Obufihọ Evaọ Ẹruoke
1 Okenọ Pita ukọ na ọ ruẹ ẹgwọlọ nọ ọ rẹ rọ bọ ibe enọ e rọwo ga, ọdawẹ ọ wọ riẹ nọ ọ rọ kẹ ai ekareghẹhọ oyoyou gbe uduotahawọ. (2 Pita 1:12, 13; 3:1) Ọ tuduhọ ‘enọ i wo uvi ẹrọwọ’ re a gbẹ rro haro evaọ iruemu abọ-ẹzi nọ a gbẹ jọ ‘eyẹlẹ hayo ababọ ubi eva ẹriẹ Jesu Kristi Ọnowo mai hi.’ (2 Pita 1:1, 5-8) Ẹjiroro Pita họ re o fi obọ họ kẹ ae ru use gbe ẹsalọ rai nọ o no obọ Jihova ze na muẹro, re a ruẹse jọ “ababọ epe hayo afuẹwẹ, rekọ [evaọ] udhedhẹ.” (2 Pita 1:10, 11; 3:14) Rọkẹ ibuobu, uduotahawọ riẹ o nwane jọ obufihọ ẹruoke.
2 Nẹnẹ, esẹro Ileleikristi a wo oghẹrẹ ọdawẹ ọvona kẹ ahwo Ọghẹnẹ. Evaọ “edẹ urere oke ẹbẹbẹ” nana, idibo Jihova buobu a re lele uyero edawọ muabọ hrọ. (2 Tim. 3:1) Fiki ebẹbẹ ugho, erọ uviuwou, hayo erọ omobọ ohwo nọ a wo, ahwo jọ a rẹ sai roro wọhọ Devidi: “Eware iyoma nọ i wo unu hu i komẹ họ; eyoma mẹ o hrẹnyẹ omẹ, fikiere mẹ be sae ruẹ ude he; i bu vi eto uzou mẹ; uwhu mẹ rọ na.” (Ol. 40:12) Itunyẹ nana e rẹ sae rro te epanọ oghẹrẹ ahwo otiọye na a re ro gbabọkẹ ewha-iruo abọ-ẹzi nọ e r’oja jẹ siọ abọ ba ewo evaọ odibọgba Oleleikristi na. Dede na, ghelọ ebẹbẹ rai, ‘izi Jihova e re thọrọ ai ẹro ho.’ (Ol. 119:176) Enẹna họ uzedhe oke nọ ekpako na e rẹ rọ kẹ ahwo otiọye na uketha nọ a gwọlọ.—Aiz. 32:1, 2.
3 Re a sai ru ẹgwọlọ nana gba, a ta udu họ ekpako na awọ nọ a daoma gaga re a fi obọ họ kẹ ahwo nọ a siọ iruo usiuwoma ota ba no. Omodawọ ogaga re a sai ru onana o be nyaharo enẹna yọ o te nyaharo te urere amara March. A ta kẹ esẹro uwuhrẹ obe ukoko re a hai weze bru ahwo nọ a si uke kpemu no evaọ iruẹru ukoko re a kẹ ae uketha abọ-ẹzi avọ ẹjiroro obọ nọ a re fihọ kẹ ae re a wariẹ muọ abọ họ ewo evaọ iruẹru ukoko. Ẹgwọlọ ọ tẹ riẹ, a rẹ sai ru ọruẹrẹfihotọ re a ru uwuhrẹ Ebaibol kugbe ohwo na. A rẹ sae ta kẹ amọfa re a fi obọ họ. Otẹrọnọ a ta k’owhẹ nọ who fi obọ họ, omodawọ ra o te wha erere ze gaga, maero otẹrọnọ whọ kẹ uduotahawọ evaọ edhere ẹwo, avọ otoriẹ.
4 O rrọ oware nọ ahwo kpobi a rẹ rọ ghọghọ evaọ okenọ ohwo jọ ọ tẹ wariẹ muọ abọ họ ewo evaọ iruo kugbe ukoko na. (Luk 15:6) Omodawọ mai re ma ta udu họ enọ e siọ iruo Uvie ba no o sae ghinẹ jọ “ẹme nọ a ta evaọ ẹruoke riẹ.”—Itẹ 25:11, NW.