**Epanọ Ma Sai ro Wo Onaa Ziezi Evaọ Usiuwoma Ota—Rehọ Obe Ebaibol Wuhrẹ na Kẹ Ahwo**

Oware nọ U ro Wuzou: Obe Ebaibol Wuhrẹ na yọ obe jọ nọ u wuzou gaga nọ o rẹ jọ ẹkpa usiuwoma mai. Rekọ, re ma sae rehọ iẹe wuhrẹ ohwo, o gwọlọ nọ ma rẹ rọ obe na kẹe tao. Fikiere, mai kpobi ma rẹ daoma wo onaa nọ ma rẹ rọ rehọ obe Ebaibol Wuhrẹ na kẹ ahwo evaọ usiuwoma. (Itẹ 22:29) Idhere buobu e riẹ nọ ma sae rọ rehọ iẹe kẹ ahwo, yọ owhowho-uvie kpobi ọ rẹ salọ onọ ahwo ẹkwotọ riẹ a be mae rọ gaviezọ kẹe.

Epanọ A re ro Ru Ei:

Nọ ohwo na onọ nọ ọ te gwọlọ riẹ uyo riẹ, who ve dhesẹ uzoẹme nọ o kuyo onọ na kẹe evaọ obe na. Whọ sae tubẹ nọe onọ jọ evaọ usu enọ nọ e rrọ emuhọ uzoẹme kpobi na. Nọ ohwo na ọ tẹ kpahe fihọ onọ na no, se oria Ebaibol nọ u kiehọ onọ na, kẹsena who ve dhesẹ edhe-ẹme nọ o kuyo onọ na kẹe evaọ obe na, whai imava wha vẹ ta kpahe iẹe kpẹkpẹe.
Whọ sae jẹ rehọ eware nọ e rrọ ẹwẹ-obe avọ 3-6 na ta ẹme ruọ ohwo oma, kẹsena who ve dhesẹ oria nọ a jọ ta kpahe ẹme na kẹe evaọ obe na. Wọhọ oriruo, whọ sae fodẹ oware okpẹtu jọ nọ o via kẹle na nọ a whowho evaọ irediyo hayo etẹlivisiọno, whọ vẹ ta nọ ahwo buobu a be nọ ọkpọ enọ nọ e rrọ ẹwẹ-obe avọ 3 na. Hayo whọ sae ta nọ who bi weze bru ahwo re who fiobọhọ kẹ ae ruẹ nọ akpọ ọ te jọ ziezi evaọ obaro. Who ve dhesẹ ifoto nọ e rrọ ẹwẹ-obe avọ 4-5 na kẹe, jẹ nọe nọ, “Eyaa vẹ evaọ usu enana ọ mae were owhẹ?” Edhere ọfa họ, whọ sae ta nọ whọ be nyabru ahwo re who fiobọhọ kẹ ae riẹ uyo enọ nọ i wuzou gaga evaọ uzuazọ. Who ve dhesẹ enọ nọ e rrọ ẹwẹ-obe avọ 6 na kẹe, jẹ nọe re ọ fodẹ onọ o mae were iẹe.
Mu obe-uwuhrẹ họ kugbe ahwo ovavo. Whọ sae ta nọ: “Ma bi dhesẹ obe nana nọ a re ro wuhrẹ Ebaibol na kẹ ahwo. Kọ whọ ruẹ e riẹ no ẹdẹjọ? [Kuvẹ kẹ uyo.] Otẹrọnọ who wo umuvẹ jọ, mẹ gwọlọ dhesẹ kẹ owhẹ epanọ ma rẹ rọ rehọ iẹe avọ Ebaibol ra ro ru uwuhrẹ Ebaibol.”

Dao Onana Evaọ Amara Na:

Wha ru odhesẹvia evaọ etoke egagọ uviuwou rai epanọ wha sai ro ru onana.
Whọ tẹ rrọ usiuwoma, vuẹ oniọvo nọ wha gbẹ rrọ usu ẹme nọ whọ ruẹrẹhọ nọ whọ te ta. (Itẹ 27:17) Otẹrọnọ ẹme nọ whọ ruẹrẹhọ o bi si ahwo urru tere he, daoma nwene iei.