Igodẹ Jihova E Gwọlọ Ẹruọsa Oyoyou

“Wha riẹ nọ ỌNOWO họ Ọghẹnẹ! . . . Mai họ ahwo riẹ, igodẹ nọ ọ rẹ kuọ.”—OLEZI 100:3.

1. Ẹvẹ Jihova o bi ru idibo riẹ?

JIHOVA họ Othuru-Igodẹ Ologbo na. Ma tẹ rọ idibo riẹ, o re riwi omai wọhọ igodẹ riẹ jẹ sẹro mai wowolẹ. Ọsẹ obọ odhiwu mai ọ rẹ sasa je ru omai kpokpọ je su omai “eva ada ẹrẹreokie fiki odẹ riẹ.” (Olezi 23:1-4) Othuru-Igodẹ Owoma na, Jesu Kristi, o you omai te epanọ ọ rọ rehọ uzuazọ riẹ kẹ fiki mai.—Jọn 10:7-15.

2. Otọ eyero ọvẹ ahwo Ọghẹnẹ a jọ ruẹ omobọ rai?

² Wọhọ enọ i bi wo ẹruọsa owowolẹ, ma rẹ sai lele ọnọ ọ so ilezi na ta nọ: “Wha rehọ evawere ru iruo kẹ ỌNOWO! Re wha suile obọaro riẹ! Wha riẹ nọ ỌNOWO họ Ọghẹnẹ! Ọye ọ ma omai, je wo omai; mai họ ahwo riẹ, igodẹ no ọ rẹ kuọ.” (Olezi 100:2, 3) Ẹhẹ, ma wo oghọghọ jẹ rọ omofọwẹ. O wọhọ nọ ma wo omofọwẹ no erao ijihẹ evaọ ogba igodẹ nọ o wo igbẹhẹ egaga itho.—Ikelakele 32:16; 1 Samuẹl 24:3; Zefanaya 2:6.

Ithuru-Igodẹ Unevaze ọ Uthuru Na

3. Ẹvẹ ekpako Ileleikristi nọ a ro mu a re ru uthuru Ọghẹnẹ?

³ Agbẹta nọ ma jẹ be ghọghọ wọhọ igodẹ Ọghẹnẹ na! Ekpako nọ a ro mu e be kobaro eva udevie mai. A be rehọ oma rai ru “ọmọ-ovie” he, be rehọ oma ru ilori k’omai, hayo be daoma re a jọ enọ i wuzou ẹrọwọ mai hi. (Ikelakele 16:13; Matiu 20:25-28; 2 Ahwo Kọrint 1:24; Ahwo Hibru 13:7) Ikpoye, a rọ ithuru-igodẹ iyoyou nọ i bi fi ohrẹ Pita ukọ na họ iruo: “Wha sẹro uthuru Ọghẹnẹ nọ orọ owhai obọ, orọnọ ọgbahọ họ rekọ onọ uno eva ze, orọnọ rọ kẹ erere nọ o re fou omovuọ họ, rekọ iroro nọ e gba kiete. Orọnọ wha re ru oma oruoro rọ kẹ enọ-iwuzou otu nọ ọrọ otọ rai hi, rekọ wha rẹ jọ oriruo kẹ uthuru na.” (1 Pita 5:2, 3) Pọl ukọ na ọ ta kẹ ibe ekpako riẹ nọ: “Wha yọrọ oma rai jegbe uthuru na kpobi, e nọ Ẹzi Ẹri ọ jẹ rọ owhai mu enọ iwuzou, re wha kuọ [ukoko] Ọghẹnẹ ọnọ ọ rọ azẹ ọghaghae obọ riẹ rọ dẹ.” Ẹvẹ igodẹ na a wo ovuhumuo te inọ ezae enana nọ a rọ ẹzi ọfuafo ro mu na a bi ‘yeri kugbe uthuru na avọ ẹwolẹ’!—Iruẹru 20:28-30.

4. Didi oghẹrẹ usu kugbe uthuru na a riẹ Charles T. Russell fihọ?

⁴ Jesu ọ jọ ukoko na “kẹ ahwo ekẹ,” ejọ wọhọ “ikọ,” hayo ithuru-igodẹ, enọ e be rọ edhere ẹwolẹ yeri kugbe uthuru Jihova. (Ahwo Ẹfẹsọs 4:8, 11) Omọvo ezae enana họ Charles T. Russell, ohwo-agbara ọsosuọ Watch Tower Society. A je sei Russell Ukọ na fiki iruo uyoyou ororokẹ riẹ evaọ ẹruorote uthuru na evaọ otọ Othuru-Igodẹ Ologbo na, Jesu Kristi. Nẹnẹ, Ugboma Esuo Isẹri Jihova a rẹ rehọ ekpako Ileleikristi ro mu, yọ a rẹ yọrọ oma re a siọ edẹ wọhọ “ukọ,” “ọkpako,” hayo “owuhrẹ” ba ero ruiruo wọhọ edẹ ova. (Matiu 23:8-12) Ghele na, ekpako oke onana a bi ru iruo ikọ, hayo ithuru, rọ kẹ erere igodẹ uthuru Jihova.

5. Fikieme ahwo ọkpokpọ a jẹ riẹ ekpako nọ a ro mu evaọ ukoko Ileleikristi na?

⁵ Wọhọ ithuru-igodẹ, ekpako a wo abọ ologbo evaọ ẹnyaharo ẹzi ahwo ọkpokpọ. Fikioye, obe okpokpọ na Eriariẹ Nọ I Re Su Kpohọ Uzuazọ Ebẹdẹ Bẹdẹ o jẹ ta evaọ ẹwẹre-obe avọ 168 nọ: “Daoma whọ riẹ ekpako ukoko nọ a ro mu na. A wo otoriẹ buobu evaọ efihiruo eriariẹ Ọghẹnẹ, keme a nyate ute nọ e rọ Ebaibol na nọ ọsẹro ọ rẹ nya te. (1 Timoti 3:1-7; Taitọs 1:5-9) Whọ siọ omọvo rai jọ ba ẹnya bru hu whọ tẹ gwọlọ obufihọ ẹzi re who fi uruemu hayo iroro jọ nọ e wọso ẹgwọlọ Ọghẹnẹ kparobọ. Whọ rẹ te ruẹ nọ ekpako na a bi lele ohrẹ Pọl: ‘Wha ta udu họ enọ udu u re bro awọ, wha fiobọhọ kẹ enọ e ko, wha wo ikiakọ kẹ ahwo kpobi.’—1 Ahwo Tẹsalọnika 2:7, 8; 5:14.”

Okenọ Ahwo Ọkpokpọ A tẹ Gwọlọ Ta Usiuwoma

6. Didi edhere a rẹ nya lele otẹrọnọ ọmọ-uwuhrẹ Ebaibol ọ gwọlọ jọ owhowho Uvie?

⁶ Nọ ọmọ-uwuhrẹ Ebaibol o te wo eriariẹ no je kpohọ iwuhrẹ unuẹse buobu no, ọ sae gwọlọ re ọ jọ owhowho Uvie, ọtausiuwoma. (Mak 13:10) Otẹrọ ere, Osẹri nọ o bi wuhrẹ uwuhrẹ Ebaibol kugbei na ọ rẹ nya bru ọsẹro ukoko na, ọnọ ọ rẹ ruẹrẹ họ kugbe omọvo ekpako nọ e rọ Ogbẹgwae Iruo Ukoko gbe ọkpako ọfa re a wo ẹkeria kugbe ọmọ-uwuhrẹ Ebaibol na avọ ohwo nọ o bi wuhrẹ iẹi obe. A rẹ rehọ ẹme nọ a te ta ro no obe ọ Organized to Accomplish Our Ministry ze, ewẹre-obe avọ 98 gbe 99. Otẹrọnọ ekpako ivẹ enana a ruẹ nọ ohwo ọkpokpọ na ọ rọwo ehri iwuhrẹ Ebaibol na je nwene uzuazọ riẹ lele izi Ọghẹnẹ no, a rẹ ta kẹe nọ o te re o wo obọ evaọ odibọgba obọ otafe.a Okenọ ọ tẹ niyẹrẹ odibọgba riẹ ẹkwoma iyẹrẹ nẹ iruo usiuwoma ota riẹ, a ve kpeze iruo riẹ fihọ ekade Okerefihotọ Owhowho-Uvie Ukoko na evaọ odẹ riẹ. Enẹna ohwo ọkpokpọ na ọ sae niyẹrẹ iruo riẹ kugbe ima amọfa enọ e be rọ oghọghọ “woro ẹme Ọghẹnẹ.” (Iruẹru 13:5) A ve whowho kẹ ukoko na nọ ohwo na o zihe ruọ owhowho-uvie nọ ọ re họ-ame he no.

7, 8. Evaọ idhere evẹ a rẹ rọ kẹ owhowho-uvie nọ ọ re họ-ame he obufihọ evaọ odibọgba na?

⁷ Owhowho-uvie nọ ọ re họ-ame he ọ gwọlọ obufihọ ekpako na gbe Ileleikristi efa nọ i te. Wọhọ oriruo, ẹnyaharo ẹzi riẹ o rọ oja kẹ ọsẹro Uwuhrẹ Obe Ukoko utu nọ ọ rọ. O sae jọ owhowho-uvie ọkpokpọ na ẹkpẹlobọ re ọ t’ẹme ziezi evaọ iruo nuwou ruọ uwou na. (Iruẹru 20:20) Fikiere o sae were iẹe re o dede obufihọ rehọ, maero no obọ ohwo nọ ọ rehọ obe Eriariẹ na wuhrẹ iẹe iwuhrẹ Ebaibol. Obufihọ otiọye na u fo, keme Jesu Kristi ọ ruẹrẹ ilele riẹ họ kẹ odibọgba.—Mak 6:7-13; Luk 10:1-22.

⁸ Otẹrọnọ odibọgba mai u re wo ẹgba, oma nọ a rẹ kake ruẹrẹhọ ziezi o rọ oja. Fikiere, iwhowho-uvie ivẹ na a rẹ kake keria re a wuhrẹ ẹjiroro nọ a fodẹ evaọ Odibọgba Uvie Mai ọrọ amara ọyena. Nọ a te muọ usiuwoma rai họ no, owhowho-uvie nọ o kri no na ọ sae jọ unuẹthẹ ọsosuọ hayo ọrọ avivẹ muhọ. Nọ o te dhesẹ oma riẹ whẹtiẹwhẹtiẹ no, iwhowho-uvie ivẹ na a vẹ kẹ ovuẹ rai. Iruo ru kugbe evaọ odibọgba na evaọ umutho eka jọ o sai su kpohọ izihe bro iwoma je tube su kpohọ obe uwuhrẹ Ebaibol evaọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ na. Owhowho-uvie nọ o kri no na ọ rẹ sai wuhrẹ uwuhrẹ na ubroke tao ọ vẹ tẹ rehiẹe kẹ Owhowho-Uvie ọkpokpọ na. Ẹvẹ iwhowho-uvie ivẹ na a rẹ wereva te otẹrọnọ ọmọ-uwuhrẹ Ebaibol na o dhesẹ ovuhumuo kẹ eriariẹ Ọghẹnẹ!

9. Didi eruẹrẹfihọ a fihọ otẹrọnọ owhowho-uvie ọ gwọlọ họ-ame?

⁹ Nọ owhowho-uvie nọ ọ re họ-ame he na ọ be nyaharo evaọ ẹzi na, ọ rẹ sae rehọ oma mudhe kẹ Ọghẹnẹ evaọ olẹ ọ vẹ jẹ gwọlọ ame-ọhọ. (Wawo Mak 21:9-11.) O re ru ẹgwọlọ ame-ọhọ riẹ via kẹ ọsẹro ukoko na, ọnọ ọ te ruẹrẹ ekpako jọ họ re a rehọ enọ nọ e rọ ewẹre-obe avọ 175 rite 218 ọrọ Organized to Accomplish Our Ministry kiẹ kugbe owhowho-uvie na. O tẹ lọhọ ekpako esa a rẹ sae ghale abọ ene nọ enọ na e rọ fihọ akwasa. A tẹ rọwo nnọ owhowho-uvie nọ ọ re họ-ame he na o wo otoriẹ iwuhrẹ Ebaibol na ziezi no gbe nọ o te evaọ abọ efa, a rẹ ta kẹe nọ ọ sae họ-ame. Fiki omarọkẹ gbe ame-ọhọ riẹ, koyehọ a ‘kpoka’ hiẹe no kẹ esiwo.—Izikiẹl 9:4-6.

Ẹnyate Ẹgwọlọ Obọdẹ

10. Nọ o te wuhrẹ obe Eriariẹ na re no jẹ họ-ame no, ẹvẹ ohwo ọ sai ro ru eriariẹ Ikereakere riẹ viharo?

¹⁰ Nọ ohwo o te kuọ uwuhrẹ Ebaibol riẹ evaọ obe Eriariẹ na họ no gbe nọ ọ tẹ họ-ame no, u gbe fo re a ruabọhọ ewuhrẹ obe avivẹ kugbei hi, wọhọ obe United in Worship of the Only True God (Ekugbe Evaọ Egagọ Ọghẹnẹ Uzẹme Ọvo Na).b Dede, ọnọ ọ họ-ame obọ na o gbe ti wuhrẹ eware buobu evaọ omaruẹrẹhọ kẹ iwuhrẹ Ileleikristi je kpohọ ai ẹsikpobi. O re je wo eriariẹ efa nọ uruame uzẹme nọ u bi kpei na o rẹ wọe re o se je wuhrẹ ebe Ukoko na kẹ omobọ riẹ re ọ jẹ rọ eme Ikereakere na gbiku kugbe enọ a gbẹ rọ ẹrọwọ ọvo na. Rekọ ẹvẹ otẹrọnọ ẹgwọlọ obọdẹ e rọ oma via?

11. (a) Ẹvẹ Prisila avọ Akwila a ro fiobọhọ kẹ Apọlọs? (b) Didi obufihọ a sae rọ kẹ uzoge nọ ọ họ-ame obọ nọ ọ be jiroro orọo?

¹¹ Makọ Apọlọs, ọnọ ‘ọ riẹ Ikereakere na fila’ gbe ọnọ o je wuhrẹ kpahe Jesu gbagba, o wo erere nọ Prisila avọ Akwila nọ i wo eriariẹ a “rehiẹe gboma, a je dhesẹ edhere Ọghẹnẹ kẹe vevẹ vi onọ ọ riẹ vẹre.” (Iruẹru 18:24-26; wawo Iruẹru 19:1-7.) Fikiere, dae rehiẹe nọ uzoge nọ ọ họ-ame kẹle o bi roro kpahe orọo. Ileleikristi nọ i wo eriariẹ viei a rẹ sai fiobọhọ kẹe re ọ ruẹ evuẹ evaọ izoẹme enana evaọ ebe nọ Watch Tower a kporo na. Wọhọ oriruo, eme obọfihọ kpahe eme itieye na e roma via evaọ obe na Questions Young People Ask—Answers That Work, Abọ avọ 7.c Owhowho-uvie nọ o wuhrẹ uwuhrẹ Ebaibol kugbei na ọ rẹ sae rọ eme enana jiroro kugbe ohwo ọkpokpọ na, dede nọ o gwọlọ uwuhrẹ ofa ha.

12. Didi obufihọ a sae rọ kẹ imava-orọo nọ e họ-ame obọ nọ i bi wo ebẹbẹ orọo?

¹² Roro kpahe oriruo ọfa. Otiẹsejọ ọzae avọ aye uwou-orọo nọ a họ-ame obọ a te muọ ebẹbẹ họ ewo kpahe efihiruo izi Ọghẹnẹ. A rẹ sae nya bru ọkpako, ọnọ ọ rẹ sae rehọ omoke kpẹkpẹe keria t’ẹme no Ikereakere na ze kugbe ai jẹ kpọ ova rai kpohọ ovuẹ nọ a rẹ jọ ebe Ukoko na ruẹ. Ghele na, orọnikọ ọkpako na ọ te wariẹ muọ uwuhrẹ Ebaibol họ kugbe ọzae avọ aye na ha.

Nọ Ohwo Ọkpokpọ O te Ruthọ

13. Fikieme ekpako ukoko a je dhesẹ ohrọ kẹ ohwo nọ ọ họ-ame obọ nọ o ruthọ rekọ o te kurẹriẹ?

¹³ Ekpako a rẹ raro kele Othuru-Igodẹ Ologbo na, Jihova, ọnọ ọ ta nọ: “Mẹ oma mẹ ọvo ọ rẹte jọ othuru-igodẹ mẹ, . . . enọ e ko na mẹ vẹte gba eria rai nọ i wiri na, enọ oma o rọẹrọ me ve ti ru ai oma ga.” (Izikiẹl 34:15, 16; Ahwo Ẹfẹsọs 5:1) Nya lele ẹzi ọyena, Jud olele na ọ kpakpa nọ a dhesẹ ohrọ kẹ Ileleikristi nọ a kẹ ẹzi na enọ i bi dhesẹ avro hayo enọ i kie ruọ izieraha no. (Jud 22, 23) Nọ ma rẹ jọ obọ Ileleikristi nọ e kpako no gwọlọ buobu na, uzẹme u fo re a dhesẹ ohrọ kẹ ohwo nọ ọ họ-ame obọ—omogodẹ ọsese—ọnọ o ruthọ rekọ o te kurẹriẹ. (Luk 12:48; 15:1-7) Fikiere, ekpako, ‘nọ i bi bruoziẹ kẹ Jihova,’ a rẹ kẹ igodẹ itieye na ẹruọsa owowolẹ jẹ kpọ ae họ evaọ ẹzi ọ omarokpotọ.—2 Iruẹru-Ivie 19:6; Iruẹru 20:28, 29; Ahwo Galesha 6:1.d

14. Eme a re ru nọ owhowho-uvie nọ ọ họ-ame obọ ọ tẹ thuzi ulogbo jọ, kọ ẹvẹ a sai ro fiobọhọ kẹe?

¹⁴ Ma rehiẹe nọ, owhowho-uvie nọ ọ họ-ame obọ o wo ẹbẹbẹ idieda vẹre rekọ o te kie ruọ uruemu oyena ẹsiẹvo hayo isiava. Hayo ẹsejọ o wo ẹbẹbẹ ivovavovo okrẹkri vẹre nọ o fi kparobọ rekọ o te kie ruọ odawọ ọlẹlẹ vovo ẹsiẹvo hayo isiava. Dede nọ oniọvo ọkpokpọ mai ọ lẹ kẹ erọvrẹ Ọghẹnẹ no, ọ rẹ gwọlọ obufihọ ọkpako re emuemu na ọ siẹe obọ ba ẹreria. (Olezi 32:1-5; Jemis 5:14, 15) Nọ ọ tẹ fodẹ oruthọ riẹ kẹ omọvo ekpako na, ọkpako ọyena ọ rẹ daoma kpọ ohwo ọkpokpọ na vi evaọ edhere ohrọ. (Olezi 130:3) Ohrẹ Ikereakere na i re te fiobọhọ kẹe kpọ idhere riẹ vi evaọ obaro. (Ahwo Hibru 12:12, 13) Ọkpako ọnana ọ rẹ rọ eyero na t’ẹme kugbe ọsẹro ukoko na re a riẹ obufihọ ọfa nọ a rẹ sae kẹ.

15. Evaọ eyero jọ, eme a rẹ sae ru eva okenọ owhowho-uvie nọ ọ họ-ame obọ ọ tẹ thuzi?

¹⁵ Evaọ iyero efa jọ a rẹ gwọlọ vi onana. O tẹ rọ oware nọ o reria obọ no, nọ o rọ enwoma kẹ uthuru na, hayo otẹrọnọ u kpomahọ ebẹbẹ ilogbo efa jọ, ugboma ekpako na a re vi ekpako ivẹ re a kiotọ ẹme na. Otẹrọnọ ekpako na a ruẹ nọ ẹme na ọ rọ gaga te epanọ o rọ gwọlọ ogbẹgwae ẹdhọ, a rẹ niyẹrẹ onana kẹ ugboma ekpako na. Ugboma ekpako na a vẹ rehọ ogbẹgua ẹdhoguo mu re a fiobọhọ kẹ ọnọ o ru thọ na. Ogbẹgua ẹdhoguo na a rẹ rọ edhere ẹwolẹ yeri kugbei. A rẹ daoma rọ Ikereakere na kpọe họ. Ọ tẹ r’uzou kpotọ kẹ omodawọ owowolẹ ogbẹgwae ẹdhọ na, kọ a rẹ tae sọ erere jọ o rẹ jariẹ otẹrọnọ a whaha e riẹ abọ nọ o re wo evaọ eplatfọmo evaọ iwuhrẹ evaọ Ọgua Uvie na hayo sọ a rẹ kẹe uvẹ kuyo evaọ iwuhrẹ na.

16. Eme ekpako na a rẹ sai ru ro fiobọhọ kẹ ohwo nọ o ru thọ?

¹⁶ Otẹrọnọ ọnọ o ru thọ na o gbe veghe uzou hu, ọkpako ọvo hayo ivẹ nọ e keria oke ẹdhoguo na ọ rẹ ruẹrẹ họ re a ru iweze ẹruorote re a ru ẹrọwọ riẹ ga jẹ bọ ovuhumuo riẹ kẹ ute ikiẹrẹe Ọghẹnẹ. Omomọvo rai ọ sai leliei ruiruo evaọ iruẹru usiuwoma ota na noke ruoke. A rẹ sae t’ẹme kugbei no Ikereakere na ze, ẹsejọ avọ efihiruo izoẹme nọ i fo ro no Uwou-Eroro Na jegbe Awake! ze, rekọ orọnikọ obe uwuhrẹ Ebaibol ho. Avọ ẹruọsa owowolẹ otiọye na, a rẹ sae bọ ọnọ o ru thọ na ga wọso ewhrehe iwo na evaọ edẹ obaro.

17. Didi owọ a rẹ jẹ otẹrọnọ orumuomu nọ ọ họ-ame no o kurẹriẹ re o siobọ no edhere emuemu riẹ hẹ?

¹⁷ Dede, fikinọ ohwo ọ họ-ame obọ o rọ unoma nọ ọ rẹ rọ raha uzi ababọ ekurẹriẹ hẹ. (Ahwo Hibru 10:26, 27; Jud 4) Otẹrọnọ orumuomu nọ ọ họ-ame no o gbe kurẹriẹ siọ idhere imuemu riẹ ba ha, a re si ei no ukoko. (1 Ahwo Kọrint 5:6, 11-13; 2 Ahwo Tẹsalọnika 2:11, 12; 2 Jọn 9-11) Oria nọ owojẹ onana u je fo, ugboma ekpako na a rẹ salọ ogbẹgwae ẹdhọ oguo. Otẹrọnọ a si ohwo na no ukoko no, a rẹ kẹ owhowhovia okpẹkpẹ onana: “A si . . . no ukoko no.”e

Fiobọhọ kẹ Ai re A ‘te Ẹkpako’

18. Fikieme u je muomai ẹro nọ Ileleikristi nọ e họ-ame obọ gbe efa a wo eware buobu nọ a re wuhrẹ kpahe Jihova gbe oreva riẹ?

¹⁸ Ogbotu obuobu ọrọ idibo Ọghẹnẹ a te daji uthuru na. Avọ evawere, mai omomọvo ọ sai gbe si kẹle Ọsẹ obọ odhiwu mai gaga keme ma ti gbe wuhrẹ kpahe iẹe gbe oreva riẹ. (Okokahwohọ 3:11; Jemis 4:8) Idu ahwo nọ a họ-ame evaọ Pẹntikọst evaọ 33 C.E., ababọ avro eware buobu e riẹ nọ a gbe je wuhrẹ. (Iruẹru 2:5, 37-41; 4:4) Ere ahwo erẹwho Egedhọ re, enọ e kare otọhotọ Ikereakere na. Wọhọ oriruo, onana o jọ uzẹme kẹ enọ e họ-ame nọ Pọl ọ kẹ ovuẹ riẹ no eva Arẹopagọs eva Athẹns. (Iruẹru 17:33, 34) Nẹnẹ re, enọ e họ-ame obọ a wo eware buobu nọ a re wuhrẹ yọ a gwọlọ oke gbe obufihọ re a ru ọtamuo rai ga viere nnọ a re ru oware nọ u kiete eva aro Ọghẹnẹ.—Ahwo Galesha 6:9; 2 Ahwo Tẹsalọnika 3:13.

19. Ẹvẹ a sai ro fiobọhọ kẹ enọ e be họ-ame re a ‘te ẹkpako’?

¹⁹ Kukpe kukpe idu ahwo a be họ-ame yọ a gwọlọ obufihọ re a ‘te ẹkpako.’ (Ahwo Hibru 6:1-3) Ẹkwoma ẹmeunu, oriruo, gbe obufihọ evaọ odibọgba na, whọ rẹ sae fiobọhọ kẹ ejọ re a wha uruemu okpokpọ na họ re ‘a gbẹ hae nya eva uzẹme na.’ (3 Jọn 4; Ahwo Kọlọsi 3:9, 10) Whọ tẹ rọ owhowho-uvie nọ o kri gaga no, ekpako na a rẹ sae zizie owhẹ re who fiobọhọ kẹ ọnọ wha gbẹ rọ ẹrọwọ ọkpokpọ na evaọ usiuwoma ota hayo re whọ rọ eme Ikereakere jọ jiroro kugbei evaọ umutho eka jọ re whọ ruẹse bọ ẹrọwọ riẹ ga họ Ọghẹnẹ, ovuhumuo riẹ kẹ iwuhrẹ Ileleikristi, gbe efa. Usu ithuru-igodẹ kugbe uthuru na o wọhọ orọ ọsẹ evaọ ohrẹ, jẹ wọhọ ọrọ oni evaọ ẹruọsa. (1 Ahwo Tẹsalọnika 2:7, 8, 11) Ghele, umutho ekpako gbe idibo iruiruo a sae rẹro te eware kpobi nọ a gwọlọ evaọ ukoko ho. Mai kpobi wọhọ uviuwou nọ ahwo riẹ ma re fiobọhọ kẹ ohwohwo. Mai omomọvo ọ rẹ sai ru oware ro fiobọhọ kẹ enọ ma gbẹ rọ egagọ ọvo. Whẹ omara ọ rẹ sae kẹ uduotahawọ re, ta udu họ enọ e rọ ọkora, fiobọhọ kẹ enọ eko.—1 Ahwo Tẹsalọnika 5:14, 15.

20. Eme whọ sai ru rọ vaha eriariẹ Ọghẹnẹ jẹ rọ ẹruọsa owowolẹ kẹ igodẹ uthuru Jihova?

²⁰ Ohwo-akpọ ọ gwọlọ eriariẹ Ọghẹnẹ, yọ wọhọ Osẹri Jihova, whọ rẹ sae ghọghọ evaọ ẹvaha riẹ. Igodẹ Jihova a gwọlọ ẹruọsa owowolẹ, yọ whọ rẹ sai ru ẹkẹ abọ oyoyou ra evaọ obufihọ ẹwha tha onana. Jọ Jihova ọ ghale odibọgba ra, jọ ọ hwosa k’owhẹ evaọ omodawọ ra nọ who bi ro fiobọhọ kẹ igodẹ uthuru riẹ.

[Footnotes]

Ẹvẹ Whọ Te k’Uyo?

◻ Ẹvẹ Jihova o re ru igodẹ riẹ?

◻ Eme a re ru okenọ ohwo ọkpokpọ ọ gwọlọ ta usiuwoma?

◻ Ẹvẹ ibe enọ e rọwo a re ro fiobọhọ kẹ ahwo ọkpokpọ nọ i wo ẹgwọlọ obọdẹ?

◻ Didi obufihọ ekpako a rẹ sae kẹ enọ i ruthọ nọ i kurẹriẹ?

◻ Ẹvẹ whọ sai ro fiobọhọ kẹ ohwo nọ ọ họ-ame obọ re ọ ‘ọkpako’?

[Box on page 13]

Omosasọ kẹ Enọ I wo Ẹgwọlọ

A HWO buobu a t’ẹme kpahe oghẹrẹ nọ izoeme jọ evaọ Uwou-Eroro hayo Awake! e lẹliẹ usu rai diwi kugbe Jihova gaga no. Enẹ ọvo rai jọ ọ ta: “Nọ me se uzoẹme onana no, o tẹ jọ omẹ oma nọ Jihova avọ ẹgba gbe oruaro riẹ kpobi a rọ etẹe kugbe omẹ. O j’omẹ oma nọ ohwo dẹẹ ọ rọ.” Ileta ọfa o ta nọ: “Eriwo idu gbe iroro mai i nwene gaga no kpahe Jihova te epanọ ma gbẹ rọ ohwo ọvo na ha. O wọhọ nọ ohwo jọ o ririe ẹno ibiaro mai vevẹ no, enẹna ma tẹ be ruẹ eware kpobi vevẹ.”

Ahwo jọ a kere kpahe epanọ emagazini na i fiobọhọ kẹ ai no kpọ ebẹbẹ hayo use-abọ jọ vi, nọ o rọ ere kẹ ai imuẹro nọ Jihova o wo isiuru kpahe ae. Enẹ ohwo jọ nọ o re se ebe o fi rie họ: “Me yere owhai ziezi nọ wha rọ wariẹ ru omai ruẹ epanọ Jihova o wo ẹruọsa je you ahwo riẹ te.” Aye obọ Japan jọ nọ ọmọ o whu ku ọ ta enẹ kpahe uzoẹme Awake! jọ kpahe uwhu: “Edidi ohrọ Ọghẹnẹ u hwẹ no ewẹre-ebe riẹ ze, me te je dhe ẹviẹviẹ. Me fi izoeme na họ oria nọ me re jo dhe obọ te ai vẹrẹ nọ oma o tẹ rọ omẹ goli avọ ọkora.” Aye ọfa jọ nọ ọ rọ uweri o kere nọ: “Izoeme Uwou-Eroro Na avọ Awake! gbe broshọ na Okenọ Ohwo nọ Who You O te Whu e k’omẹ ẹgba nọ mẹ gwọlọ no re mẹ ruẹse thihakọ oke uweri mẹ.”

Ikereakere Efuafo na eye họ ehri ọsosuọ ọrọ omosasọ. (Ahwo Rom 15:4) Uwou-Eroro Na ọ rẹ rọwo kugbe Ebaibol na wọhọ udu riẹ, yọ ere emagazini ọrivẹ riẹ na, Awake!, ọ rọ re. Fiki onana, ebe enana i dhesẹ oma rai via no wọhọ omosasọ gbe uduotahawọ kẹ enọ i bi se ai.

[Picture on page 9]

A riẹ Charles T. Russell ziezi wọhọ othuru-igodẹ oyoyou uthuru na

[Picture on page 11]

Ithuru-igodẹ ẹruọdawẹ a rẹ rọ ẹwolẹ yeri kugbe uthuru Ọghẹnẹ