Iwhowhovia

◼ Ebe nọ a ti fihọ ada evaọ August: A rẹ sai fi ibroshọ ewẹ-obe 32 enana jọ họ ada: Edhere nọ O Re Su Kpohọ Uzuazọ Ebẹdẹ Bẹdẹ—Kọ Who Duku Ei No?, Egọmeti Nọ Ọ te Rehọ Aparadase Tha, Eme Họ Ẹjiroro Uzuazọ—Ẹvẹ Whọ Sai Ro Duku Ei? Eme Ọ rẹ Via k’Omai Okenọ Ma te Whu?, Isẹri Jihova—Oghẹrẹ Ahwo Vẹ A Rrọ? Eme A Rọwo? Izi Ahwo nọ Ahwuno—Kọ E Rẹ Sai Fiobọhọ K’owhẹ Manikọ E Rẹ Nwa Owhẹ Oma? Kọ Eghinẹ Rọ?, Kọ Ọghẹnẹ Ọ Be Ghinẹ Daezọ Mai?, Okenọ Ohwo nọ Who You O te whu, Reawere Uzuazọ Otọakpọ Bẹdẹ Bẹdẹ!, “Rri! Me Bi Ru Eware Kpobi Fihọ Ekpokpọ,” Wha Hai Rroro!, gbe Whọ Rẹ Sae Jọ Ogbẹnyusu Ọghẹnẹ. September: Ma ti fi obe ọ Eme Ebaibol na O Gine Wuhrẹ? họ ada. Ma rẹ daoma gaga re ma to obe-uwuhrẹ Ebaibol họ evaọ iweze ọsosuọ. Otẹrọnọ ahwo nọ ma gwọlọ fi ei họ ada kẹ na a wo obe nana no vẹre, dhesẹ kẹ ae epanọ a sai ro wo erere no obe na ze ẹkwoma oghẹrẹ nọ a re ro wuhrẹ obe na nọ whọ rẹ rehọ omoke jọ dhesẹ kẹ ae. October: Fi emagazini Uwou-Eroro Na gbe Awake! họ ada. Nọ ohwo jọ o te dhesẹ isiuru, rehọ omobe-ovẹvẹ na Kọ Whọ Gwọlọ Riẹ Kpahe Ebaibol na Viere? rọ kẹe jẹ tẹme kpahe iẹe, avọ ẹjiroro ẹtohọ obe-uwuhrẹ Ebaibol.

◼ Nọ amara ọ September o wo urere-oka isoi na, o te jọ obọdẹ amara nọ a re ro ru ọkobaro obufihọ.

◼ Ma be kareghẹhọ ekpako ukoko nnọ a nya lele ekpọvio nọ a kẹ evaọ ẹwẹ-obe avọ 21-23 ọrọ Uwou-Eroro ọ April 15, 1991 (ọrọ Oyibo), kpahe ohwo kpobi nọ a sino ukoko hayo ọnọ o si oma kpemu nọ ọ gwọlọ zihe ze.

◼ Onọ jọ o roma via no sọ u woma re a jọ evaọ Ọgwa Uvie hayo ighẹ Ọgwa Uvie na ghọ ahwo nọ a ziọ ehaa orọo. Ọgwa Uvie ọ rrọ oria nọ a jẹ ghọ ahwo nọ a ziọ ehaa orọo ho, keme onana u re si ọghọ noi wọhọ oria egagọ. Uwou-Eroro ọ September 15, 1956 (ọrọ Oyibo), ẹwẹ-obe avọ 571, edhe-ẹme avọ 12, o ta nọ: “A rẹ sae jọ Ọgwa Uvie ru ehaa orọo evaọ oke-kpobi thakpinọ onana u re kpomahọ iwuhrẹ hayo iruẹru abọ-ẹzi efa nọ a te jọ Ọgwa Uvie na ru hu. A rẹ rọ Ọgwa Uvie na ru oria nọ a jẹ ghọ ahwo nọ a ziọ ehaa orọo vievie he.” Ugboma ekpako na a rẹ kuvẹ vievie he re a jọ eva Ọgwa Uvie na hayo ighẹ na ghọ ahwo nọ a ziọ ehaa orọo. Obe ọ A Koko Omai Họ re Ma Ru Oreva Jihova, ẹwẹ-obe avọ 120-123, u dhesẹ eware nọ a rẹ sae jọ Ọgwa Uvie na ru, gbe epanọ a sae rọ rehọ ẹro tei.