Whọ Kpairoro Vrẹ Enọ E Se Iruo Uvie na Ba No Ho
1. Fikieme o jẹ roja re ma fiobọhọ kẹ ahwo nọ a se iruo Uvie na ba no riẹriẹriẹ?
1 Kọ whọ riẹ ohwo jọ nọ ọ se iruo Uvie na ba no riẹriẹriẹ? O sae jọ nọ ọ se oma ba ekugbe ukoko na no. Ẹsejọhọ whọ nyaku ohwo otiọye jọ no nọ whọ jọ iruo usiuwoma n’uwou ruọ uwou na. Ma re woi họ iroro inọ ohwo otiọye na ọ gbẹ rrọ oniọvo abọ-ẹzi mai. Ma gwọlọ dhesẹ kẹe inọ ma gbe you rie, jẹ gwọlọ fiobọhọ kẹe zihe ziọ ukoko na gbe ọnọ ‘o bi rri jẹ sẹro izi mai.’—1 Pita 2:25.
2. Ẹvẹ ma sae rọ ta udu họ ahwo nọ a se iruo Uvie ba no awọ?
2 Dhesẹ Isiuru: Ohwo na nọ whọ rẹ rehọ ifonu se hayo imiweze kpẹkpẹe o sae kẹ ohwo nọ ọ se iruo Uvie na ba no imuẹro inọ ọ re thọrọ omai ẹro ho. Eme ma rẹ sae ta? Eme ọbọga nọ ma rẹ ta kẹ ohwo na ro dhesẹ kẹe nọ ma bi roro kpahe iẹe o rẹ sae kẹe uduotahawọ. Jọ ẹme ra ọ jọ sasasa avọ ọbọga nọ o rẹ kẹ. (Fil. 4:8) Ma sae ta oware jọ nọ ma reawere riẹ kẹlena evaọ ewuhrẹ ukoko. Ma sai je zizie iei ziọ ewuhrẹ hayo okokohọ, jẹ vuẹe inọ ma te keria kugbei hayo jẹ ofa riẹ.
3. Ẹvẹ a ro fiobọhọ kẹ oniọvo-ọmọtẹ jọ wariẹ mu iruẹru abọ-ẹzi họ?
3 A jọ ẹkwotọ ukoko jọ nyaku oniọvo-ọmọtẹ jọ nọ ọ se iruo Uvie ba kri vrẹ ikpe 20 no. Dede nọ ọ jẹ gwọlọ jẹ obe-uwuhrẹ Ebaibol rehọ họ, oniọvo-ọmọtẹ nọ ọ nyaku ei na o je zihe bru ei noke ruoke, jẹ wha emagazini ekpokpọ bru ei. Nọ a ru okokohọ ubrotọ no, oniọvo-ọmọtẹ na ọ tẹ ta eware ọbọga nọ a jọ okokohọ na wuhrẹ kẹ oniọvo-ọmọtẹ nọ ọ se iruo Uvie ba no riẹriẹriẹ na, uwhremu na, oniọvo-ọmọtẹ nọ ọ se iruo Uvie ba no riẹriẹriẹ vẹre na ọ tẹ wariẹ mu iruẹru abọ-ẹzi họ.
4. Ẹvẹ ma re ru ohwo nọ ọ wariẹ mu oma họ ekugbe ukoko na ẹkwoma ẹnyaze iwuhrẹ?
4 Okenọ Ohwo O Te Zihe Ze: Nọ oniọvo nọ ọ se iruo Uvie ba no ọ tẹ be wariẹ mu iwuhrẹ họ ẹnyaze, oghẹrẹ uruemu vẹ ma re dhesẹ kẹe? Oghẹrẹ uruemu vẹ Jesu o dhesẹ kẹ ilele riẹ nọ e dhẹ se iẹe ba evaọ ubroke? Jesu o dhesẹ i rai wọhọ “imoni” riẹ, o te je dhesẹ nọ o fi eva họ ae. Ọ kẹ rai iruo nọ i wuzou gaga dede. (Mat. 28:10, 18, 19) Nọ omoke jọ o vrẹ no, a te mu emamọ usi na họ ewhowho ababọ eriosehọ.—Iruẹru 5:42.
5. Fodẹ iyero nọ ma rẹ jọ ta kẹ ekpako na kpahe ohwo nọ ọ se iruo Uvie na ba no.
5 Taure ma tẹ te ta kẹ ohwo nọ ọ se iruo Uvie ba no riẹriẹriẹ inọ ma ti mu obe-uwuhrẹ Ebaibol họ kugbei hayo zizie ei inọ o ku oma gbe omai kpohọ usiuwoma ota, ma rẹ ta kẹ ekpako ukoko na tao re a kẹ omai ọkpọvio epanọ ma re ru. Otẹrọnọ ma nyaku owhowho-uvie nọ ọ se iruo Uvie ba no riẹriẹriẹ evaọ ẹkwotọ mai, ma rẹ vuẹ ekpako na re a ru ọruẹrẹfihotọ nọ a re ro fiobọhọ kẹe.
6. Didi oghọghọ ma ti wo nọ ma te fiobọhọ kẹ ahwo nọ a se iruo Uvie ba no?
6 Wọhọ epanọ Ebaibol i dhesẹ vevẹ na, ahwo nọ a dhẹ ohrẹ na te urere ọvo a re ti siwi. (Mat. 24:13) Fikiere, muẹrohọ ahwo nọ a zoruẹ hayo ahwo nọ a si oma họ emu no. Nọ ma te dhesẹ oghẹrẹ uyoyou Ọghẹnẹ ẹkwoma uvi isiuru nọ ma re dhesẹ kpahe ahwo otiọye, ma ti wo omaweromẹ nọ ma te rọ ruẹ ahwo na nọ a wariẹ ku oma gbe omai je mu iruẹru abọ-ẹzi rai họ.—Luk 15:4-10.