Ma Omaa Enẹna Epanọ Who ti ro Fiba Usiuwoma Ota Ra
1. Didi uvẹ ezi Ekareghẹhọ na u re rovie kẹ omai, kọ ẹvẹ ma rẹ rọ ruẹrẹ oma kpahe?
1 Kukpe kukpe, ezi ekareghẹhọ na yọ uvẹ nọ ma rẹ rọ “rehọ uyere ulogbo bru ỌNOWO na.” (Ol. 109:30) Kọ who ti fiba usiuwoma ota ra evaọ amara March, re who dhesẹ kẹ Ọghẹnẹ inọ ẹtanigbo na ọ da owhẹ ẹro fia? Jọ enẹna mu omaa họ ẹma.—Itẹ 21:5.
2. Ẹvẹ ọkobaro obufihọ nọ a bru euwa riẹ kpotọ ọ jọ owhẹ gbe amọfa oma evaọ April ukpe nukpo?
2 Ọkobaro Obufihọ: Ukpe nukpo, ikoko buobu a reawere ọkobaro obufihọ nọ a bru euwa riẹ kpotọ evaọ amara April. Oniọvo-ọmọzae jọ o kere nọ: “Mẹ gbẹ rrọ ekọleji, yọ o rrọ bẹbẹ re me ru ọkobaro oke-kpobi. Rekọ, me ti fi obe họ kẹ ọkobaro ọrọ euwa 30 evaọ amara April, mẹ vẹ te daoma ru euwa 50.” Oniọvo-ọmọtẹ jọ nọ o re wo uvẹ hẹ fiki iruo riẹ o kere inọ: “Euwa 30 e te bẹ omẹ e wo ho!” Nọ a whowho ọruẹrẹfihotọ na, oniọvo jọ nọ ọ vrẹ ikpe 80 no, nọ ọ jọ ọkobaro vẹre ọ ta inọ: “Oware nọ me bi rẹro riẹ anwẹdẹ ona! Jihova ọ riẹ nọ oke nọ mẹ jọ ọkobaro mẹ mai wo evawere!” Amọfa nọ a sai ru ọkobaro obufihọ họ a fiba oke usiuwoma ota rai.
3. Fikieme ma je roro kpahe epanọ ma ti ro ru ọkobaro obufihọ evaọ March, April, gbe May?
3 Amara March nọ ma be te ro na yọ obọdẹ amara nọ ma sai ro ru ọkobaro obufihọ keme ma te wariẹ wo uvẹ nọ ma ti ro ru euwa 30 hayo 50. Ofariẹ, Ẹdẹ-Ọmaha March 17 ma ti ro mu ahwo họ ezizie kẹ Ekareghẹhọ nọ ma ti ru evaọ April 5. Ibuobu a ti wo omaweromẹ usiuwoma ota rai nọ a fiba evaọ amara March na te epanọ a te rọ gwọlọ ru ọkobaro obufihọ orọ euwa 50 evaọ April gbe May.
4. Ẹvẹ ma sai ro fiba odibọgba mai, kọ erere vẹ o re noi ze?
4 Kọ u gbe fo re wha jọ evaọ egagọ uviuwou rai n’otha ta kpahe epanọ ohwo kpobi evaọ uviuwou na ọ sai ro fiba odibọgba riẹ evaọ ezi ekareghẹhọ na? (Itẹ. 15:22) Wha lẹ se Jihova kẹ obufihọ. (1 Jọn 3:22) Nọ who te fiba odibọgba ra, whọ te rọ ere fiba ujiro nọ whọ be kẹ Jihova je fiba oghọghọ ra.—2 Kọr. 9:6.