Ezi Ekareghẹhọ na—Oke Iruo Buobu
1 Ahwo Izrẹl anwae a jẹ hai ru ‘ehaa ỌNOWO na’ evaọ etoke sa-sa eva ẹgbukpe. (Izerẹ 23:2) Eroro kpahe ewoma nọ Ọghẹnẹ rai o ru kẹ ae no evaọ etoke yena o wha oghọghọ ulogbo se ai, yọ oma o wọ rai re a wo ajọwha kẹ egagọ efuafo.—2 Irv. 30:21–31:2.
2 Evaọ oke mai na, iruẹru ukoko nọ ma rẹ rehọ evawere ru i re vihọ kukpe kukpe evaọ ezi Ekareghẹhọ na. Oke yena yọ oke nọ ma re ro roro didi kpahe okẹ ọvọvẹ nọ Jihova ọ rọ kẹ omai—Ọmọ ọvo riẹ na. (Jọn 3:16; 1 Pita 1:18, 19) Nọ ma bi roro kpahe uyoyou nọ Ọghẹnẹ avọ Ọmọ riẹ a dhesẹ na, oma o rẹ wọ omai jiri Jihova jẹ dao ẹgba mai evaọ eruo oreva riẹ.—2 Kọr. 5:14, 15.
3 Enukpe nana, a ti ru ehaa Emu Owọwọ Olori na evaọ Edene-Oka, March 24, nọ ọre o te kie diwi no. Ẹvẹ ma sai ro ru odibọgba mai kẹre evaọ amara ọ March, April, gbe May na?
4 Ẹnyate Ahwo Buobu Oma: Gwọlọ idhere nọ whọ sae rọ nyate ahwo buobu oma te epanọ o rẹ lọhọ te kpobi nọ who te kpohọ usiuwoma ota. Kọ whọ sae ma omaa re who wobọ evaọ usiuwoma ota no-ẹthẹ-ruọ-ẹthẹ evaọ okenọ ahwo buobu a rẹ mae jọ uwou, wọhọ oke owọwọ? Otẹrọnọ iwhowho-uvie jọ evaọ utu uwuhrẹ obe ukoko rai a rẹ gwọlọ kpohọ usiuwoma ota eva ẹdẹ obe uwuhrẹ ukoko na taure oke uwuhrẹ na u te ti te, ọsẹro utu na ọ rẹ sai ru ọruẹrẹfihotọ re a rehọ umutho oke jọ ro ru uwuhrẹ kẹ usiuwoma ota, a ve ru ẹkwotọ ekẹloma.
5 Edhere ọfa nọ a rẹ rọ nyate ahwo buobu oma họ ẹkwoma usiuwoma nọ a rẹ ta evaọ eria ẹgbede. Oniọvo-ọmọtẹ jọ evaọ Japan ọ gwọlọ nọ o re ru ọkobaro obufihọ dede nọ o wo iruo nọ ọ be hai ru okikpo. Ọkpako ukoko jọ ọ tẹ jiroro kẹe inọ taure o te ti kpohọ iruo kẹdẹ kẹdẹ, ọ sai se isẹri evaọ iyẹrẹ kẹle oria jọ nọ itreni e rẹ kpahe. Nọ o si ozodhẹ no ẹro no jẹ kpairoro vrẹ ẹkoko nọ ahwo jọ nọ a be ro itreni a re sei no, o te ru ejẹ emagazini 40. Ahwo nọ a be ro itreni na, iruiruo nọ e rrọ oria nọ itreni e rẹ kpahe na, gbe amọfa nọ a wo iwou-eki kẹle oria nọ itreni e rẹ kpahe na a rrọ usu ahwo 40 na. A tẹ ghale emagazini nọ o fihọ ada evaọ etoke na kpobi, erọ amara ọvo i bu te 235. Ẹkwoma Ikereakere na nọ ọ jẹ rọ t’ẹme kugbe ahwo evaọ umutho oke jọ kẹdẹ kẹdẹ, ọ sae to ebe-iwuhrẹ Ebaibol ezeza họ.
6 Uvẹ nọ A re ro Se Isẹri: Iwhowho-uvie buobu nọ e rrọ emọ-isukulu a wo etoke sa-sa nọ a re ro kpohọ ehọlide evaọ ukpe. Etoke nana e sae jọ obọdẹ uvẹ nọ a re ro ru ọkobaro obufihọ. Fibae, izoge Ileleikristi e rẹ sai ru odibọgba rai kẹre ẹkwoma usiuwoma nọ a rẹ ta evaọ obọ isukulu. Ẹsejọhọ u ti gbe owhẹ unu nọ whọ te ruẹ oghẹrẹ isiuru nọ ibe emọ-eklase ra a rọ gwọlọ riẹ kpahe ẹrọwọ ra. Kọ whọ gbẹ rehọ uvẹ nọ wha be rọ tẹme kugbe evaọ eklase hayo nọ a tẹ ta k’owhai nọ wha kere kpahe oware jọ rọ ta usiuwoma? Amọfa a sae ta usiuwoma no ẹkwoma ividio mai nọ a ro ruiruo. Ahwo jọ a mu ebe-iwuhrẹ Ebaibol họ kugbe ibe emọ-eklase rai je fiobọhọ kẹ ai nyaharo te omarọkẹ gbe ame-ọhọ. Enana yọ obọdẹ idhere nọ a re ro “jiri odẹ ỌNOWO na.”—Ol. 148:12, 13.
7 Evaọ iruẹru ikẹdẹ kẹdẹ ra, gwọlọ idhere nọ whọ rẹ rọ ta ẹme kẹ ahwo kpahe Ọghẹnẹ mai nọ o gbunu na, gbe obọdẹ eyaa riẹ. Oniọvo-ọmọzae jọ nọ ọ rẹ ruọ itreni kugbe ahwo jọ kẹdẹ kẹdẹ o re se isẹri kẹ ae nọ uvẹ u te rovie fihọ. Wọhọ oriruo, nọ ọ jẹ hae hẹrẹ evaọ oria jọ nọ itreni nọ ọ be te ro ọ rẹ kpahe, ọ jẹ hae rehọ iminiti isoi ta usiuwoma kẹ ọzae jọ kẹdẹ kẹdẹ. Ọzae na avọ ọrivẹ riẹ a tẹ rọwo nọ oniọvo na o ru obe-uwuhrẹ Ebaibol kugbe ai. Eva itreni nọ ọ be dhẹ na a jẹ hae jọ ru uwuhrẹ na. Nọ oke jọ o vrẹ no, aye jọ nọ ọ kpako no nọ ọ be hae gaviezọ kẹ ẹme nọ a be ta ọ tẹ nya bru oniọvo-ọmọzae na, jẹ yare obe-uwuhrẹ Ebaibol. Aye na ọ be reawere uwuhrẹ riẹ re evaọ edẹ nọ ọ be hae rọ ro itreni na. Oniọvo-ọmọzae na ọ rọ enẹ ru obe-uwuhrẹ Ebaibol kugbe imakpe sa-sa no evaọ itreni na.
8 Kọ ẹvẹ o rẹ jọ otẹrọnọ whọ sai ru tere he fiki owho hayo ẹbẹbẹ ẹyao? Idhere efa jọ e sae jariẹ nọ who re ro fiba ujiro nọ whọ rẹ kẹ Jihova. Kọ whọ dawo isẹri-ise ifonu no? Otẹrọnọ whọ riẹ epanọ who re ro mu ei họ họ, ta kẹ ọsẹro uwuhrẹ obe ukoko rai. Ọ sai ru ọruẹrẹfihotọ re iwhowho-uvie nọ e be hae rọ edhere nana ta usiuwoma a lele owhẹ ruiruo. Nọ wha te bi ruiruo kugbe wọhọ ọrivẹ, wha rẹ sai wuhrẹ mi ohwohwo je fiobọhọ kẹ ohwohwo ta usiuwoma ziezi. Whọ rẹ sae ruẹ iroro-ejẹ kpahe isẹri ise ifonu evaọ Odibọgba Uvie Mai ọrọ February 2001, ẹwẹ-obe avọ 5-6.
9 Ekareghẹhọ na nọ ahwo ọkpokpọ a re kpohọ o sae ta udu họ ai awọ re a jiri Jihova vi epaọ ọsosuọ. Whọ rẹ sai fiobọhọ kẹ ae fi ozodhẹ kpobi nọ a wo kpahe idhere usiuwoma ota sa-sa na kparobọ ẹkwoma iku eware uduotahawọ nọ a jọ odibọgba na ruẹ nọ who re gbe kẹ ai, gbe ewuhrẹ nọ who re wuhrẹ ai re a sae fotọ ikere Ebaibol jẹ sae tha ẹrọwọ rai. (1 Pita 3:15) Otẹrọnọ ọmọ-uwuhrẹ Ebaibol o dhesẹ isiuru nọ ọ rẹ jọ owhowho-uvie, ta ẹme na kẹ ọsẹro ukoko na. O ti ru ọruẹrẹfihotọ nọ a rẹ rọ keria kugbe ọmọ-uwuhrẹ na re a riẹ sọ o te epanọ o re ro ku oma gbe ukoko na evaọ usiuwoma ota ẹgbede. Ẹvẹ eva e rẹ were Jihova te nọ ọ tẹ be ruẹ ahwo ọkpokpọ nọ a be tha esuo okpehru riẹ uke!—Itẹ 27:11.
10 Kọ Whọ Sai Ru Ọkobaro Obufihọ? A re se utee euwa 50 nọ e rrọ rọkẹ ọkobaro obufihọ na gboja ziezi. (Mat. 5:37) Onana u dhesẹ nọ whọ rẹ ma omaa nọ whọ rẹ rọ jọ odibọgba na raha euwa 12 koka koka. Kọ omaa oriruo orọ ọkobaro obufihọ jọ evaọ usu enọ e rrọ ẹwẹ-obe avọ 5 na u kiehọ iyero ra? Otẹrọnọ i gbe kiehọ họ, kọ whọ sae ma omaa obọra nọ whọ sai ro ru ọkobaro obufihọ eva March, April, hayo May? Lẹ se Jihova re ọ ghale omodawọ ra nọ who re ro ru odibọgba ra kẹre.—Itẹ 16:3.
11 Ekpako na gbe idibo iruiruo a te tha omodawọ ra uke re who ru ezi Ekareghẹhọ nana fihọ ezi nọ whọ rẹ rọ kẹ Jihova obọdẹ ujiro. Ẹsejọhọ, ibuobu ekpako gbe idibo iruiruo na i ti ru ọkobaro obufihọ. Ekpako na i ti ru ọruẹrẹfihotọ kẹ iwuhrẹ usiuwoma ota efa, wọhọ evaọ owọwọ, gbe urere-oka wọhọ epanọ o gwọlọ. Re a riẹ oria gbe oke nọ a re fi iwuhrẹ kẹ usiuwoma ota itieye na họ gbe ahwo nọ a ti ru iwuhrẹ na, ekpako na a sae ta ẹme kugbe ahwo nọ a wo uzedhe omaa no inọ a bi ru ọkobaro hayo ahwo nọ a be jiroro nọ a ti ru ere. Ekpako na e te daoma rọ ẹro te ọruẹrẹfihotọ na re iwhowho-uvie efa e jariẹ nọ wha re gbe kpohọ usiuwoma ota eva edẹ gbe oke nọ who fihọ nọ who re ro kpohọ usiuwoma ota. Ẹkwoma enẹ oruo a rẹ sai ro ru ọruẹrẹfihotọ muotọ je wo emamọ iyẹrẹ.—Itẹ 20:18.
12 Ru Utho nọ Ẹgba Ra O Te: Otẹrọnọ iyero ra e gbẹ k’owhẹ uvẹ nọ who re ro ru ọkobaro obufihọ họ, kareghẹhọ nọ Jihova ọ rẹ jẹ omodawọ gbe iruẹru mai rehọ wọhọ epanọ ẹgba mai o te, “ọ rẹ gba owhẹ họ onọ who wo ho ho.” (2 Kọr. 8:12) Eware buobu e riẹ nọ e rẹ lẹliẹ omai yere Jihova. Oye o lẹliẹ Devidi kere nọ: “Me re jiri Ọnowo ẹsikpobi; ajiri riẹ o re no omẹ unu hu.” (Ol. 34:1) Jọ oyena o jọ ọtamuo mai eva ezi Ekareghẹhọ nana.
[Study Questions]
1. Eme ‘ehaa’ etoke sa-sa na e wọ ahwo Izrẹl nọ i wo ozodhẹ Ọghẹnẹ ru?
2, 3. Fikieme u je fo re ma ru odibọgba mai kẹre evaọ ezi Ekareghẹhọ na, kọ oke vẹ ma ti ro ru Ekareghẹhọ na?
4, 5. (a) Eme o fiobọhọ kẹ iwhowho-uvie jọ wha emamọ usi na se ahwo buobu no? (b) Edhere vẹ whọ ruẹ nọ o wẹgba evaọ okegbe rai?
6. Ẹvẹ izoge a sai ro ru iruẹru abọ-ẹzi rai kẹre?
7. (a) Ẹvẹ oniọvo-ọmọzae jọ ọ rọ rehọ uvẹ nọ u rovie fihọ rọ ta usiuwoma kẹ amọfa? (b) Kọ whọ reawere uyero utioye no ẹdẹjọ?
8. Edhere usiuwoma ota vẹ ahwo nọ a sai ru iruo tere he fiki owho, hayo ebẹbẹ ẹyao a sai ro ru odibọgba rai kẹre?
9. Ẹvẹ ma sai ro fiobọhọ kẹ emọ-uwuhrẹ Ebaibol re a te epanọ a re ro ku oma gbe ukoko na evaọ odibọgba na?
10. (a) Ẹvẹ emamọ omaa u re ro fiobọhọ k’omai ru ọkobaro obufihọ? (b) Kọ whọ sae ma omaa nọ who ro ru ọkobaro obufihọ evaọ ezi Ekareghẹhọ ukpe nọ u kpo? Ẹvẹ who ro ru ei?
11. Ẹvẹ ekpako na gbe idibo iruiruo a sae rọ tha ahwo nọ a ti ru ọkobaro obufihọ uke?
12. Eme ọ rẹ wọ omai jiri Jihova ẹsikpobi?
[Box on page 3]
Ẹvẹ Who Ti ro Ru Odibọgba Ra Kẹre?
◼ Kpohọ usiuwoma ota eva okenọ a re di ahwo họ uwou
◼ Ta usiuwoma eva eria ẹgbede
◼ Ta usiuwoma eva oria iruo hayo obọ isukulu
◼ Ru isẹri-ise ifonu
◼ Ru ọkobaro obufihọ
[Chart on page 5]
Omaa-Iruo Ọkobaro Ubroke—Idhere nọ A rẹ rọ Ma Omaa Euwa 12 Usiuwoma Ota Evaọ Koka Koka
Ohiohiẹ—Ẹdọvo-Oka Rite Ẹdẹ-Ọmaha
A rẹ sae rehọ Ẹdoka nwene ẹdẹ ọfa kpobi.
Ẹdẹ Etoke Euwa
Ẹdọvo-Oka Ohiohiẹ 2
Edivẹ-Oka Ohiohiẹ 2
Edesa-Oka Ohiohiẹ 2
Edene-Oka Ohiohiẹ 2
Edisoi-Oka Ohiohiẹ 2
Ẹdẹ-Ọmaha Ohiohiẹ 2
Unu Euwa na Kpobi: 12
Edẹ Ivẹ Soso
A rẹ sae salọ edẹ ivẹ jọ evaọ oka na. (Nọ whọ tẹ salọ edẹ jọ, omaa nana o rẹ sae k’owhẹ euwa 48 ọvo evaọ amara na.)
Ẹdẹ Etoke Euwa
Edesa-Oka Ẹdẹ Ọsoso 6
Ẹdẹ-Ọmaha Ẹdẹ Ọsoso 6
Unu Euwa na Kpobi: 12
Owọwọ Ivẹ gbe Urere Oka Na
A rẹ sae salọ owọwọ ivẹ jọ evaọ edẹ oka na.
Ẹdẹ Etoke Euwa
Ẹdọvo-Oka Owọwọ 1 1⁄2
Edesa-Oka Owọwọ 1 1⁄2
Ẹdẹ-Ọmaha Ẹdẹ Ọsoso 6
Ẹdoka Ubro Ẹdẹ 3
Unu Euwa na Kpobi: 12
Uvo Ẹdẹ-Gheghe Esa gbe Ẹdẹ-Ọmaha
A rẹ sae rehọ Ẹdoka nwene ẹdẹ ọfa kpobi.
Ẹdẹ Etoke Euwa
Ẹdọvo-Oka Uvo 2
Edesa-Oka Uvo 2
Edisoi-Oka Uvo 2
Ẹdẹ-Ọmaha Ẹdẹ Ọsoso 6
Unu Euwa na Kpobi: 12
Omaa Usiuwoma Ota Obọmẹ
Jiroro unu euwa etoke ọvuọvo.
Ẹdẹ Etoke Euwa
Ẹdọvo-Oka
Edivẹ-Oka
Edesa-Oka
Edene-Oka
Edisoi-Oka
Ẹdẹ-Ọmaha
Ẹdoka
Unu Euwa na Kpobi: 12