Reawere Ewuhrẹ Obe na Eme Ebaibol na O Gine Wuhrẹ?
1 Oware jọ nọ o kẹ omai evawere gaga eva Okokohọ Ubrotọ “Ẹmeoyo kẹ Ọghẹnẹ” na họ obusino obe na Eme Ebaibol na O Gine Wuhrẹ? Kẹle na, ma te rehọ iẹe ruiruo gaga eva odibọgba na, maero nọ ma te bi ru ebe-uwuhrẹ Ebaibol. Fikiere, o gwọlọ nọ ma riẹ eware nọ e rrọ obe okpokpọ nana ziezi. Oyena o te lọhọ keme ma ti wuhrẹ iẹe evaọ Uwuhrẹ Obe Ukoko muhọ no oka ọ April 17, 2006 vrẹ.
2 Ọsẹro Uwuhrẹ Obe Ukoko na o ti si iroro kpohọ enọ nọ e rrọ emuhọ uzou kpobi na. A vẹ te rọ enọ nọ e rrọ obotọ ẹwẹ-obe na ro ru uwuhrẹ na. A ti se jẹ ta ẹme kpahe ikereakere nọ i ru ugogo eme na vẹ, yọ ẹkpẹti na “Oware nọ Ebaibol na O Wuhrẹ” nọ o rrọ urere uzou na u ti fi obọ họ evaọ ọkiẹkpemu oware nọ ma wuhrẹ na keme ẹkpẹti na o wo iyo Ikereakere kẹ enọ nọ a jọ emuhọ uzou na nọ na. O te were owhẹ oma re whọ kuyo, nọ orọnọ eme obe na i re vevẹ, lọlọhọ, je siuru ziezi na.
3 Eme-ofiba obe nana e kẹ oruvẹ odidi kpahe izoẹme sa-sa. Ma te sae rọ obe nana ruiruo nọ emọ-uwuhrẹ Ebaibol a tẹ gbẹ gwọlọ riẹ kodo kpahe uzoẹme jọ. Eva ẹsejọ a te hae tẹme kpahe abọ eme-ofiba na evaọ Uwuhrẹ Obe Ukoko na. Ọnọ o bi se evaọ uwuhrẹ na o re se eme nọ e rrọ abọ eme-ofiba na kpobi nọ i kiekpahe uzoẹme jọ, yọ izoẹme nọ e rrọ thethei gaga a sae se ai ibribro. Enọ uwuhrẹ e romavia evaọ eme-ofiba na ha. Rekọ ọnọ ọ be rẹrote uwuhrẹ na ọ sae nọ enọ nọ i fielo họ igogo eme na nọ enọ e rrọ uwuhrẹ na a rẹ kpahe fihọ.
4 Ewuhrẹ obe ọ Ebaibol Wuhrẹ na evaọ Uwuhrẹ Obe Ukoko na o te vẹrẹ gaga. Orọnikọ ere a gwọlọ nọ ma re wuhrẹ iẹe vẹrẹ te nọ ma tẹ be rehọ iẹe wuhrẹ amọfa ha, maero otẹrọnọ umutho eriariẹ jọ ọvo a wo kpahe Ebaibol na hayo a riẹ Ebaibol na vievie he. (Iruẹru 26:28, 29) Nọ ma te bi ru ebe-uwuhrẹ Ebaibol, u fo nọ ma tẹme kpahe ikereakere fuafo ziezi, ru etadhesẹ ve, gbe eware efa itieye. Fikiere fi ei họ ute ra re whọ jariẹ koka koka je wobọ vọvọ evaọ ewuhrẹ obe ọ Eme Ebaibol na O Gine Wuhrẹ?