Enwene Evaọ Ute Euwa Ekobaro
1 Mai kpobi ma wo ovuhumuo ọrọ ekobaro oke-kpobi gbe erọ ubroke nọ i bi ruiruo gaga evaọ ukoko na. Makọ evaọ oria nọ ẹkwotọ ọ jẹ rọ kakao yọ a rẹ hai ru ei fuafo kẹse kẹse, ekobaro a kẹ oriruo owoma no ẹkwoma iruo Uvie rai nọ a bi ru avọ ọwhọ. A tudu họ iwhowho-uvie na kpobi awọ no re a ruiruo buobu evaọ ẹgwọlọ “enọ i wo udu ogbagba.”—Iruẹru 13:48, NW.
2 Society o muẹrohọ ebẹbẹ ruru ebẹbẹ nọ ekobaro e be rẹriẹ ovao dhe no maero kiekpahe ẹgwọlọ iruo oyibo ubroke nọ o rẹ kẹ ae uvẹ rẹrote ẹgwọlọ obọrai re a sae daji iruo odibọgba oke-kpobi na. Uyero-ugho nọ o rrọ erẹwho buobu enẹna u te je ru ei fihọ bẹbẹ k’amọfa re a ruọ iruo ọkobaro na, o tẹ maki no ai eva ze re a ru ere. Evaọ umutho emerae nọ i kpemu na, ma roma totọ roro eware enana gbe efa no.
3 Fikiere, ro no enana ze, Society o sino ute euwa ọ ekobaro oke-kpobi gbe erọ ubroke no. Muhọ no ukpe ọ 1999 na vrẹ, ute ọ ekobaro oke-kpobi o te jọ euwa 70 k’amara k’amara, hayo 840 evaọ ẹgbukpe. Ute ọ k’amara k’amara kẹ ekobaro ubroke o te jọ euwa 50. Ute euwa kẹ ekobaro obọdẹ gbe imishọnare u nwene he, keme Society o wo ọruẹrẹfihotọ nọ o re ro fiobọhọ kẹ ae rẹrote ugogo ẹgwọlọ iwo rai. Fikiere, a rẹ sai muẹrohọ iruo usiuwoma ota gbe ilele-iruo rai vọvọ viere.
4 Ma rẹro nnọ enwene evaọ ute euwa onana u ti fiobọhọ kẹ ekobaro buobu viere re a yọrọ uvẹ iruo oghaghae onana. U re je rovie edhere kẹ iwhowho-uvie efa buobu re a ruọ iruo ọkobaro oke-kpobi gbe ọrọ ubroke na. Ẹvẹ onana o te jọ oghale kẹ ohwo kpobi evaọ ukoko na te!