Esẹro nọ E be k’Obaro—Okere-Obe Na
1 Okere-obe ọ ukoko na o re ru abọ ologbo re ọ ruẹ nọ “a ru eware kpobi ziezi gba kiete.” (1 Kọr. 14:40) Wọhọ omọvo ọ Ogbẹgwae Iruo Ukoko na, ọ rẹ rẹro te ẹmeọta-kugbe ukoko na gbe efale nọ i w’uzou. Dede nọ ahwo a rẹ ruoma muẹrohọ owha-iruo riẹ wọhọ erọ ekpako efa tere he, iruo riẹ e r’oja gaga yọ ma vuhu aghare riẹ mu.
2 Okenọ evuẹ i te n’obọ Society hayo amọfa ze, okere-obe na ọ rẹ rẹriẹ ovao ku ei jẹ ruẹ nọ a za riẹ zihe otẹrọnọ o gwọlọ ere. O re muẹrohọ nnọ ileta nọ i kpozi i te ekpako na kpobi obọ kẹsena o ve fi ai họ efale bọo okiofa. Ọ rẹ kiẹ efọmo emagazini gbe ebe riwi o ve vi ai se Society. Ọ rẹ sẹro ahwo nọ a be rẹro te igho gbe ebe nọ a re vi jegbe eme nọ i kie kpahe okokohọ kpobi.
3 Nọ okere-obe na o re vi iyẹrẹ usiuwoma ota ukoko na k’amara k’amara se Society evaọ edẹ ezeza amara na, o r’oja inọ mai kpobi ma rẹ n’iyẹrẹ usiuwoma ota mai ẹruoke eva urere amara kpobi. O ve kere iyẹrẹ iruo na fihọ ekade ọ Iruo Owhowho-Uvie Ukoko na. Owhowho-uvie kpobi ọ sae yare re o rri iyẹrẹ iruo riẹ.
4 Okenọ owhowho-uvie jọ ọ tẹ kua ze hayo kua no ukoko na, okere-obe na ọ rẹ yare hayo vi ileta ọ ohwo odhesẹ avọ ekade ọ Iruo Owhowho-Uvie Ukoko orọ ohwo na ro mi hayo se ekpako ukoko odekọ na.—Our Ministry, ẹwẹ. 104-105.
5 Okere-obe na ọ rẹ kiẹ iruẹru ọ ekobaro na riwi, ọ vẹ vuẹ ekpako na, maero ọsẹro iruo usiuwoma ota na, kpahe ebẹbẹ nọ ekobaro na a be rẹriẹ aro ku. Ọ rẹ vuẹ iwuhrẹ ọ Uwuhrẹ Obe Ukoko na kpahe iwhowho-uvie nọ e rọ ẹdhigodo evaọ usiuwoma ota. Te okere-obe na gbe ọsẹro iruo usiuwoma ota na a rẹ k’obaro evaọ oma nọ a rẹ dawo kugbe re a rẹro te iwhowho-uvie nọ e seba no.—Odibọgba Uvie Mai, ọrọ February 1989 (ọrọ Oyibo), ẹwẹ. 1.
6 Avọ emamọ ovuhumuo kẹ ewha-iruo ọ okere-obe na, jọ ma ru utho ẹgba mai re ma fiobọhọ ru ọkwa-odibo riẹ lọhọ kẹe.—1 Kọr. 4:2.