Rọ Aro Kele Owuhrẹ Ologbo na nọ Whọ Tẹ Be Rehọ Obe Ebaibol Wuhrẹ na Ruiruo
1. Ona vẹ Jesu o je ro wuhrẹ ahwo?
1 Owuhrẹ Ologbo na, Jesu, ọ jẹ rọ eme nọ e rrọ lọlọhọ jẹ rrọ vevẹ ro wuhrẹ ahwo ẹsikpobi. Re ọ lẹliẹ ahwo nọ a be kezọ kẹe roro, ọ rẹ nọ ae ẹsejọ re a ta eriwo rai. (Mat. 17:24-27) Ọ kpọ iroro ahwo kpohọ Ebaibol na. (Mat. 26:31; Mak 7:6) Ọ jẹ yọrọ oma re ọ siọ eme ibuobu ba ero reghe ilele riẹ, keme ọ riẹ nọ ilele riẹ a ti wuhrẹ eware buobu nọ oke o be nyaharo na. (Jọn 16:12) O jọ isiuru riẹ re ọ riẹ sọ ilele riẹ a rọwo, je bi wo otoriẹ eware nọ o bi wuhrẹ ai. (Mat. 13:51) A kere obe Ebaibol Wuhrẹ na re u fiobọhọ k’omai wuhrẹ evaọ edhere otiọye.
2. Oghẹrẹ vẹ ma sae rọ rehọ enọ emuhọ nọ e rrọ uzou kpobi na ruiruo?
2 Enọ Emuhọ: Nọ wha te bi mu uzoẹme họ ewuhrẹ, u re fo re whọ nọ enọ emuhọ nọ e rrọ otọ uzoẹme na. Nọ enọ na rọ kpare isiuru ọmọ-uwuhrẹ na ababọ uyo nọ who re rẹro riẹ mi ọmọ-uwuhrẹ na. Hayo whọ sae ta kẹe re ọ kpahe ẹme kpẹkpẹe fihọ enọ na. U du fo ho re whọ tẹme thethei kpahe uyo nọ ọ kẹ hayo kpọ ẹme ọthọthọ kpobi nọ ọ ta vi. Yere iei kẹ ẹme nọ ọ ta re wha mu uwuhrẹ na họ. Uyo nọ ọ kẹ kpahe enọ emuhọ na u ti fiobọhọ k’owhẹ riẹ abọ nọ o mae gwọlọ nọ who fiẹgba họ evaọ uwuhrẹ na.
3. Ẹvẹ ma sai ro ru uwuhrẹ na evaọ edhere ọlọlọhọ?
3 Ikereakere: Kpọ uwuhrẹ na rri Ikereakere na. (Hib. 4:12) Rekọ, u du gwọlọ nọ wha re se ikere nọ a fodẹ na kpobi hi. Fiẹgba họ Ikereakere nọ e mai duobọte ugogo oware nọ wha bi wuhrẹ na. O nwane roja ha re wha se Ikereakere nọ e kẹ evuẹ efa nọ i wobọ kugbe ẹme na. Obe Ebaibol Wuhrẹ na u dhesẹ uzẹme na vẹ evaọ oghẹrẹ nọ a re ro wo otoriẹ riẹ vevẹ. Ru uwuhrẹ na lọhọ. Tọ ẹro vi igogo-eme na, re whọ jẹ whaha eme ibuobu eta hayo eme efa nọ i kiekpahe ẹme na ha nọ whọ rẹ rọ ze.
4. Eme o re fiobọhọ k’omai riẹ sọ ma rẹ jọ etoke uwuhrẹ na rovie kpohọ oria eme-ofiba na je sei?
4 Eme-Ofiba: Abọ eme-ofiba na u wo izoẹme 14 nọ e kẹ evuẹ efa kpahe oware nọ a bi wuhrẹ na. U te j’owhẹ, wha sae jọ etoke uwuhrẹ na ta kpahe ai. Rọ kpahe izoẹme jọ, whọ sae ta kẹ ọmọ-uwuhrẹ ra re o se eme-ofiba na kẹ omobọ riẹ otẹrọnọ ọ rọwo je wo otoriẹ oware nọ wha jọ uzoẹme na wuhrẹ. Wọhọ oriruo, otẹrọnọ wha bi wuhrẹ uzou avọ 4 nọ o ta nọ “Ono Họ Jesu Kristi?” yọ ọmọ-uwuhrẹ na ọ rọwo inọ Jesu họ Mesaya na, o gbẹ nwane roja ha re wha nyai se oria eme-ofiba nọ u wo uzoẹme na “Jesu Kristi—Mesaya nọ A Ya Eyaa Riẹ Na.” Evaọ iyero efa, o sai kiehọ re wha jọ etoke uwuhrẹ na rovie kpohọ oria eme-ofiba na re wha se jẹ ta ẹme kpahe iẹe.
5. Otẹrọnọ ma salọ nọ ma bi se oria eme-ofiba na, ẹvẹ ma re ru ei?
5 Otẹrọnọ whọ salọ nọ wha tẹme kpahe oria eme-ofiba na, whọ sae ruẹrẹ enọ kpahotọ, wha ve se idhe-eme na jẹ nọ enọ ra na wọhọ epanọ wha be hai ro wuhrẹ idhe-eme obe na nọ i wo enọ na. Hayo whọ sae jọ etoke uwuhrẹ na rehọ umutho iminiti jọ rọ kiẹ ovuẹ na kugbei wọhọ epanọ otoriẹ ọmọ-uwuhrẹ na o rrọ. Oyena u ti fiobọhọ k’owhẹ riẹ sọ o wo otoriẹ oware nọ o se kẹ omobọ riẹ na.
6. Evaọ ekuhọ uwuhrẹ kpobi, ẹvẹ a rẹ sae rehọ ẹkpẹti ọkiẹriwo na ruiruo riwi?
6 Ẹkpẹti Ọkiẹriwo: Ẹkpẹti nọ ọ rrọ obọ oka uzou kpobi na o wo iyo kẹ enọ nọ e rrọ obọ emuhọ uzou na. Whọ sae rọ eme ẹkpẹti na kiẹ igogo-eme uzou na riwi. Iwhowho-uvie jọ a re se eme na gbe ikere nọ i lele i rie na kugbe ọmọ-uwuhrẹ na keme a ruẹ nọ ere oruo u bi fiobọhọ. Kẹsena a vẹ nọ ọmọ-uwuhrẹ na re ọ ta epanọ ikere na e rọ tha ẹme na uke. Onana o rẹ lẹliẹ owuhrẹ na riẹ sọ ọmọ-uwuhrẹ na o wo otoriẹ igogo-eme uwuhrẹ na gbe epanọ ikere na e rọ tha eme na uke, jegbe sọ ọmọ-uwuhrẹ na ọ rọwo oware nọ o wuhrẹ na. U re je wuhrẹ ọmọ-uwuhrẹ na epanọ ọ rẹ rọ rehọ Ebaibol na wuhrẹ amọfa uzẹme na.
7. Ẹvẹ ma sae rọ rehọ obe Ebaibol Wuhrẹ na nya uwou nọ a vi omai na gba?
7 Edhere nọ ọ mai kiehọ nọ ma rẹ rọ nya uwou nọ a vi omai re ma wuhrẹ ahwo je ru ilele na gba họ, ma rẹ rọ aro kele oriruo nọ Jesu o je ro wuhrẹ ahwo. (Mat. 28:19, 20) Obe Ebaibol Wuhrẹ na u re fiobọhọ k’omai ru ere. Rehọ iẹe ruiruo ziezi ro wuhrẹ amọfa uzẹme na evaọ edhere ọlọlọhọ, nọ ọ rrọ vevẹ je siuru.