Ẹkpẹti Onọ

◼ Fikieme ma jẹ niyẹrẹ iruo usiuwoma ota mai evaọ ẹruoke isiava kamara kamara?

Eva e rẹ were omai kpobi nọ ma te yo kpahe emamọ eware nọ a bi rugba evaọ ewhowho ovuẹ Uvie na. (Rri Itẹ 25:25.) Obe Iruẹru 2:41 o niyẹrẹ nọ lele ẹme urirẹ Pita evaọ ẹdẹ Pẹntikọst, “ahwo nọ a kuomagbe ai ẹdẹọyena a te idu ahwo esa.” Nọ omoke kpẹkpẹe o vrẹ no, unu oyena u te viharo te “[idu] ahwo isoi.” (Iruẹru 4:4) Ẹvẹ iyẹrẹ eyena e jaja Ileleikristi ikpe udhusoi-ọsosuọ oma te! Epọvona o rẹ jọ omai oma re nẹnẹ kpahe iyẹrẹ uduowha. Eva e rẹ were omai nọ ma te yo kpahe ẹnyaharo inievo mai evaọ ewhowho emamọ usi na evaọ akpọ na soso.

Nọ o rẹ rehọ oke gbe omodawọ gaga re a koko iyẹrẹ eyena họ na, ọrọwo-kugbe owhowho Uvie kpobi o r’oja. Kọ o rọ owhẹ oja re whọ n’iyẹrẹ ra evaọ ẹruoke isiava kamara kamara?

Iyẹrẹ ẹvi o rẹ wha oghọghọ buobu se omai. Ofariẹ, iyẹrẹ i re fiobọhọ kẹ Ukoko-Ulogbo rẹro te ẹnyaharo iruo akpọ-soso. A rẹ jiroro kpahe oria nọ a mae jọ gwọlọ obufihọ hayo oghẹrẹ gbe unu ebe nọ a re kporo. Ekpako nọ e rọ ukoko ọvuọvo a rẹ rehọ iyẹrẹ usiuwoma ota riẹ oria nọ a rẹ jọ ru omodawọ. Emamọ iyẹrẹ e rẹ bọ ohwo ga, fi ọwhọ họ omai kpobi oma re ma kiẹ odibọgba mai riwi kẹ ẹnyaharo.

O gwọlọ nọ iwhowho-uvie kpobi a vuhu owha-iruo rai mu re a fi iyẹrẹ usiuwoma ota rai họ evaọ ẹruoke isiava kamara kamara. Esẹro Obe Uwuhrẹ Ukoko a rẹ sae kareghẹhọ iwhowho-uvie na kpahe owha-iruo rai nana, nọ ae omarai a be jaja arovi re a fiobọhọ kẹ ahwo nọ i wo ebẹbẹ jọ evaọ abọ wo evaọ usiuwoma ota kẹse kẹse kamara kamara na. A rẹ sai kareghẹhọ ai evaọ obe uwuhrẹ ukoko urere amara na hayo oke ọfa nọ u fo. Otẹrọnọ uvẹ o gbẹ riẹ re a n’iyẹrẹ na evaọ Ọgwa Uvie he, ọsẹro Obe Uwuhrẹ Ukoko ọ rẹ sai mi ai u ve mu ei ẹro nọ ọ rehe rai kẹ okerobe na evaọ ẹruoke re a ku ai gbe iyẹrẹ amara ukoko na ro se Ukoko-Ulogbo.

Omodawọ mai re ma niyẹrẹ iruo usiuwoma ota mai kẹse kẹse evaọ ẹruoke u re ru owha na vori kẹ ahwo nọ e be rẹro te omakpokpọ ẹzi mai na.