Obufihọ nọ O Riẹ Ẹsikpobi
1 Ekpohọ iwuhrẹ Ileleikristi ẹsikpobi, usiuwoma ota, gbe uwuhrẹ omobọ-ohwo orọ Ẹme Ọghẹnẹ o jọ bẹbẹ gaga kẹ Anna, oniọvo-ọmọtẹ jọ nọ ọzae riẹ ọ rrọ ukoko ho, yọ iruo riẹ e rẹ kẹe uvẹ tere he. Dede nọ o gbe you Jihova, ọ se iruo Uvie ba riẹriẹriẹ. O rrọ oware evawere inọ o wo obufihọ abọ-ẹzi no obọ ekpako na ze.
2 Obufihọ abọ-ẹzi nọ ọ be rehọ ẹkwoma ukoko Ileleikristi na kẹ nọ ma rẹ jẹ rehọ u re dhesẹ nọ ma fi eva họ Jihova. Evaọ aro o ro kele uyoyou ẹruọsa Jesu Kristi, ekpako ukoko a rẹ gwọlọ uvẹ nọ a rẹ rọ kẹ ahwo nọ a wo ẹbẹbẹ evaọ ẹnyate iruẹru abọ-ẹzi uduotahawọ gbe uvi uketha. (1 Tẹs 5:14) Evaọ ẹsejọ, oware nọ o gwọlọ kpobi họ ẹme owowou ọrọ uduotahawọ nọ a rehọ no Ikereakere nọ e rẹ kẹ ọbọga ze. Unevaze nọ a re ro fi obọ họ kẹ ahwo nọ a whrehe evaọ umutho oke jọ o rẹ jọ ọdawẹ kẹ Ileleikristi kpobi, orọnikọ ekpako ukoko ọvo ho. Ababọ avro, mai omomọvo ma ruẹ ẹgba nọ uvi ‘ẹme nọ a ta evaọ ẹruoke riẹ’ u wo no.—Itẹ 25:11; Aiz. 35:3, 4.
3 Kake Jẹ Owọ Na: Uvi isiuru nọ a re dhesẹ kẹ ahwo nọ a gwọlọ obufihọ o gwọlọ nọ ma kake jẹ owọ na, dhesẹ ororokẹ, je sei gboja. Nọ Jonatan o yo kpahe uyero idhọvẹ nọ Devidi ọ jọ, “ọ tẹ kparoma ọ jẹ nya bru Devidi ze obọ Horẹsh, ọ tẹ . . . wha e udu.” (1 Sam. 23:15, 16) Rehọ edhere owowolẹ fi obọ họ kẹ amọfa. Ẹme nọ a ta avọ uvi isiuru ọ rẹ wha emamọ iyẹrẹ ze. Ofariẹ, Jesu o dhesẹ vevẹ inọ o gwọlọ osegboja, avọ uvi omodawọ re a sae wariẹ wo omoni abọ-ẹzi tobọ. (Luk 15:4) Ewo uvi isiuru nọ a re ro fi obọ họ kẹ omọfa o te wọ omai thihakọ evaọ obọ ufihọ na o tẹ make rrọ nọ ẹnyaharo o bi dhesẹ oma via vẹrẹ vẹrẹ hẹ.
4 Ẹvẹ o rrọ ọbọga te nọ ma tẹ rọ unevaze zizie amọfa, wọhọ ahwo nọ a rrọ utu obe-uwuhrẹ ukoko mai, re a ku oma gbe omai evaọ odibọgba na! Nọ ma bi fi obọ họ kẹ ibe Oleleikristi mai wobọ evaọ usiuwoma ota na, ma sae rehọ uvẹ na bọ ohwo yena ga. Oke oghọghọ utioye na nọ a reawere riẹ kugbe evaọ egagọ Jihova o rẹ jọ ọbọga ziezi kẹ ahwo nọ a be wariẹ dikihẹ ga evaọ abọ-ẹzi.
5 Ọruẹrẹfihotọ Oyoyou: Ahwo nọ a siọ usiuwoma ota ba no anwọ oke jọ hayo nọ a siọ iwuhrẹ enya ba no evaọ anwọ oke jọ a sae gwọlọ obufihọ ofa re a sae bọ ẹrọwọ rai ga. Uwuhrẹ Ebaibol kugbe ohwo yena evaọ obe wọhọ Gọ Ọghẹnẹ Uzẹme Ọvo Na, Si Kẹle Jihova, hayo Eme Ebaibol na O Gine Wuhrẹ? o sae jọ nọ oware nọ o gwọlọ kpobi ye ọvo. Nọ o rọnọ ohwo na ọ họ-ame no na, u du gwọlọ re a ru uwuhrẹ na oke thethei hi. Ogbẹgwae Iruo Ukoko na u re mu ẹro hotọ re a riẹ ohwo nọ ọ sai wo erere no ọruẹrẹfihotọ nana ze.—Rri Ẹkpẹti Onọ evaọ Odibọgba Uvie Mai ọrọ November 1998 gbe November 2000.
6 Anna, nọ ma jọ obehru fodẹ na, ọ rọ evawere jẹ obufihọ nọ ekpako na e kẹ rehọ nọ a rọ ta kẹ oniọvo-ọmọtẹ nọ o te ziezi evaọ abọ-ẹzi re o ru obe-uwuhrẹ Ebaibol kugbei. Isiane ọvo o rehọ e rai ro ru uwuhrẹ na kugbei ro fi obọ họ kẹe wariẹ si kẹle Jihova. Ọ tẹ wariẹ mu iwuhrẹ ukoko họ ẹnya jẹ wariẹ bọ ọtamuo riẹ ga nọ o re ro jiri Jihova evaọ ẹgbede. Oniọvo-ọmọtẹ nọ o te ziezi na o fi obọ họ kẹe evaọ odibọgba na re ẹkwoma ebe-uwuhrẹ Ebaibol efa nọ ọ wha riẹ nya bẹsenọ o ro wo udu ziezi no nọ ọ rẹ rọ ta usiuwoma no uwou ruọ uwou. Obufihọ ọvo họ oware nọ ọ gwọlọ re ọ wariẹ mu iruẹru abọ-ẹzi riẹ họ!
7 Ẹbọga ahwo nọ a gwọlọ obufihọ o rẹ wha eghale se ahwo kpobi. Ọnọ a bi fi obọ họ kẹ o re wo omaweromẹ esikẹle Jihova gbe obọ nọ o re wo evaọ iruẹru ukoko Riẹ. O rẹ kẹ ekpako na evawere re a ruẹ ẹnyaharo otiọye na. (Luk 15:5, 6) Ahwo ukoko na a re wo usu okpekpe kugbe ohwohwo evaọ okugbe ọvo gbe edhesẹ ọdawẹ oyoyou kẹ ohwohwo. (Kọl. 3:12-14) Ma gine wo uvi ẹjiroro nọ ma rẹ rọ rehọ aro kele Jihova, ehri obufihọ nọ a rẹ sae ruẹ ẹsikpobi na!—Ẹf. 5:1.
[Study Questions]
1. Ẹvẹ abọ-ẹzi ohwo o sai ro whrehe?
2. Evaọ edhere vẹ Ileleikristi kpobi a sae rọ kẹ uvi obufihọ evaọ oke kpobi?
3, 4. Eme o kẹre te re a fi obọ họ kẹ amọfa, kọ ẹvẹ ma sai ro ru ere?
5. Evaọ iyero jọ, obufihọ vẹ ekpako ukoko e rẹ sae kẹ?
6. Ẹvẹ oniọvo-ọmọtẹ jọ ọ rọ wariẹ wo ẹgba abọ ẹzi?
7. Irere vẹ i re no amọfa nọ ma rẹ bọ ga evaọ abọ-ẹzi ze?