Yare Obufihọ
1 Ẹme nọ a kẹ ẹgba ro kere na “ẹbẹbẹ” ọ nwani kiehọ etoke ọbẹbẹ mai na gaga. (2 Tim. 3:1) Fikiere, eme whọ rẹ sai ru evaọ okenọ whọ tẹ nyaku use-abọ ogaga abọ-ẹzi nọ whọ jọ roro nọ whọ kare omathọvẹre nọ whọ rẹ rọ rẹriẹ ovao dhe ei?
2 Kọ u no owhẹ eva ze re whọ t’ẹme kẹ omọvo ukoko na jọ nọ ọ kpako ziezi evaọ abọ-ẹzi? Ahwo jọ a rẹ sai sienẹ h’emu re a ru ere fikinọ oma o te vo ae, a gwọlọ do oma họ ohwo ho, hayo a be vro nọ ohwo jọ ọ sai ghine fiobọhọ. Uzẹme, ma rẹ daoma re ma rẹrote ewha-iruo omobọ mai te epanọ ẹgba mai o mu, rekọ u fo re ma rehọ eva ivevẹ yare obufihọ evaọ eme nọ i kpomahọ ewoma abọ-ẹzi mai.—Gal. 6:2 5.
3 Oria nọ A rẹ Jọ Muhọ: Whọ rẹ sae nya bru owuhrẹ ọ uwuhrẹ obe ukoko ra re whọ nọe sọ whọ sai lele iei kpohọ usiuwoma ota. Onana o rẹ k’owhẹ uvẹ nọ whọ rẹ rọ ta kẹe kpahe ẹgwọlọ ra re whọ rro evaọ abọ-ẹzi. Ọ tẹ rọ odibo oruiruo, vuẹe kpahe ẹgwọlọ ra kẹ obufihọ abọ-ẹzi, ọ te ta kẹ ekpako ukoko na re a fiobọhọ k’owhẹ. Hayo whọ rẹ sae nya bru ọkpako ukoko kpobi kpahe eme ọ ọdawẹ ra.
4 Didi oghẹrẹ obufihọ whọ gwọlọ? Kọ oware jọ u whrehe ọwhọ ra no? Kọ whẹ yọ ọyewọ ọvo nọ ọ be daoma ru re emọ riẹ i sikẹle ukoko na? Kọ whẹ yọ ohwo nọ ọ kpako no nọ ọ gwọlọ obufihọ? Hayo kọ ẹbẹbẹ jọ o bi whrehe owhẹ? Re a yeri kugbe etoke ọbẹbẹ mai na o rẹ sae jọ gaga—rekọ o rrọ oware nọ a rẹ sai ru hu hu. Obufihọ o riẹ.
5 Epanọ Ekpako A re Ro Fiobọhọ: Ekpako ukoko a rẹ sẹro ziezi. A te kezọ kẹ ọdawẹ ra. Otẹrọnọ iwhowho-uvie efa a rẹriẹ aro dhe oghẹrẹ ezadhe evo na, ekpako ukoko na a re fi onana h’iroro evaọ okenọ a te bi ru iweze ẹruọsa je bi wuhrẹ evaọ ukoko na. Wọhọ “oriruo kẹ uthuru na,” a ruẹrẹ oma họ re a lele owhẹ ruiruo avọ oghọghọ. (1 Pita 5:3) Ezọgaviẹ kẹ inievo ona enana nọ a tẹ be kẹ iroro-ejẹ kpahe ehri-izi Ebaibol o rẹ sai ru odibọgba ra wo ẹnyaharo je fiobọhọ k’owhẹ evaọ uzuazọ ra.—2 Tim. 3:16, 17.
6 Jesu ọ k’omai ‘ekẹ ahwo’ buobu. (Ẹf 4:8) Onana u dhesẹ nnọ ekpako ukoko na a rrọ etẹe k’owhẹ. A rrọ kẹ obọ nọ a re fihọ k’owhẹ. Koyehọ, “wha wo” rai. (1 Kọr. 3:21-23, NW) Fikiere ukpenọ who sienẹ h’emu, ta eva ra via. Yare obufihọ nọ whọ gwọlọ.