Epanọ Ma sai ro Mu Obe-Uwuhrẹ Ebaibol họ Kugbe Ahwo nọ Ma Fi Emagazini họ Ada Kẹ
1. Eme họ utee mai nọ ma te bi fi emagazini họ ada?
1 Evaọ Ẹdẹ-Ọmaha kpobi, ma rẹ jọ odibọgba na fi emagazini Uwou-Eroro Na gbe Awake! họ ada. Rekọ onana yọ owojẹ ọsosuọ gheghe evaọ ẹnyate utee mai nọ ma rọ gwọlọ wuhrẹ ahwo udu oruọzewọ uzẹme na. Ma jẹ iroro jọ fihọ obotọ na kpahe epanọ a sai ro fi obe ọ Ebaibol Wuhrẹ na họ ada evaọ ozihebro, jẹ to obe-uwuhrẹ Ebaibol họ. Whọ sai nwene enana kiehọ ẹgwọlọ ẹkwotọ ukoko rai, jẹ rehọ eme obọra ta ẹme na. Whọ sae rehọ idhere efa nọ i kiehọ kẹ ẹkwotọ rai ro ruiruo.
2. Ẹvẹ ma sae rọ rehọ ẹwẹ-obe avọ 4-6 ọrọ obe ọ Ebaibol Wuhrẹ na rọ to obe-uwuhrẹ Ebaibol họ?
2 Rehọ Ewẹ-Ebe Emuhọ na Ro Ruiruo: Nọ who te zihe, whọ sae ta nọ: “Emagazini nọ mẹ k’owhẹ ẹdẹ na ọ kpọ iroro rri Ebaibol na. Muẹrohọ oware nọ ese Ebaibol u je wuzou gaga.” Se Aizaya 48:17, 18; Jọn 17:3; hayo ikere efa nọ i kiehọ. Kẹsena nọ whọ tẹ ta ẹme kpahe obe Ebaibol Wuhrẹ na no jẹ rehọ ọvo jọ kẹ ohwo na no, whọ sae ta haro nọ:
◼ “Ebaibol na ọ k’omai uvi ẹruore kpahe obaro na.” Dhesẹ ẹwẹ-obe avọ 4-5 kẹ ohwo na, jẹ nọe inọ, “Evaọ usu eyaa nana, ọvẹ whọ gwọlọ ruẹ nọ o rugba?” Whọ vẹ kpọ iroro ohwo na kpohọ uzou nọ a jọ tẹme kpahe uwoho nọ ọ riobọhọ, whọ vẹ rehọ omoke jọ ta kpahe edhe-ẹme ọvo hayo ivẹ otẹrọnọ ohwo na ọ k’owhẹ uvẹ.
◼ Hayo whọ sae ta nọ, “Ebaibol na e kuyo enọ nọ e mai wuzou evaọ uzuazọ.” Kpọ iroro ohwo na kpohọ ẹwẹ-obe avọ 6, jẹ nọe sọ ọ sae jọ usu enọ nọ e rrọ obotọ ẹwẹ-obe na roro kpahe ọjọ no ẹdẹjọ. Rovie kpohọ uzou nọ o kuyo onọ na evaọ obe na, re who se edhe-ẹme ọvo hayo ivẹ.
◼ Hayo whọ sae jọ ẹwẹ-obe avọ 2 na dhesẹ izoẹme na kẹe, whọ vẹ nọe onọ u si rie urru. Rovie kpohọ uzou yena, whọ vẹ rehọ omoke jọ dhesẹ epanọ a re ru obe-uwuhrẹ Ebaibol.
3. Ẹvẹ ma sai ro mu obe-uwuhrẹ Ebaibol họ nọ ma te fi emagazini nọ o ta kpahe eware nana jọ họ ada (a) uyero akpọ nọ u bi dhe eyeyoma? (b) uviuwou? (c) oware nọ a je fievahọ Ebaibol na?
3 Jọ Iweze Ọsosuọ na n’Onọ Fihotọ: Edhere ọfa họ whọ rẹ jọ iweze ọsosuọ na ru ọruẹrẹfihotọ kẹ ozihebro. Nọ ohwo na ọ tẹ rehọ emagazini na no, nọ onọ jọ fihotọ jẹ vuẹe inọ whọ te kuyo onọ na nọ who te zihe ze. Whẹ avọ ohwo na wha daoma fi oke họ, jẹ ruẹ nọ who zihe evaọ oke nọ wha fihọ na. (Mat. 5:37) Nọ who te zihe, kareghẹhọ ohwo na onọ nọ whọ nọ fihotọ na, who ve rovie kpohọ oria nọ a jọ kuyo na evaọ obe Ebaibol Wuhrẹ na, re whọ rehọ omoke jọ sei jẹ t’ẹme kpahe iẹe. Kẹe obe na jọ re ọ sai rri lele owhẹ. Idhere jọ nọ a sai ro ru ei ena:
◼ Otẹrọnọ emagazini nọ who fihọ ada o ta kpahe uyero akpọ nọ u bi dhe eyeyoma, whọ sae ta nọ, “Nọ me te zihe ze ma te ta kpahe uyo nọ Ebaibol e kẹ kpahe onọ nana, Didi inwene Ọghẹnẹ ọ te jọ akpọ na ru?” Rehọ ẹwẹ-obe avọ 4-5 ro ruiruo nọ who te zihe. Hayo whọ sae nọ onọ nana, “Kọ okpẹtu sa-sa nọ e be roma via na yọ oreva Ọghẹnẹ?” Nọ who te zihe, dhesẹ edhe-ẹme avọ 7-8 evaọ uzou 1 na kẹ ohwo na.
◼ Otẹrọnọ emagazini nọ who fihọ ada o ta kpahe uviuwou, taure whọ tẹ te nyavrẹ whọ sae nọ onọ nana, “Eme omomọvo evaọ uviuwou o re ru nọ o rẹ wha evawere fihọ uviuwou?” Nọ who te zihe, jọ uzou avọ 14 na se edhe-ẹme avọ 4.
◼ Otẹrọnọ emagazini nọ who fihọ ada o ta kpahe oware nọ a je fievahọ Ebaibol na, whọ sae nọ onọ nana hẹrẹ iweze ra n’etha, “Kọ Ebaibol na ọ gba evaọ abọ otokiẹ-eriariẹ?” Nọ who te zihe, jọ uzou avọ 2 na se edhe-ẹme avọ 8.
4. Eme ma re ru otẹrọnọ ohwo ọ gbẹ rehọ obe Ebaibol Wuhrẹ na mi omai hi?
4 Evaọ obọ ekuhọ iweze kpobi, nọ onọ ofa fihotọ nọ whọ te kuyo riẹ evaọ iweze n’etha. Nọ whọ tẹ sae to obe-uwuhrẹ na họ ziezi no, wha wuhrẹ obe na othotha no emuhọ te ekuhọ. Kọ otẹrọnọ ohwo na ọ gbẹ rehọ obe Ebaibol Wuhrẹ na ha? Whọ rẹ sae gbẹ rehọ emagazini na sei ghele, jẹ rọ Ikereakere na lele iei t’ẹme. Nọ whọ be bọ isiuru riẹ ga na, ẹsejọhọ ọ te rọwo obe-uwuhrẹ Ebaibol evaọ obaro.
5. Fikieme ma jẹ daoma ru viọ emagazini nọ ma rẹ rọ kẹ ahwo ọvo?
5 Emagazini Uwou-Eroro Na gbe Awake! e rẹ sae kpare isiuru ohwo re o wuhrẹ kpahe oware nọ Ebaibol na o gine wuhrẹ. Fikiere, daoma ziezi re whọ to obe-uwuhrẹ Ebaibol họ kugbe ahwo nọ who fi Uwou-Eroro Na gbe Awake! họ ada kẹ. Ere ma re ro ru uwou nọ Jesu o vi omai nọ ma ‘ru ilele . . . , je wuhrẹ ai’ na gba.—Mat. 28:19, 20.