Ẹkpẹti Onọ

◼ Ẹvẹ a sai ro fiobọhọ kẹ ohwo nọ ọ siọ odibọgba na ba no riẹriẹriẹ evaọ oke krẹkri re ọ wariẹ te wọhọ owhowho-uvie emamọ usi na?

Okenọ ohwo nọ ọ se odibọgba na ba no riẹriẹriẹ o te dhesẹ imuẹro inọ o wo ẹgwọlọ nọ o n’udu ze re ọ gọ Jihova, onana o rẹ kẹ oghọghọ. (Luk 15:4-6) Ẹsejọhọ, ohwo na ọ kuvẹ kẹ ọwọsuọ hayo otunyẹ re i gele ewuhrẹ omobọ riẹ, ekpohọ ewuhrẹ ukoko, gbe abọ-owo evaọ usiuwoma ota na fihọ akotọ. Ẹvẹ a sae rọ kẹe uketha evaọ edhere nọ ọ mai woma re o ru ẹnyaharo abọ-ẹzi?

Mai kpobi ma rẹ rehọ udu obọmai kẹ ohwo nana imuẹro ọ uvi uyoyou Ileleikristi nọ ma wo kẹe. Ekpako ukoko na a rẹ gwọlọ ugogo ẹgwọlọ abọ-ẹzi riẹ via ababọ oke oraha. (Jem. 5:14, 15) Otẹrọnọ ẹseba iruo riẹ na o jọ omoke kpẹkpẹe, o sae jọ nọ obufihọ owhowho-uvie nọ o wo ona ọvo họ oware nọ o gwọlọ re a ru ohwo na wariẹ muọ iruo họ evaọ usiuwoma ota na. Dede na, otẹrọnọ ohwo nọ ọ siọ odibọgba ba no riẹriẹriẹ na ọ sioma ba ekugbe ukoko na kri no, ẹsejọhọ u re fo re a kẹ obufihọ viere. Re o bọ ẹrọwọ gbe ovuhumuo riẹ ga, o rẹ sai fo re a ru uwuhrẹ Ebaibol evaọ obe nọ u fo kugbei. O tẹ rrọ ere, ọsẹro iruo usiuwoma ota na o re ru ọruẹrẹfihotọ re owhowho-uvie nọ o te o ru ewuhrẹ na kugbe ei. (Hib. 5:12-14; rri Ẹkpẹti Onọ evaọ Odibọgba Uvie Mai ọrọ November 1998 na.) Otẹrọnọ whọ riẹ ohwo jọ nọ ọ gwọlọ obufihọ utioye na, ta kẹ ọsẹro usiuwoma ota na evaọ ukoko ra.

Taure a te ti zizie ohwo nọ ọ siọ odibọgba ba no riẹriẹriẹ evaọ oke krẹkri no re ọ wariẹ w’obọ evaọ odibọgba na, u fo re ekpako ivẹ e t’ẹme kugbei re a riẹ sọ o te wọhọ owhowho Uvie. A rẹ nya lele edhere nọ ọ wọhọ ọnọ a re lele evaọ okenọ a tẹ be t’eme kugbe ahwo ọkpokpọ nọ e gwọlọ te wọhọ iwhowho-uvie emamọ usi na. [Rri Uwou-Eroro ọ November 15, 1988 (ọrọ Oyibo), ẹwẹ-obe avọ 17.] Ọnọ ọ siọ odibọgba ba no riẹriẹriẹ na o re wo ẹgwọlọ ọgaga nọ ọ rẹ rọ ghale emamọ usi na kugbe amọfa. O rẹ jẹ gwọlọ re ọ nyate itee nọ a dhesẹ fihọ ẹwẹ-obe avọ 98-99 evaọ obe Our Ministry na ọ vẹ jẹ hai kpohọ iwuhrẹ kẹse kẹse.

Ewo emamọ edhere iruo ikẹse kẹse ọrọ abọ-ẹzi u re fiobọhọ kẹ ohwo nọ o bi zihe ze na re ọ bọ ga jẹ yọrọ usu oghaghae riẹ kugbe Jihova jẹ ruabọhọ onya evaọ edhere uzuazọ ebẹdẹ bẹdẹ na. (Mat. 7:14; Hib. 10:23-25) ‘Oma nọ ọ rẹ dawo gaga’ gbe ẹbọ ekwakwa Oleleikristi nọ e rẹ tọ u re ru ei nọ ọ gbẹ wariẹ zihe kpohọ ‘oyẹlẹ gbe ababọ ẹmọ ubi’ hi wọhọ Oleleikristi.—2 Pita 1:5-8.