Uvẹ Efa nọ Ma Sai ro Jiri Jihova
1. Ọruẹrẹfihotọ ọkpokpọ vẹ ọ te lẹliẹ omai “rehọ uyere ulogbo bru ỌNOWO na”?
1 Evaọ amara Asa nọ ọ vrẹ na, ma ru ọruẹrẹfihotọ ọkpokpọ nọ owhowho-uvie ọ sai ro ru ọkobaro obufihọ euwa 30 evaọ amara Asa hayo Ane kpobi gbe amara nọ ọsẹro ọnyawariẹ ọ rrọ kugbe ukoko. Otẹrọnọ oke ọsẹro ọnyawariẹ o ruọ amara ọfa, owhowho-uvie nọ ọ gwọlọ ru ọkobaro obufihọ euwa 30, ọ rẹ salọ amara ọvo. Owhowho-uvie kpobi nọ o ru ọkobaro obufihọ o re kpohọ ẹgwae nọ ọsẹro ọnyawariẹ ọ rẹ gba kugbe ekobaro oke-kpobi gbe ekobaro obọdẹ na jẹ jariẹ evaọ etoke ẹgwae na kpobi. Onana u dhesẹ nọ o tẹ make rọnọ ma rẹ sai ru euwa 50 he, ma rẹ sae gbẹ “rehọ uyere ulogbo bru ỌNOWO na” ẹkwoma euwa 30 nọ ma re ro ru ọkobaro obufihọ isiane ẹgbukpe.—Ol. 109:30; 119:171.
2. Irere vẹ inievo nọ i ru ọkobaro obufihọ evaọ amara ọsẹro ọnyawariẹ a ti wo?
2 Oke Ọsẹro Ọnyawariẹ: Ma riẹ nọ iwhowho-uvie buobu a ti ru ọkobaro obufihọ evaọ etoke ọsẹro ọnyawariẹ na, je wo omosasọ nọ a te lele iei kpohọ usiuwoma. (Rom 1:11, 12) O te were ekobaro obufihọ buobu re a rehọ ẹdẹjọ no iruo rai re a lele ọsẹro ọnyawariẹ kpohọ usiuwoma. Enọ i bi ru iruo no Ẹdọvo-Oka rite Edisoi-Oka a sae nọ ọsẹro ọnyawariẹ na sọ a sai lele iei kpohọ usiuwoma evaọ Ẹdẹ-Ọmaha hayo Ẹdoka. Ofariẹ, ekobaro obufihọ na a ti wo uduotahawọ ziezi nọ a ti lele ekobaro oke-kpobi gbe erọ obọdẹ kpohọ ẹgwae na.
3. Fikieme ezi Ekareghẹhọ na o rọ rrọ emamọ oke nọ ma re ro ru ọkobaro obufihọ?
3 Evaọ Amara Asa gbe Ane: Iwhowho-uvie nọ e rẹ rọ euwa 30 ru ọkobaro obufihọ evaọ ezi Ekareghẹhọ a rẹ sai fiba “okẹ iwẹegọ ejiro” rai enẹna. (Hib. 13:15) Amara Asa gbe Ane yọ etoke nọ ma sae rọ rehọ euwa 30 ru ọkobaro obufihọ. Kukpe kukpe, ma re zizie ahwo ziọ Ekareghẹhọ na evaọ emerae ivẹ nana. Ofariẹ, nọ ma te ru ọkobaro obufihọ evaọ ezi Ekareghẹhọ na, ma re lele iwhowho-uvie sa-sa kpohọ usiuwoma. Ma te ru Emu Owọwọ na no, ma ve zihe bru ahwo nọ a nyaze jẹ tuduhọ ae awọ re a te gaviezọ kẹ ovuẹ ogbotu na. Kọ who ti ru ọkobaro obufihọ re who wo erere no ọruẹrẹfihotọ ọkpokpọ nana ze?—Luk 6:45.