Wo Ovuhumuo kẹ Ọruẹrẹfihotọ Jihova nọ Ọ rọ Gwọlọ Fiobọhọ k’Owhẹ Riẹ Epanọ A re Se Je Kere
1 Eklase ọriẹse-gbe-ọriẹkere nọ a rẹ jọ ikoko ru na yọ abọjọ Isukulu Odibọgba Esuo-Ọghẹnẹ. A ruẹrẹ eklase na họ re u fiobọhọ kẹ iwhowho-uvie gbe ahwo nọ a bi kurẹriẹ ze ukoko na obọ nọ e riẹ obe ese he re a riẹ se jẹ riẹ kere. Evaọ Nigeria, idu ahwo buobu a rehọ oma kẹ ọruẹrẹfihotọ nana no, yọ a riẹ ese ziezi no jẹ be sai wuhrẹ amọfa Ẹme Ọghẹnẹ ziezi. Otẹrọnọ whọ riẹ ese gbe ekere he, yọ eklase ọriẹse-gbe-ọriẹkere e rrọ ukoko rai, kọ who ti dhesẹ ovuhumuo kẹ ọruẹrẹfihotọ nana? Ẹvẹ ma sai ro ru ere?
2 Fi Odẹ h’Otọ jẹ Roma kẹ Uwuhrẹ Na: Otẹrọnọ whọ sai se je kere he, fi odẹ h’otọ evaọ eklase ọriẹse-gbe-ọriẹkere na. Whọ kuvẹ re omovuọ hayo omorro e whaha owhẹ ere oruo ho. (Wawo 2 Ivie 5:10-14.) Nọ who te fi odẹ h’otọ no, jọ ọmọ-uwuhrẹ nọ o se isukulu na gboja ziezi. (Itẹ 21:5) Onana o gwọlọ nọ who re te eklase na evaọ ẹruoke, gaviezọ ziezi nọ a te bi wuhrẹ, je wo ajọwha wọhọ ọmọ-uwuhrẹ. O tẹ jẹ gwọlọ nọ who re ru iruo eklase nọ a k’owhẹ nọ who ru no obọ uwou ze—je dhe eware nọ a wuhrẹ owhẹ esese taure ẹdẹ eklase ọfa o te ti te. Enana yọ idhere jọ nọ who re ro dhesẹ ovuhumuo kẹ ọruẹrẹfihotọ Jihova ọrọ eklase ọriẹse-gbe-ọriẹkere na.
3 Wo Ekwakwa Uwuhrẹ na Kpobi Gba: U fo re ọmọ-uwuhrẹ o wo ekwakwa uwuhrẹ. Fikiere, who re kpohọ eklase na ẹsikpobi avọ ekwakwa uwuhrẹ nọ i fo nọ whọ rẹ wha lele oma—Ebaibol, obe ọ How to Read and Write, obe nọ who re kere fihọ, gbe ugbẹ-ame hayo ugbẹ-oyaya. Nọ who te wo ekwakwa isukulu na gba, who ti wo erere no ọruẹrẹfihotọ na ze ziezi. U ti je dhesẹ nọ who wo ovuhumuo kẹ ọruẹrẹfihotọ Jihova.
4 Jọ Ẹjiroro Uwuhrẹ na Ọ Thọrọ Owhẹ Ẹro Ho: N’otọ avọ otọ ze, Jihova ọ gwọlọ nọ idibo riẹ kpobi e riẹ se jẹ riẹ kere ziezi, re a sai wo erere vọvọ no Ẹme riẹ ze. (Jos. 1:8; Izie. 6:8, 9; 17:18, 19) Fikiere, ugogo ẹjiroro ra nọ who bi ro fi odẹ h’otọ evaọ isukulu ọriẹse-gbe-ọriẹkere na họ re whọ riẹ epanọ who re ro se jẹ fotọ Ẹme Ọghẹnẹ gbagba, vevẹ, re u fiobọhọ k’owhẹ nyaharo evaọ abọ-ẹzi, jẹ sai fiobọhọ kẹ amọfa wo otoriẹ ovuẹ Uvie na. Eware nana nọ who re wo họ iroro i ti fiobọhọ k’owhẹ thihakọ use-abọ nọ e rrọ ewuhrẹ ẹriẹse-gbe-ẹriẹkere na.
5 Hae Mọ Ibi Uvie Na: Jihova avọ Ọmọ riẹ a gwọlọ nọ ma wo ẹnyaharo evaọ ẹmọ ibi Uvie na. (Jọn 15:8) Rekọ re ohwo ọ sai wo obokparọ evaọ ere oruo o roja re ohwo ọ riẹ se jẹ riẹ kere. Dai rri oware nana nọ o via na: Oniọvo-ọmọzae jọ nọ ọ riẹ obe ese he o kpohọ usiuwoma ota nuwou ruọ uwou evaọ ẹdẹ ọsosuọ. Ohwo ichọche Protẹstant jọ nọ ọ ruẹ nọ oniọvo na ọ riẹ obe ese he ọ tẹ ta kẹe nọ: ‘Who gbe te oria nọ mẹ rrọ te ta usiuwoma ha bẹsenọ whọ rẹ riẹ obe ese no.’ Dede nọ owhowho-uvie ọkpokpọ na ọ jẹ gwọlọ gbẹ tẹme kẹ ọzae na, ọ jẹ gaviezọ kẹe he, ọ tẹ wariẹ ta kẹ oniọvo na inọ ohwo nọ ọ riẹ obe ese he ọ rẹ sai wuhrẹ omọfa oware ovo ho. Onana o tẹ lẹliẹ oniọvo na gbaemu inọ ọ rẹ daoma riẹ epanọ a re se obe jẹ riẹ kere. O te mu eklase ọriẹse-gbe-ọriẹkere na họ ekpọhọ, yọ ọ jọ etẹ serihọ họ, o je wuhrẹ kẹ omobọ riẹ re kẹdẹ kẹdẹ evaọ eka ezeza. Oria kpobi nọ ọ nya, ọ rẹ wha ebe riẹ lele oma, ọ vẹ nọ ahwo nọ a riẹ obe ese re a dhesẹ oghẹrẹ nọ a re se eme jọ rọ kẹe. Eme o no rie ze? Nọ eka ezeza e vrẹ no, o te kpohọ usiuwoma jẹ wariẹ zihe bru ọzae nọ ọ se nọ ọ rẹ kezọ kẹe he evaọ oke ọsosuọ nọ o ro mu usiuwoma ota họ na. Nọ ohwo ichọche Protẹstant na ọ ruẹ nọ owhowho-uvie nọ ọ riẹ obe ese vẹre he na ọ be sai se Ebaibol na kẹe, orọnikọ onana u gbei unu ọvo ho, rekọ o te dhesẹ isiuru kpahe oware nọ owhowho-uvie na ọ jẹ ta. Epanọ a rẹ riẹ se je kere nọ ohwo o re wuhrẹ, jẹ rehọ eriariẹ na wuhrẹ amọfa uzẹme na yọ emamọ edhere nọ ohwo o re ro dhesẹ ovuhumuo kẹ ọruẹrẹfihotọ Jihova.—Mat. 24:14; 28:19, 20; Jọn 8:32; 17:3.
6 Jọ Ozọ U Mu Owhẹ Hẹ: Nẹnẹ, ozọ u bi mu ekpako buobu re a fi odẹ h’otọ evaọ eklase ọriẹse-gbe-ọriẹkere na, yọ o wọhọ nọ ejọ nọ i fi odẹ rai h’otọ a rọwo ho inọ a te riẹ-se jẹ riẹ-kere ẹdẹjọ. Rekọ, nọ who te fi ẹrọwọ họ eme Jesu nọ e rrọ Matiu 17:20 na, whọ sai fi ẹbẹbẹ nana nọ who roro nọ ọ rẹ ruaro na kparobọ. Fikiere, fi iroro ra kpobi họ oware nọ who bi wuhrẹ evaọ eklase ọriẹse-gbe-ọriẹkere na. Rọ oma kpobi kẹ isukulu na. Jihova o ti muẹrohọ oma nọ whọ be ginẹ dawo re whọ riẹ-se jẹ riẹ-kere, yọ ọ te ghale omodawọ ra re. Oniọvo-ọmọzae jọ nọ ọ riẹ ese gbe ekere vẹre he nọ ọ jọ ukoko riẹ fi odẹ h’otọ evaọ eklase ọriẹse-gbe-ọriẹkere na o wo ẹnyaharo te epanọ o ro zihe ruọ ohwo nọ ọ jẹ jọ eklase ọriẹse-gbe-ọriẹkere na wuhrẹ ahwo evaọ ukoko riẹ! Uzẹme o rrọ, “eware kpobi e rẹ lọlọhọ eva obọ Ọghẹnẹ.” (Mat. 19:26) Who te fievahọ Jihova jẹ daoma ziezi, ẹsejọhọ who ti zihe ruọ omọvo ahwo nọ a dhesẹ ovuhumuo kẹ ọruẹrẹfihotọ Jihova no ọrọ eklase ọriẹse-gbe-ọriẹkere na, nọ e be sai se je kere enẹna.