Epanọ Ma Sai ro Wo Onaa Ziezi Evaọ Usiuwoma Ota—Lele Ahwo nọ Whọ be Hae kẹ Emagazini Ta Ẹme

Oware nọ U ro Wuzou: Ahwo buobu nọ a re se emagazini mai a rẹ rọwo nọ ma wuhrẹ Ebaibol kugbe ai hi. Ẹsejọhọ a roro nọ egagọ rai i te kẹ ai, hayo a wo uvẹ nọ a ti ro wuhrẹ hẹ. Ghele na, nọ a be hae se emagazini mai na, a rẹ sai wo isiuru kẹ Ẹme Ọghẹnẹ. (1 Pita 2:2) Uzoẹme jọ nọ a se o sai duobọte ai udu, hayo oware jọ nọ o via o sai ru ai nwene iroro. Nọ ma tẹ be hai weze bru rai, rehọ omoke jọ lele ai ta ẹme, u ti ru nọ a te rọ riẹ omai, ma vẹ te jẹ riẹ oware nọ o rẹ were ai gbe onọ o rrọ ae oja. Ma rẹ sae rehọ enẹ mu obe-uwuhrẹ Ebaibol họ kugbe ai.

Epanọ A re ro Ru Ei:

Hae rehọ Uwou-Eroro Na gbe Awake! nọ i kpozi se ohwo na kamara kamara. Whọ sae wẹriẹ ẹdẹ ọfa evaọ amara na re whọ ta kpahe uzoẹme jọ nọ o rrọ emagazini nọ whọ kẹ riẹ na, onọ whọ riẹ nọ o te were iẹe gaga hayo whọ sae kẹe obe jọ nọ ma be rọ kẹ ahwo evaọ amara na. Muẹrohọ ẹme nọ wha ta ẹdẹ yena.—Rri Odibọgba Uvie Mai, Ọvo 2014, ẹwẹ. 3.
Ruẹrẹ oma kpahe whọ tẹ te nya. Ukpenọ whọ rẹ hae kẹ ohwo na emagazini ọvo, daoma ta ẹme kugbei je mu ei ogbẹnyusu re whọ rrọ ere bọ isiuru riẹ ga.
Muẹrohotọ kẹ uvẹ nọ whọ sai ro mu obe-uwuhrẹ họ kugbei. Otẹrọnọ ohwo nọ whọ be hae kẹ emagazini ọ nọ owhẹ onọ kpahe oware jọ nọ Ebaibol na ọ ta, wha obe nọ ma re ro wuhrẹ kugbe ahwo nọ o kẹ uyo onọ riẹ na lele oma re wha gbe wuhrẹ iẹe. Taure whọ tẹ te nyavrẹ, nọ onọ utioye jọ fihotọ nọ who re zihe nyae kẹ uyo riẹ. Otẹrọnọ whọ be hae rehọ Ebaibol hayo obe jọ nọ ma re ro wuhrẹ kugbe ahwo lele iei ta ẹme, riẹ nọ obe-uwuhrẹ Ebaibol who bi ru na, wha gbẹ make raha oke he. Kọ whọ kẹ ohwo na ibroshọ Emamọ Usi na jẹ rehọ omoke jọ dhesẹ oghẹrẹ nọ ma re wuhrẹ iẹe kẹe no? Kọ who dhesẹ ividio ọ Fikieme Who re ro Wuhrẹ Ebaibol Na? gbe Ẹvẹ A re Ru Obe-Uwuhrẹ Ebaibol? na kẹe no? O tẹ make rọnọ ma daoma mu obe-uwuhrẹ họ kugbe ohwo na bẹ no rekọ ọ be se, eware e rẹ sai nwene. Kọ whọ gbẹ wariẹ daoma sọ ọ te rọwo?

Dao Onana Evaọ Amara Na:

Kere edẹ ahwo nọ whọ riẹ nọ whọ rẹ sae hae kẹ emagazini fihotọ. Kẹ ae emagazini mai nọ i kpozi kẹle, jẹ vuẹ ae nọ ekpokpọ i te kpozi, who ti ro se ai.