Mu Uwuhrẹ Ebaibol Họ Kugbe Ahwo nọ Whọ be Hae Kẹ Emagazini
1. Fikieme ukoko Jihova o be hae rọ tuduhọ inievo na awọ re a wo ahwo nọ a rẹ hae kẹ emagazini?
1 Ahwo buobu a re se emagazini mai rekọ a rẹ rọwo nọ ma wuhrẹ Ebaibol kugbe ai hi. Fikiere ukoko Jihova o be hae tuduhọ inievo na awọ re a hae rehọ emagazini se ahwo otiọye na kẹse kẹse. Nọ ahwo a te bi se emagazini mai, a ti wo isiuru kpahe uzẹme Ebaibol nọ oke o be nyaharo na. (1 Pita 2:2) Oware jọ nọ a se ku o sae were ae te epanọ a rẹ rọ rọwo nọ ma wuhrẹ Ebaibol kugbe ai.
2. Ẹvẹ ma sai ro fi obọ họ kẹ ahwo nọ ma be hae kẹ emagazini wo isiuru kpahe uzẹme na?
2 “Ku Ame Họ” Ibi Uzẹme nọ Whọ Kọ: Ukpenọ whọ rẹ hae kẹ ahwo emagazini na ọvo, daoma ta ẹme kugbe ai. Onana u ti ru owhẹ riẹ eware nọ ọ rọwo, eware nọ e rẹ were iẹe, gbe oware nọ o riẹe udu, yọ u ti fi obọ họ kẹ owhẹ riẹ oghẹrẹ nọ whọ rẹ rọ ta ẹme tei udu. (Itẹ 16:23) Ruẹrẹ oma kpahe taure whọ tẹ te nya bru rie. O tẹ lọhọ, ta ẹme kpẹkpẹe kpahe oware jọ evaọ emagazini na gbe oria Ebaibol nọ u no ze re whọ sai ku ame ku ibi uzẹme nọ whọ be daoma kọ fihọ udu riẹ na. (1 Kọr. 3:6) Kere ideti nọ whọ rọ nya bru ohwo na fihọ otọ, obe nọ whọ kẹ riẹ, oware nọ whọ ta kpahe, gbe oria Ebaibol nọ who se.
3. Ẹvẹ ma re zihe bru ohwo nọ ma be hae kẹ emagazini kpekpe te?
3 Ẹvẹ Who re Zihe Kpekpe Te? Who re zihe bru ohwo na ẹsiẹvo amara re whọ rọ emagazini nọ i kpozi sei. Ghele na, whọ sai zihe bru ohwo na kpekpe vrẹ ere otẹrọnọ who muẹrohọ nọ ohwo na o wo isiuru. Wọhọ oriruo, nọ whọ tẹ rọ emagazini kẹ ohwo, nọ oka ovo hayo ivẹ e jẹ vrẹ no, whọ sai zihe bru ohwo na whọ vẹ ta nọ, “Mẹ nyaze re mẹ rọ omoke jọ dhesẹ oware jọ kẹ owhẹ evaọ emagazini nọ mẹ kẹ owhẹ na.” Onana o te lẹliẹ ohwo na gwọlọ se uzoẹme yena. Otẹrọnọ o se rie no, whọ sae nọe kpahe erere nọ o wo no uzoẹme na ze, wha vẹ ta kpahe iẹe kpẹkpẹe. Otẹrọnọ ebe mai e rẹ were ohwo na ese, whọ sae rehọ emebe-evẹvẹ, ibroshọ, hayo obe nọ ma be rọ kẹ ahwo evaọ amara yena ro sei.
4. Eme ma re ru n’oke t’oke nọ u re fi obọ họ kẹ omai riẹ sọ ahwo nọ ma be hae kẹ emagazini a te rọwo nọ ma wuhrẹ Ebaibol kugbe ai?
4 Whọ hẹrẹ re ohwo na ọvo ọ yare uwuhrẹ Ebaibol ho. Kake j’owọ na. O tẹ make rọnọ ọ rọwo nọ o re wuhrẹ hẹ evaọ oke nọ u kpemu, n’oke t’oke whọ rẹ sai dhesẹ izoẹme ọ “Enọ nọ Ebaibol Ọ Kẹ Iyo Rai” na nọ e be hae romavia evaọ Uwou-Eroro na kẹe sọ ọ te rọwo nọ wha ta kpahe ae. Whọ sai mu uwuhrẹ Ebaibol nọ a rẹ jọ edikihẹ ru evaọ unuẹthẹ họ kugbe ohwo na. Rekọ otẹrọnọ whọ sai mu uwuhrẹ Ebaibol họ kugbei hi, whọ sae gbẹ hae rọ emagazini sei ghele.