“Ẹkọ Ubi Uvie Na” Fihọ Ejẹ Emagazini
1 Ole avọ 133 evaọ Suile Ujiro kẹ Jihova o wo uzoẹme ọ “Ẹkọ Ubi Uvie Na.” A rehọ e riẹ no ọtadhesẹ Jesu ze nọ o rehọ iruo aru-ilele na dhesẹ ekakọ ubi. (Mat. 13:4-8, 19-23) Eme ọ ole na i se nọ: ‘Re ibi ra i te kie otọ uwoma bu/Obọ ra o rẹ mai no ze.’ Kọ ẹvẹ ma sai ro ru ewoma odibọgba mai rro haro? Edhere jọ họ ẹkwoma ejẹ emagazini nọ ma rẹ gbẹ, jẹ sẹro riẹ.
2 A rẹ sai le ẹjiroro buobu t’obọ ẹkwoma ejẹ emagazini. (1) Iweze evaọ eka ivẹ kpobi o rẹ sae fiobọhọ k’owhẹ bọ usu oruọruọ kugbe ohwo nọ o wo isiuru na. (2) Whọ vẹ hae rehọ evuẹ nọ i re siwi uzuazọ nọ e rrọ Uwou-Eroro Na gbe Awake! ro se ei kẹse kẹse. (3) Ẹkwoma ẹmeọta ra whọ sai fiobọhọ k’ohwo na re ọ bọ isiuru kẹ uzẹme Ikereakere na, nọ o rẹ sai su kpohọ uwuhrẹ Ebaibol.—1 Pita 2:2.
3 Epanọ A Sai Ro Muọ Ejẹ Emagazini Họ: Oke kpobi nọ ohwo o te dhesẹ isiuru kpahe emagazini na, dhesẹ vevẹ nọ obọdẹ izoẹme e rẹ jọ uvitha kpobi gbe nnọ o were owhẹ re whọ hae rehọ ae se ei evaọ eka ivẹ kpobi. Nọ who te no etẹe no, kere odẹ gbe adrẹse ohwo na, ẹdẹ nọ whọ rọ nya na, ẹdẹ ọ uvitha kpobi nọ who fihọ ada kẹe na, uzoẹme nọ whọ rọ t’ẹme gbe ẹme nọ ọ mae were ohwo na.
4 Whọ sae rehọ umutho ahwo jọ ọvo ro muọ ejẹ na họ. Whọ vẹ daoma ru ei rro ẹkwoma amọfa nọ who fi emagazini họ ada kẹ nọ who re fibae. Nọ ejẹ ra ọ be rro na, whọ sae m’omaa oghẹrẹ nọ whọ rẹ hae nya ae re whọ sai ru ei re lọlọhọ. Roma totọ kere uvitha kpobi nọ who fihọ ada no evaọ iweze kpobi gbe oke na. Kere eme fiba eme nọ wha ta jẹ rọ kpahe epanọ whọ sai ro ru isiuru ohwo na kpahe uzẹme na rro haro evaọ iweze efa.
5 Kuọ Ehreki Avọ Ahwo Akiruo Obọrai Kugbe Ei: Eware nọ a rẹro ruẹ no i dhesẹ nnọ ahwo nọ a wo uwou-eki gbe ahwo akiruo efa a rẹ sae rehọ emagazini mai na kẹse kẹse. Ọkpako ukoko jọ o tube ruọ osu-egọmeti ẹwho riẹ fihọ ejẹ emagazini riẹ. Owhowho-uvie jọ o muọ uwuhrẹ họ kugbe ọzae ikpe 80 jọ nọ ọ rẹ zẹ ekwakwa nọ a rẹ rọ bọ iwou evaọ okenọ o fiọ emagazini họ ada kẹe te ikpe ikpe ususu no!
6 Oniọvo ọmọtẹ ọkobaro jọ ọ ruọ uwou-eki jọ ọ tẹ ruẹ imava-orọo jọ nọ a dede i rie rehọ ziezi hi. Dede na, nọ a rehọ emagazini na, o te kuọ imava-orọo na kugbe ejẹ emagazini riẹ. U kri hi, oniọvo ọmọtẹ na ọ tẹ gwọlọ nọ ọ rẹ se ae ba eweze bru keme a be sasa ovao kẹe he yọ a rẹ ruoma kpahe ẹme kẹe he, ọ tẹ make nọ onọ kpahe eriwo rai dede. Rekọ oniọvo ọmọtẹ na ọ tẹ lẹ kpahe ẹme na uwhremu na o te fi obe ọ Ria Bẹdẹ Bẹdẹ na họ ada kẹ imava-orọo na. Nọ a sei no, aye na o te bo nọ: “Enẹna mẹ ruẹ uzẹme na no!” A te muọ uwuhrẹ Ebaibol họ, uwhremu na imava-orọo na a tẹ họ-ame. Ithihakọ ọkobaro na o ghinẹ wha emamọ iyẹrẹ ze.
7 Eruo Ozihebro Na: Nọ emagazini ọkpokpọ o te t’owhẹ obọ, se uzoẹme riẹ kpobi. Gwọlọ owọ-ẹme nọ u re si omomọvo urru evaọ ejẹ ra. Nọ who te zihe, whọ sae ta nọ: “Nọ me je se uzoẹme onana, me roro kpahe owhẹ gbe epanọ u ti siowhẹ urru te.” Iwhowho-uvie kpobi t’emaha t’ekpako a rẹ sae reawere ejẹ emagazini nọ a re wo. Ọmaha ọ sae tubẹ ta nọ: “Eva e were omẹ nọ mẹ rọ wariẹ ruẹ owhẹ. Emagazini ọ Uwou-Eroro Na gbe Awake! ekpokpọ ra i kpozi no. Me roro nọ uzoẹme onana nọ o ta nọ . . . o te were owhẹ.”
8 Kpare isiuru kẹ izoẹme nọ i bi kpozi ẹkwoma iroro ohwo na nọ who re si kpohọ etehe nọ o wo uzoẹme ọ “Evaọ Ukere n’Otha” na. Nọ izoẹme e tẹ roma via unọjọ utọjọ, fodẹ iẹe kẹe jẹ tudu họ ọnọ o bi se na awọ re uvumọ abọ riẹ ọ se iẹ ba evo. Jọ o thọrọ owhẹ ẹro ho inọ oke kpobi nọ whọ tẹ rehọ emagazini na se ohwo nọ ọ rọ ejẹ emagazini ra, whọ rẹ sai kele ozihebro. Mae rro, kareghẹhọ nnọ ute mai họ re ma ru iweze enana fihọ obe uwuhrẹ Ebaibol.
9 Weze Bru Ahwo Nọ A Rọ Ejẹ Ra Kẹse Kẹse: Whọ sae nya ejẹ emagazini ra duwu evaọ oke kpobi nọ u kiehọ—evaọ ohiohiẹ ẹdẹ oka jọ, evaọ ogha-uvo, evaọ akọ-owọwọ, hayo evaọ urere oka nọ whọ tẹ raha oke ta usiuwoma ọ n’uwou ruọ uwou no. Otẹrọnọ whọ gbẹ sai ru ejẹ ra re he fiki ọ ẹyao hayo fikinọ who kpohọ erẹ, ta kẹ owhowho-uvie ọfa evaọ uviuwou ra hayo ukoko na re ọ rehọ emagazini na ro se ei k’owhẹ. Evaọ edhere ọyena, emagazini na e vẹ sai te ahwo nọ a rọ ejẹ ra obọ evaọ ẹruoke.
10 Edhere jọ nọ a rẹ rọ kọ ubi Uvie na họ re a rehọ Uwou-Eroro Na gbe Awake! ro se ahwo nọ a rọ ejẹ emagazini ra kẹse kẹse. Nọ who bi wuhrẹ ai uzẹme Ikereakere na, a ti wo otoriẹ ẹme ọ Uvie na, ukuhọ riẹ a ve lele owhẹ mọ ubi Uvie na.—Mat. 13:8, 23.