Ewuhrẹ Obe ọ Gọ Ọghẹnẹ Na

A ruẹrẹ Gọ Ọghẹnẹ Uzẹme Ọvo Na fihọ re a wuhrẹ iẹe kugbe ahwo ọkpokpọ nọ a te wuhrẹ obe ọ Eriariẹ na re no. Ewuhrẹ obe nana evaọ Uwuhrẹ Obe Ukoko o te thomai kpahe ziezi re ma rehọ iẹe ruiruo evaọ odibọgba na, yọ u ti fi obọ họ kẹ omai nọ ma je ru uyoyou gbe ovuhumuo mai kẹ Jihova gbe ukoko riẹ diwi viere. Ẹvẹ ma sai ro wo erere vọvọ no ewuhrẹ obe ọ Gọ Ọghẹnẹ na ze?

Eru Uwuhrẹ Na: Nọ ma be te hai wuhrẹ uzou ososo evaọ ẹkpoka kpobi na, u fo nọ esẹro uwuhrẹ obe ukoko na a rẹ ruẹrẹ oke na fihọ idhe-eme na ziezi. U ti woma re a dhẹ siawọ omojọ evaọ idhe-ẹme emuhọ na re oke o sae jariẹ kẹ abọ nọ ọ mai wuzou, nọ e rẹ roma via evaọ abọ urere uzou na. Etehe ọkiẹkpemu na nọ a rẹ kiẹriwi kpẹkpẹe eva ekuhọ uwuhrẹ kpobi u re fi obọ họ kẹ ahwo nọ a ziọ ewuhrẹ na nọ a jẹ kareghẹhọ igogo eme na.

A kere enọ jọ gohọ obeva nọ a re roro jẹ ta ẹme kpahe evaọ obe ọ Gọ Ọghẹnẹ na. A rẹ sae ruẹ oriruo jọ evaọ ẹwẹ-obe avọ 48-49. Ọnọ o bi se evaọ obe uwuhrẹ na ọ rẹ sae la enọ itieye na vrẹ. Nọ ọsẹro na ọ tẹ be rehọ ae jiroro kugbe utu na, o re ru re a se jẹ t’ẹme kpahe ikereakere na wọhọ epanọ oke o kuvẹ te.

Omaruẹrẹhọ Ẹruoke: Oma nọ a rẹ ruẹrẹ họ ziezi kẹ uwuhrẹ na o gwọlọ vi usi nọ a re si fihọ otọ iyo na ọvo. Oma olẹ nọ ma re ro roro kpahe ikereakere nọ a fodẹ na u re fi obọ họ kẹ omai ruẹrẹ orọnikọ iyo mai ọvo ho rekọ, mai wuzou, udu mai. (Ẹzra 7:10) Mai kpobi ma rẹ sae zọhọ fihọ uduotahawọ nọ ma rẹ kẹ ohwohwo ẹkwoma iyo nọ ma rẹ kẹ avọ omarokpotọ.—Rom 1:11, 12.

Ewuhrẹ mai ọrọ obe ọ Gọ Ọghẹnẹ na u ti fi obọ họ kẹ omai si kẹle Jihova, yọ o te thọ omai kpahe re ma fi obọ họ kẹ ahwo udu-oruọzewọ re a ti ku oma gbe omai evaọ ẹgọ riẹ. (Ol. 95:6; Jem. 4:8) Jọ mai kpobi ma wo erere no emamọ ọruẹrẹfihotọ abọ-ẹzi nana ze vọvọ.