Ẹkpẹti Onọ

◼ Kọ u gbe fo re a ru obe uwuhrẹ Ebaibol kugbe oniọvo nọ ọ siọ odibọgba na ba no evaọ otọ ọkpọvio omọvo ọ Ogbẹgwae Iruo Ukoko na jọ?

Ekpako na a wo owha-iruo nọ a rẹ rọ sẹro ukoko na, te ohwo ukoko na kpobi nọ ọ siọ odibọgba na ba no. A re weze bru ohwo otiọye na a vẹ j’iroro ọ uketha nọ u fo kẹe. Oria nọ o jọ fo, a rẹ jẹ sae ta kẹe kpahe erere ọ uwuhrẹ Ebaibol omobọ ohwo. Organized to Accomplish Our Ministry, ẹwẹ-obe avọ 103, u dhesẹ nọ Ogbẹgwae Iruo Ukoko o rẹ j’iroro ọ ohwo nọ ọ rẹ sai w’erere no ọruẹrẹfihotọ otiọye na ze.

Ọsẹro iruo usiuwoma ota na ọ rẹ j’iroro ọ ohwo nọ ọ te sae kẹ obufihọ na ziezi, izoẹme nọ a re wuhrẹ, gbe obe nọ o te mai fiobọhọ. Ẹsejọhọ oniọvo nọ o wuhrẹ obe ame-ọhọ kugbe ohwo na hayo oniọvo jọ nọ ohwo na ọ riẹ nọ ọ rẹ jẹ kẹ adhẹẹ ọye o rẹ mai kiehọ kẹ re o fiobọhọ. A sae ta kẹ oniọvo-ọmọtẹ nọ o te je wo eriariẹ ziezi re o fiobọhọ kẹ oniọvo ọmọtẹ nọ ọ siọ odibọgba na ba no. U re fo ho re owhowho-uvie ọfa o kuomagbe owuhrẹ nọ a ro mu na. Otẹrọnọ a rehọ owhowho-uvie mu re o wuhrẹ iẹ, owhowho-uvie na ọ sai kele oke na, izihebro na, gbe obe-uwuhrẹ na.—Rri Odibọgba Uvie Mai ọrọ February 1989 (ọrọ Oyibo), ẹwẹ-obe 1-2.

Nọ ọmọ-uwuhrẹ na ọ họ-ame no na, u re du fo re ewuhrẹ na ọ nyaharo krẹkri hi. Ute na họ re a fiobọhọ kẹ ọnọ ọ siọ odibọgba ba no na re ọ wariẹ muọ iwuhrẹ ukoko kpobi họ ẹnya je zihe ruọ owhowho-uvie ikẹse kẹse. Ọsẹro iruo usiuwoma ota na ọ rẹ rẹro te ẹnyaharo iwuhrẹ itieye na. Oware nọ u re no uketha uyoyou onana ze họ inievo enana a re te epanọ a rẹ sae rọ wha owha-iruo obọrai kẹ Jihova a ve je wo ‘owọ whawha’ fihọ uzẹme na.—Ẹf. 3:17; Gal. 6:5.