ “Edhere Uzuazọ Ọghẹnẹ” ọ Isẹri Jihova ọrọ 1998
1 N’ukpe ruọ ukpe wariẹ akpọ na họ egegagọ ọgbọna erọ Jihova a re rẹro gaga re a koko oma họ gbidigbidi eva ikokohọ ubrotọ. Evaọ irẹro nana, a bi dhesẹ ẹzi idibo ẹrọwọ Jihova evaọ Izrẹl anwae nọ e rehọ oghọghọ suile eme ọ Olezi avọ 122 evaọ okenọ a jẹ nyae gọ Jihova eva Jerusalẹm. Owọ 1 olezi yena u se nọ: “Eva e were omẹ hrọ nọ a ta kẹ omẹ nọ, ‘Ma kpo obọ uwou ỌNOWO!’ ” Evaọ etoke otiọye na ma rẹ jẹ ruẹ imuẹro buobu inọ eme Aizaya 2:2, 3 i bi rugba.
2 Enukpe ọnana ma wo uvi iroro nọ ma rẹ rọ ghọghọ fiki omawere akpọ-soso nọ ahwo nọ a ti no kabọ kabọ akpọ na ze a te wha ziọ ikokohọ. Evaọ eria kpobi ọruẹrẹfihotọ okokohọ na o te kẹ ikuigbe eware nọ e via evaọ usiuwoma ota jẹ n’iyẹrẹ kpahe ẹnyaharo iruo ovuẹ Uvie na evaọ ekwotọ efa.
3 Dede na, evaọ eria nọ a te jọ ru ikokohọ akpọ-soso na, ikoko nọ a zizie ọvo eye i ti kpohọ omakokohọ yena. O r’oja kẹ ahwo kpobi re a yoẹme kẹ ijaje enana re a sai ru ikokohọ na kpobi kpatiẹ. Omawere akpọ-soso e te jọ vevẹ evaọ ikokohọ ubrotọ kpobi evaọ abọ ọruẹrẹfihotọ gbe iyẹrẹ enẹ na jọ, jegbe ẹkwoma imishọnare nọ e te jariẹ na.
4 Nọ ma gbẹ be ruẹrẹ oma họ kẹ Okokohọ Ubrotọ “Edhere Uzuazọ Ọghẹnẹ” ọrọ 1998 mai na, ma gwọlọ kiẹ evuẹ jọ nọ wha te gwọlọ riwi re wha sae ruẹ iwou nọ wha re wohọ evaọ okokohọ na. Ẹmeoyo ọvọvọ rai o ti dhesẹ ovuhumuo rai rọkẹ eruẹrẹfihotọ nọ a ru fiki rai na.
5 Ithubro kẹ Ewo Iwou nọ A re Wohọ: Ma te daoma vi ebe ọ Room Request buobu ro se ukoko kpobi. U re mu okere-obe ukoko na ẹro nọ eme nọ a kere fihọ obe ọ Room Request nọ a te rọ ze na e gba. WHO kere unu iwhowho-uvie nọ e gwọlọ uwou ỌVO HO, wọhọ “iwhowho-uvie 50,” fihọ oria nọ a re kere edẹ ahwo nana fihọ na. A re kere eme na kpobi vevẹ. Iviena jọ u mu owhẹ ẹro nọ who kere odẹ, ikpe, sọ ọzae hayo aye, jegbe sọ ohwo nọ ọ gwọlọ uwou na yọ ọkobaro hayo owhowho-uvie. Ku emọ na kugbe unu ahwo na. Evaọ oke nọ u kpemu, ikoko jọ a re kere unu ekpako na ọvo. Onana u re ru ọruẹrẹfihotọ iwou bẹbẹ gaga. Otẹrọnọ eme nọ whọ gwọlọ kere e gba obe na ha, whọ rẹ sai kere fihọ ẹwẹ-obe ọfa gheghe. Otẹrọnọ who kere vrẹ omọvo fihọ obe na, fodẹ oghẹrẹ nọ ahwo na a kpekpe te fihọ oria nọ a ru fihọ iẹe na. U re mu okere-obe ukoko na ẹro nnọ a kere eme fihọ obe ọ Room Request na gbagba taure o te ti vi ei se Ẹko-Iruo Uwou Okokohọ na.
6 Kukpe kukpe, ma rẹ lẹ inievo na re a yoẹme kẹ Eko-Iruo Uwou Okokohọ na. Ma tẹ kezọ kẹ ẹjiroro nana, o tẹ kawo u re ru eware ivẹ gba:
7 O rẹ whaha araha igho buobu kẹ inievo mai: Nọ ma te yoẹme kẹ ọruẹrẹfihọ Society, osa iwou i re kpotọ kẹ inievo mai. Ukpenọ ma rẹ raha igho kẹ enọ i wo iwou, a rẹ sae raha igho nana ziezi ro fiobọhọ kẹ iviuwou ọ inievo mai gbe iruo akpọ soso na. Ma te tube wo igho nọ ma sai ro wohọ iwou eghaghae dede, ma rẹ tha omodawọ Ẹko-Iruo Uwou na uke. Ẹzi ọdawẹ k’amọfa ọnana a dhesẹ i rie eva 1 Jọn 3:17 yọ oye họ ehri-uzi nọ o rọ 1 Ahwo Kọrint 10:24.
8 U re dhesẹ ẹmeoyo kẹ ọkpọvio Society: Onana o rẹ j’omai oja gaga. Ahwo Hibru 13:17 o ta nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te n’iyẹrẹ re a rọ [evawere] ru onana o [gbẹjọ orọ] ofuhu, keme oyena u re wo erere kẹ owhai hi.” Nọ inievo mai a bi ru eruẹrẹfihotọ buobu kẹ okokohọ ubrotọ mai na, ma gwọlọ nọ a riẹ nọ ma be thae uke vọvọ. Nọ a gwọlọ ẹmeoyo mai evaọ ẹme ọnana edẹ ivẹ hayo esa ọvo evaọ kukpe kukpe na, onana yọ emamọ edhere nọ ma rẹ rọ tha omodawọ rai uke. O tẹ make rọnọ ẹgwọlọ omobọ mai o wo ẹhẹriẹ, emamọ oriruo mai, nọ inievo mai gbe ahwo akpọ na a rẹ ruẹ, o rẹ wha ẹzi uyoyou, okugbe, gbe ukeotha haro.—Fil. 2:1-4.
9 Ẹgwọlọ Obọdẹ: Ọruẹrẹfihotọ ọnana ọ rọ kẹ ahwo nọ a gwọlọ uketha obọdẹ mi amọfa ọvo evaọ eruo eruẹrẹfihotọ rai kẹ okokohọ, maero ọruẹrẹfihotọ uwou, evaọ etoke okokohọ na. Ahwo nana a sae jẹ gwọlọ obufihọ evaọ idhere efa wọhọ epanọ ebẹbẹ eyero rai e rọ. Iwhowho-uvie hayo ekobaro nọ i wo emamọ uruemu ọvo, kugbe emọ rai nọ e rọ kpatiẹ, enọ i wo ẹgwọlọ obọdẹ nọ Ogbẹgwae Iruo Ukoko na u kuenu kẹ ọvo họ enọ i te kẹ obufihọ evaọ ọruẹrẹfihọ Ẹgwọlọ Obọdẹ na. Ukoko nọ ahwo na a no ze a re ru eruẹrẹfihotọ efa nọ a rẹ rọ sẹro ahwo nọ a wo ẹgwọlọ obọdẹ, ukpenọ a re fi owha-iruo onana họ ogbẹgwae okokohọ na uzou. Ekpako gbe amọfa nọ a riẹ kpahe uyero ohwo na a rẹ sai fiobọhọ. Onana o gwọlọ nọ iwhowho-uvie a re roro kpahe ẹgwọlọ ahwo nọ a rọ iruo odibọgba oke-kpobi, enọ e kpako no, enọ e be mọ, gbe amọfa. Iwhowho-uvie a rẹ sai fiobọhọ ẹkwoma ahwo nana nọ a rẹ rehọ gb’oma hayo rẹro te ẹgwọlọ rai evaọ obọdẹ idhere efa.—Jem. 2:15-17; 1 Jọn 3:17, 18.
10 Dede na, Ẹko-Iruo Uwou na a te daoma re a gwọlọ iwou nọ i fo kẹ iwhowho-uvie nọ i wo ẹgwọlọ obọdẹ otẹrọnọ ahwo ukoko na a sai fiobọhọ kẹ ae he. Iwhowho-uvie enana a rẹ ta ẹbẹbẹ rai kẹ okere-obe ukoko na. Okere-obe na ọ vẹ t’ẹme na kugbe Ogbẹgwae Iruo Ukoko na re a ruẹ sọ o lọhọ kẹ ukoko na re a fiobọhọ kẹ ahwo nana evaọ iwou obọrai nọ a re wohọ. Otẹrọnọ ukoko na o gbẹ sae kẹ obufihọ nọ a gwọlọ họ, okere-obe na ọ sae rehọ obe ọ Room Request na rọ kẹ ahwo itieye na, onọ o kere vevẹ fihọ obehru ẹwẹ-obe ọsosuọ na nnọ, “SPECIAL NEED” [ẸGWỌLỌ OBỌDẸ]. Ahwo nọ a wo ẹgwọlọ obọdẹ ọvo a re kere eme fihọ obe nana nọ a kpoka họ na. Ohwo nọ ọ gwọlọ uwou na o re kere eme fihọ iẹe. O re zihe iei bru okere-obe na, ọnọ o re rri rie sọ a kere i rie gba ọ vẹ jẹ riẹ oware nọ o lẹliẹ ohwo na te kẹ ororokẹ otiọye na. Okere-obe na ọ rẹ fodẹ ẸBẸBẸ OHWO NA VEVẸ evaọ oria nọ a dhesẹ eva uke obe na. A re ru onana evaọ ẹruoke taure oke okokohọ na u te ti te. Okere-obe na o ve vi obe na se Ẹko-Iruo Uwou na. A ti kere ileta se ohwo nọ ọ gwọlọ uwou na ovavo kpahe oria nọ o ti wohọ.
11 ORỌNIKỌ ahwo nọ a wo ẹgwọlọ obọdẹ a re kpohọ okokohọ na a vẹ yare oria nọ a re wohọ nọ a te t’obei hi, keme Ẹko-Iruo Uwou na a rẹ gwọlọ yo mi Ogbẹgwae Iruo Ukoko na tao.
12 Ekpohọ Okokohọ Ọfa: A ghale ukoko kpobi fihọ okokohọ nọ ọ mae kẹle iẹe. Ro no unu iwhowho-uvie nọ a fihọ okokohọ ọvuọvo ze, Society ọ rẹ riẹ unu ahwo nọ a ti kpohọ okokohọ ọvuọvo re a ru ọruẹrẹfihotọ kẹ eria ẹkeria nọ i re te, iwou, ebe, gbe eware efa. Dede na, otẹrọnọ fiki oware jọ whọ gwọlọ kpohọ okokohọ ọfa nọ a ghale owhẹ fihọ họ yọ whọ gwọlọ uwou, okere-obe ukoko na ọ rẹ sae k’owhẹ obe ọ Room Request na. Whọ rẹ sai kere eme fihọ iẹe, okere-obe na ọ vẹ wh’obọ họ iẹe taure who te ti vi ei kpohọ okokohọ nọ whọ gwọlọ nya na.
13 Koko Ugho họ kẹ Okokohọ Na: Fiba eruẹrẹfihotọ efa, ENẸNA họ oke nọ a re muọ ugho họ ekoko kẹ okokohọ ubrotọ na. Ahwo jọ a dina thabọ no oria okokohọ na. Ofariẹ, ahwo jọ a wo iviuwou ilogbo. Rọkẹ ahwo nana gbe omai kpobi, o gwọlọ ugho nọ a re ro ru unevaze, ofa-ojẹ, emuore evaọ etoke okokohọ na, ebe, te ekpokpọ nọ a siobọno kpobi, gbe araha idudhe efa. O gwọlọ nọ ahwo nọ a wo iviuwou ilogbo a rẹ m’oma fihotọ je koko ugho họ ziezi re uviuwou na soso o sai kpohọ okokohọ na. Obọdẹ edhere jọ o sae jọ eroro oma unuigho nọ o rẹ rehọ kpobi. O rọ oware areghẹ re a roro epanọ eware e be ghare te kugbe evaọ okenọ whọ tẹ be m’oma ra. Ghale unuigho nọ who roro na fihọ unu emerae nọ e rọ umuo oke onana rite ẹdẹ okokohọ ubrotọ rai na. Unuigho nana whọ rẹ hai koko k’amara k’amara. Amara kpobi, kaki fi unuigho onana họ akotọ wọhọ ugho okokohọ. Whọ sai fi ei họ ẹkpẹti ọsese jọ hayo ẹvẹlopu. Dede na, a rẹ sae ghale ugho ọ k’amara k’amara na kpohọ abane a vẹ hai koko ie họ k’oka k’oka. Oware nọ u w’uzou na họ whọ rẹ hẹrẹ bẹsenọ amara ọvo hayo ivẹ i re kiọkọ re okokohọ o te te re who te ti muọ ugho họ ekoko kẹ erẹ ọ kukpe kukpe nana ha.—Itẹ 21:5.
14 Ekuhọ: Iyẹrẹ nọ i no ikokohọ ze i dhesẹ nnọ whai inievo na wha fo ujiro rọkẹ edhesẹ ekwakwa Ọghẹnẹ. Iyẹrẹ jọ e ta nọ: “Okokohọ na ọ jọ kpatiẹ jẹ jọ dhedhẹ, yọ inievo na a kezọ kẹ eware abọ-ẹzi vi eware iwo. . . . Evaọ okenọ a bi ru ẹme, ahwo na a jẹ kezọ kẹ ẹmeọta na gaga.” Aye nọ o wo isukulu jọ nọ inievo na i wohọ ọ ta nọ: “Mẹ be hai yo nọ Isẹri Jihova yọ ahwo ọfuafo, rekọ me ti muẹro họ iẹe he. Rekọ enẹna mẹ rọ ẹro mẹ ruẹ no. Eva e were omẹ gaga nọ mẹ ruẹ nọ a ru isukulu mẹ fihọ fuafo tẹtẹtẹ, a ne isọ fihọ otọ vievie he. Oke kpobi nọ wha bi ru okokohọ rai wha sae jọ isukulu na odode.” U woma re a yo eme itienana, ogbẹrọ ere? Evaọ uzẹme uruemu inievo na nọ o wha eme enana ze u ru udu Jihova ghọghọ.
15 Inievo buobu a kere ileta buobu ro se Society bi dhesẹ ovuhumuo kẹ ọruẹrẹfihotọ nọ a ru kẹ ae. Oniọvo ọmọzae jọ o kere nọ: “Me yere owhai gaga . . . Onana o rọ kpahe Okokohọ Ubrotọ edẹ esa ọrọ ‘Ẹrọwọ Fihọ Ẹme Ọghẹnẹ’ nọ mẹ reawere riẹ. . . . Uyere u te owhai gaga fiki oghẹrẹ nọ okokohọ na ọ kpatiẹ te.” Oniọvo ọmọtẹ jọ o kere nọ: “Me yere inievo kpobi nọ i wo obọ kpahe ọruẹrẹfihotọ iwou na. Mẹ avọ ọzae mẹ ma wo ovuhumuo kẹ ukuẹku iwou na, keme na ọzae mẹ ọvo o bi ruiruo re mẹ sai ruiruo ọkobaro na haro. Eruẹrẹfihotọ enana i fiobọhọ k’omai wo erere gaga no okokohọ na ze.”
16 O rọ vevẹ k’omai kpobi inọ Jihova ọ be tha ọruẹrẹfihotọ ikokohọ ubrotọ na uke. Nọ inievo na buobu nọ i bi kpohọ ikokohọ ubrotọ na a gwọlọ iwou na, o rẹ sai mu omai ẹro nọ Jihova ọ te rẹro te ẹgwọlọ nana. Nọ ma te dhesẹ nọ ma “wo orọwọ evaọ [oware] osese” o rẹ lẹliẹ omai wo eghale nọ e be hẹrẹ ahwo nọ Jihova o you.—Luk 16:10.
[Ọjọriẹ kẹ Ugboma Ekpako Na: Nọ uko obeva onana u te te owhai obọ no, iviena wha whowho oria gbe ẹdẹ okokohọ nọ Society o fihọ kẹ ukoko rai evaọ Ewuhrẹ Odibọgba gbe Uwuhrẹ Uwou-Eroro notha na. U re woma otẹrọnọ a re kpoka họ oria gbe ẹdẹ okokohọ ukoko rai na evaọ uko obeva na a vẹ tae mu ebọdo ovuẹ na.
Okere-obe ukoko na ọ rẹ rẹro te eme nọ i kpomahọ okokohọ gbe iwhowhovia evaọ iwuhrẹ obaro. Ekpako na kpobi a re fiobọhọ re a ruẹ nọ eme nọ i kpomahọ okokohọ na a ru rai evaọ ẹruoke, sasasa, je ru ai ziezi.]
[Box on page 4]
Oke Iprogramo
Edisoi-Oka
9:20 a.m.–4:50 p.m.
Ẹdẹ-Ọmaha
9:00 a.m.–4:30 p.m.
Ẹdoka
9:00 a.m.–3:30 p.m.