Epanọ A rẹ Rehọ Obe Eriariẹ na ro Ru Ilele
1 Ute isiuru Ileleikristi kpobi họ re a wuhrẹ amọfa uzẹme na je ru ilele ahwo nọ ‘a wo eva ezi kpahe uzuazọ ebẹdẹ bẹdẹ.’ (Iruẹru 13:48; Mat. 28:19, 20) Ukoko Jihova o fi okwakwa ugbunu họ abọ mai nọ ma re ro ru onana gba—obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Uzoẹme riẹ u fi elo họ epanọ obe uwuhrẹ Ebaibol u wuzou te, keme uzuazọ ebẹdẹ bẹdẹ o roma hwa ewuhrẹ eriariẹ Jihova, Ọghẹnẹ uzẹme ọvo na, gbe Ọmọ riẹ, Jesu Kristi.—Jọn 17:3.
2 Obe Eriariẹ na họ uzedhe obe Ukoko-Ulogbo enẹna nọ a re ro ru obe iwuhrẹ Ebaibol. Ma tẹ rehiẹe ruiruo, ma te sae wuhrẹ uzẹme na lọlọhọ, vevẹ, kpẹkpẹe. Onana u re fiobọhọ k’omai nyate udu ahwo nọ ma bi wuhrẹ. (Luk 24:32) Dede, o gwọlọ re owuhrẹ na o fi emamọ ona uwuhrẹ họ iruo. Fiki oye a jẹ ruẹrẹ uko obeva ọnana họ re o kẹ ẹjiroro gbe ekareghẹhọ kpahe ona ewuhrẹ nọ i w’ẹgba. Avọ orimuo, gbe epanọ eyero ohwo na ọ rọ, whọ te sae fi eme nọ a dhesẹ fihọ etenẹ na jọ hayo oma rai kpobi họ iruo ẹmẹrera. Sẹro uko obeva onana, je rovie kpohiẹe ẹsikpobi. Igogo eme sa-sa e sae fiobọhọ k’owhẹ rehọ obe Eriariẹ na ruiruo ziezi evaọ eruo ilele.
3 Ru Obe Uwuhrẹ Ebaibol nọ O rẹ Nyaharo: Wo obọdẹ isiuru kpahe ọmọ-uwuhrẹ na wọhọ ọnọ ọ sae jọ olele Kristi gbe oniọvo ọmọzae hayo ọmọtẹ ẹzi. Jọ whẹtiẹwhẹtiẹ, oma ogbẹnyusu, avọ evawere. Whọ tẹ rọ ohwo nọ ọ rẹ gaviezọ ziezi, whọ rẹ sae riẹ ohwo ọdekọ na—oria nọ o noze gbe eyero uzuazọ riẹ—nọ u re fiobọhọ k’owhẹ vuhu epanọ who re ro fiobọhọ kẹe evaọ ẹzi nọ o mae woma. Jọ uno owhẹ eva ze re whọ rehọ oma ra kẹ fiki ọmọ-uwuhrẹ na.—1 Tẹs. 2:8.
4 Wha tẹ nwani mu uwuhrẹ na họ no, o rẹ mai woma re wha wuhrẹ izou obe Eriariẹ na no umuhọ inọmba ọsosuọ vrẹ owowa. Onana o rẹ lẹliẹ ọmọ-uwuhrẹ na wo otoriẹ uzẹme na haro owowa, keme obe na u wuhrẹ izoẹme Ebaibol unọjọ utọjọ. Ru uwuhrẹ na lọlọhọ avọ isiuru re o jọ jajaja jẹ nyaharo. (Rom 12:11) Epanọ eyero gbe ẹvori ọmọ-uwuhrẹ na ọ rọ, izoẹme jọ e riẹ nọ a rẹ jọ ẹkeria ọvo wuhrẹ re ole auwa ọvo, ababọ ẹdhẹ vẹrẹ vẹrẹ evaọ uwuhrẹ na. Ọmọ-uwuhrẹ o ti ru emamọ ẹnyaharo okenọ te owuhrẹ gbe ọmọ-uwuhrẹ a tẹ be nya lele oma-uwuhrẹ k’oka k’oka rai. Fikiere, rọ kẹ ahwo jọ, o rẹ sae lọhọ re a wuhrẹ izou 19 obe na re evaọ ole emera ezeza.
5 Rehọ eme kpẹkpẹe nọ e rẹ kpare isiuru mu abọ ọvuọvo họ. Who ti muẹrohọ nọ eme ọsosuọ uzou kpobi họ uzoẹme riẹ, nọ o gwọlọ nọ a re fiẹgba họ. Uzoẹme ọsese ọvuọvo ọ riobọhọ ugogo-ẹme, nọ u re fiobọhọ k’owhẹ tẹro vi uzoẹme ọ uzou na. Yọrọ oma re whọ se eme buobu ba ẹta. Ikpoye, daoma re who ru ọmọ-uwuhrẹ na k’iyo. Whọ tẹ nọ enọ nọ e rẹ kpare iroro ọmọ-uwuhrẹ na ro no eware nọ ọ riẹ no vẹre ze, u re fiobọhọ kẹe roro ọ vẹ kuyo ogbagba. (Mat. 17:24-26; Luk 10:25-37; riwi School Guidebook, ẹwẹ-obe 51, edhe avọ 10.) Nya lele evuẹ nọ a kporo fihọ obe Eriariẹ na kpekpekpe. Eware ididi efa nọ a re kugbe uwuhrẹ na e sae si awere riẹ no hayo ruru igogo-eme u ve je ru uwuhrẹ na thethei. (Jọn 16:12) Otẹrọnọ a nọ onọ nọ u kpoma họ uzoẹme uwuhrẹ na ha, evaọ abọ buobu whọ sae k’uyo riẹ okenọ abọ uwuhrẹ na u te kuhọ no. Onana u re fiobọhọ k’owhẹ ru uwuhrẹ ẹkpoka na re ababọ eghoro. Dhesẹ kẹ ọmọ-uwuhrẹ na nọ evaọ ukuhọ riẹ a te kẹ iyo enọ riẹ buobu nọ o wo nọ uwuhrẹ na o be nyaharo na.—Riwi School Guidebook, ẹwẹ-obe 94, edhe avọ 14.
6 Otẹrọnọ ọmọ-uwuhrẹ na ọ gbẹ dadamu ewuhrẹ Esanerọvo, ẹwẹ nọ o re whu hu, erae ehẹle, hayo iwuhrẹ erue itieye na jọ, yọ eware nọ a dhesẹ evaọ obe Eriariẹ na e vọ riẹe eva ha, whọ rẹ sae kẹe obe ọ Reasoning na hayo obe ọfa nọ o t’ẹme te uzoẹme na. Vuẹe nọ whọ te t’ẹme kpahe uzoẹme na kugbei okenọ o te roro kpahe eware nọ o se na no.
7 Re a rehọ olẹ ọkpọvio gbe oghale Jihova ro mu uwuhrẹ na họ je kuhọ u re fi ọghọ họ uwuhrẹ na, o rẹ lẹliẹ ohwo rọ udu kpotọ, o vẹ jẹ rẹriẹ iroro mai kpohọ Jihova wọhọ Owuhrẹ uzẹme na. (Jọn 6:45) Otẹrọnọ ọmọ-uwuhrẹ na o gbe bi se utaba, whọ sae vuẹe nọ ọ seba evaọ etoke uwuhrẹ na.—Iruẹru 24:16; Jem. 4:3.
8 Rehọ Ikereakere na, Etadhesẹ, gbe Enọ Ọkiẹkpemu Wuhrẹ avọ Ẹgba: Makọ unuẹse nọ owuhrẹ na ọ ruẹrẹ oria uwuhrẹ họ te no vẹre, owuhrẹ nọ o wo ona ọ rẹ kiẹ uwuhrẹ ọvuọvo kpemu avọ ọmọ-uwuhrẹ ọvuọvo nọ o re wo họ iroro. Onana u re fiobọhọ nọ o re ro rẹro enọ ọmọ-uwuhrẹ na. Re a wuhrẹ avọ ẹgba, wo eriwo ovevẹ igogo-eme nọ e rọ uzou na. Se ikereakere na re whọ riẹ epanọ i kie kpahe oria uwuhrẹ na te, re whọ riẹ enọ i fo nọ a re se evaọ etoke uwuhrẹ na. Roro kpahe epanọ whọ sae rọ rehọ etadhesẹ gbe enọ ọkiẹkpemu wuhrẹ evaọ ukuhọ uzou na.
9 Ẹkwoma ikereakere na o ro ruiruo avọ ẹgba, who ti fiobọhọ kẹ ọmọ-uwuhrẹ na vuhumu nọ o bi ghine wuhrẹ Ebaibol na. (Iruẹru 17:11) Nọ who bi fi ẹkpẹti na “Rehọ Ebaibol Ra Ruiruo Ziezi” h’iruo na, evaọ ẹwẹ-obe 14 ọrọ obe Eriariẹ na, wuhriẹe epanọ o re ro duku ikereakere. Dhesẹ epanọ a re ro vuhu awọ Ebaibol nọ a wariẹ fihọ eva uwuhrẹ na. Oke o tẹ riẹ, rovie je se ikereakere nọ a riobọhọ na nọ a wariẹ hẹ. Ru ọmọ-uwuhrẹ na re ọ kpahe ẹme fihọ oghẹrẹ nọ ikereakere na e rọ thauke hayo ru eme nọ e rọ edhe na vevẹ. Fiẹgba họ iye-eme nọ i w’uzou evaọ eme na re o vuhu aghare ẹjiroro igogo-eme uwuhrẹ na. (Neh. 8:8) Evaọ abọ buobu, u du fo re owuhrẹ na o fi eria ikere efa ba uwuhrẹ na ha o tẹ vrẹ enọ e rọ obe na no. T’ẹme kpahe aghare ẹriẹ edẹ gbe ẹruẹrẹhọ ebe Ebaibol na. O rẹ sae fiobọhọ re ọmọ-uwuhrẹ na o se ẹwẹ-obe 27-30 ọ Uwou-Eroro Na ọrọ June 15, 1991 (ọrọ Oyibo). U te fo, tudu họ ero ruiruo Ebaibol ọ New World Translation. Whọ rẹ sae rehọ ẹmẹrera dhesẹ epanọ a rẹ rehọ eware sa-sa nọ e riẹe eva ruiruo, wọhọ edhesẹ ikere efa gbe ọkiẹ-dhesẹ eme Ebaibol riẹ.
10 Uwuhrẹ avọ 34 evaọ obe na Theocratic Ministry School Guidebook u dhesẹ nọ ọtadhesẹ o rẹ kpare iroro ohwo u ve ruei lọhọ re ọ riẹ otọ iroro ekpokpọ. E rẹ gba isiuru iroro gbe ọwhọ kugbe, re e sae wha ovuẹ na avọ ẹgba nọ eme hayo izẹme gheghe e rẹ sai wha ha. (Mat. 13:34) Obe Eriariẹ na u wo iwuhrẹ ọtadhesẹ buobu nọ e rọ lọlọhọ je wo ẹgba. Wọhọ oriruo, ọtadhesẹ nọ a fihọ iruo evaọ uzou 17 o bọ ovuhumuo epanọ, evaọ otoriẹ ẹzi, Jihova ọ rẹ rọ kẹ emuore, emuosẹ, gbe uwou ẹkwoma ukoko Ileleikristi na. A rẹ sae rehọ ifoto ọtadhesẹ obe Eriariẹ na ruiruo nọ u w’ẹgba rọ kpare iroro. Evaọ otọ uzoẹme osese na “Ẹkparomatha Oghọghọ Na,” evaọ ẹwẹ-obe 185, ogaga ọ edhe-ẹme avọ 18 o rẹ te rro haro ẹkwoma ọmọ-uwuhrẹ na nọ ọ rẹ wariẹ riwi ifoto nọ e rọ ẹwẹ-obe 86. Onana o rẹ sae wọe roro kpahe ẹkparomatha na wọhọ oware imuẹro evaọ otọ Uvie Ọghẹnẹ.
11 U fo re emọ-uwuhrẹ Ebaibol a ru ẹnyaharo ẹzi evaọ uwuhrẹ ọvuọvo. Fiki onana, whọ nyase enọ ọkiẹkpemu na ba ha evaọ ẹkpẹti enọ “Dawo Eriariẹ Ra” nọ e rehọ oma via evaọ ukuhọ uzou kpobi. Gaviezọ kẹ ọmọ-uwuhrẹ na sọ o ghine wo otoriẹ iyo egbagba eware nọ a wuhrẹ na. A ru ona họ enọ enana buobu re i si iyo obọ ohwo nọ i no udu ze. Wọhọ oriruo, riwi ẹwẹ-obe 31, oria nọ a jọ nọ ọmọ-uwuhrẹ na nọ: “Didi ekwakwa Jihova Ọghẹnẹ e mai siowhẹ urru?”—2 Kọr. 13:5.
12 Wuhrẹ Emọ-Uwuhrẹ re A Ruẹrẹ Oma họ kẹ Uwuhrẹ Na: Ọmọ-uwuhrẹ nọ ọ rẹ kaki se uwuhrẹ na, kpoka họ iyo na, je roro kpahe epanọ ọ te rọ k’iyo na evaọ eme obọ riẹ o re ru ẹnyaharo ẹzi vẹrẹ. Ẹkwoma oriruo gbe uduotahawọ ra, whọ rẹ sae wuhriẹe re ọ ruẹrẹ oma họ kẹ uwuhrẹ na. Dhesẹ obe ra kẹe, onọ whọ jọ kpoka họ hayo siusi wariẹ igogo-eme gbe uye-eme na. Dhesẹ epanọ a rẹ rọ gwọlọ iyo kẹ enọ na. Omaruẹrẹhọ kugbei uzou jọ o sae fiobọhọ kẹ ọmọ-uwuhrẹ na. Tudu hiẹe awọ re ọ k’iyo evaọ eme obọ riẹ. Erei ọvo o re ro dhesẹ sọ o wo otoriẹ eme na. Otẹrọnọ o se uyo na no obe na ze, whọ sae dhobọ te iroro riẹ whọ vẹ nọe epanọ ọ sae ro dhesẹ ẹme ọnana kẹ omọfa evaọ ẹme obọ riẹ.
13 Tudu họ ọmọ-uwuhrẹ na awọ re o se ikereakere nọ a dhesẹ nọ a wariẹ hẹ wọhọ abọ omaruẹrẹhọ riẹ, fikinọ oke o te jariẹ re a se oma rai kpobi evaọ etoke uwuhrẹ na ha. Jiri iei kẹ omodawọ nọ o bi ru evaọ iwuhrẹ riẹ. (2 Pita 1:5; riwi Uwou-Eroro Na ọrọ August 15, 1993 [ọrọ Oyibo], ẹwẹ-obe 13-14, rọkẹ iroro efa kpahe oware nọ te owuhrẹ gbe ọmọ-uwuhrẹ a re ru re a wo ẹvi evaọ ewuhrẹ Ebaibol.) Evaọ edhere ọnana, a bi wuhrẹ ọmọ-uwuhrẹ na jẹ ruẹriẹe họ re ọ kẹ emamọ iyo evaọ iwuhrẹ ukoko na. O ve mu oghẹrẹ nọ a re ro ru emamọ uwuhrẹ om’obọ ohwo họ ewo nọ u re ru ei thomavẹrẹ re o gbe ru ẹnyaharo evaọ uzẹme na nọ ewuhrẹ Ebaibol evaọ obe Eriariẹ riẹ o te re no.—1 Tim. 4:15; 1 Pita 2:2.
14 Kpọ Ọmọ-Uwuhrẹ Kpohọ Ukoko Jihova: O rọ owha-iruo oru-ilele re ọ kpọ isiuru ọmọ-uwuhrẹ na kpohọ ukoko Jihova. Ọmọ-uwuhrẹ na ọ rẹ mae nyaharo kpatakpata kpohọ ẹkpako ẹzi otẹrọnọ ọ riẹ je vuhu aghare ukoko na je vuhu ẹgwọlọ riẹ re ọ jọ omọvo riẹ. Ma gwọlọ nọ ọ ruẹ omawere evaọ usu kugbe ahwo Ọghẹnẹ re o je wo irẹro nọ ọ te jọ kugbe omai evaọ Ọgwa Uvie, oria nọ ọ rẹ sae jọ wo obufihọ ẹzi gbe ọbọga nọ ukoko Ileleikristi ọ rẹ kẹ.—1 Tim. 3:15.
15 Ibroshọ na Jehovah’s Witnesses—Unitedly Doing God’s Will Worldwide a ru rie re o jọ ọjọriẹ kẹ ahwo kpahe ukoko ọvo nọ a rẹ ruẹ nọ Jihova o bi ro ruiruo nẹnẹ re o ru oreva riẹ gba. Nọ uwuhrẹ na o tẹ kpomamu no, eme jabọ who gbe fi obe jọ họ ada kẹ ọmọ-uwuhrẹ na ha? No emuhọ ze, gbẹ hae zizie ọmọ-uwuhrẹ na kpohọ iwuhrẹ na. Dhesẹ epanọ a re ru iwuhrẹ na. Whọ rẹ sae vuẹe uzoẹme ovuẹ ogbotu n’otha hayo dhesẹ uzoẹme nọ a bi ti Wuhrẹ evaọ Uwou-Eroro na. Whọ rẹ sae su ei re ọ nyae ruẹ Ọgwa Uvie na evaọ okenọ a bi ru ewuhrẹ hẹ re u si awa ọ ẹnya kpohọ oria okpokpọ evaọ ọtonya noi oma. Whọ rẹ sae j’ofa riẹ kpohọ iwuhrẹ na. Okenọ ọ tẹ ze ewuhrẹ, dede iei rehọ je ru ei oma sasa. (Mat. 7:12) Dhesiẹe kẹ Isẹri efa, kugbe ekpako ukoko na. Avọ irẹro, o ti mu ukoko na họ eriwi wọhọ uviuwou ẹzi riẹ. (Mat. 12:49, 50; Mak 10:29, 30) Whọ rẹ sae fi ute họ kẹe, wọhọ ekpohọ ewuhrẹ ọvo evaọ ẹkpoka, whọ vẹ rehọ ẹmẹrera kpare ute na.—Hib. 10:24, 25.
16 Nọ obe uwuhrẹ Ebaibol na o be nyaharo evaọ obe Eriariẹ na, fiẹgba họ abọ nọ u fi elo họ ẹgwọlọ usu nya kugbe ukoko na kẹse kẹse evaọ iwuhrẹ. Maero muẹrohọ ewẹ-obe 52, 115, 137-139, 159, gbe uzou 17. T’ẹme te ovuhumuo odidi obọra kẹ ukoko Jihova. (Mat. 24:45-47) T’ẹme owoma kpahe ukoko oria rai na gbe eware nọ who wuhrẹ evaọ iwuhrẹ na no. (Ol. 84:10; 133:1-3) U re woma otẹrọnọ ọmọ-uwuhrẹ na ọ sae riwi ividio ọ Ukoko-Ulogbo, muhọ kugbe ọrọ Jehovah’s Witnesses—The Organization Behind the Name. Rọkẹ ẹjiroro efa kpahe epanọ a rẹ rọ kpọ isiuru kpohọ ukoko na, riwi Uwou-Eroro Na ọrọ November 1, 1984, ẹwẹ-obe 14-18, gbe uko obeva ọ Odibọgba Uvie Mai ọrọ July 1993 (erọ Oyibo).
17 Tudu họ Ọmọ-Uwuhrẹ Awọ re O Sisẹi kẹ Amọfa: Ute nọ ma bi ro wuhrẹ kugbe ahwo họ re ma ru ilele nọ i re se isẹi kẹ Jihova. (Aiz. 43:10-12) Oyena u dhesẹ nọ owuhrẹ na ọ rẹ tudu họ ọmọ-uwuhrẹ na awọ re ọ ta kẹ amọfa kpahe eware nọ o bi wuhrẹ no Ebaibol na ze. A rẹ sae ru onana lọlọhọ ẹkwoma ẹnọ nọ: “Ẹvẹ who re dhesẹ onana kẹ uviuwou ra?” hayo “Ikereakere vẹ who re ro dhesẹ uzẹme onana kẹ ogbẹnyusu?” Fiẹgba họ eria nọ i w’uzou evaọ obe Eriariẹ na nọ a jọ tudu họ isẹri-ise, wọhọ ewẹ-obe 22, 93-95, 105-106, jegbe uzou 18. Okenọ u te fo, whọ rẹ sae kẹ ọmọ-uwuhrẹ na emebe-evẹvẹ jọ nọ o re ro ru isẹri-ise ọnyakuo kugbe amọfa. Jiroro kẹe nọ o zizie ahwo iviuwou riẹ re a keria kugbei evaọ uwuhrẹ riẹ. Kọ o wo egbẹnyusu nọ e te gwọlọ wuhrẹ? Ta kẹe nọ o dhesẹ ahwo nọ i wo isiuru k’owhẹ.
18 Ẹkwoma ẹnyaze Isukulu Odibọgba Ọghẹnẹ gbe Uwuhrẹ Odibọgba na, ọnọ ọ te jọ olele na ọ rẹ sae wo ewuhrẹ ọfa gbe ajọwha nọ u ti fiobọhọ kẹe zihe ruọ owhowho-uvie emamọ usi na. Okenọ o te dhesẹ isiuru riẹ kpahe odẹ kere fihọ isukulu hayo ezihe ruọ owhowho-uvie nọ ọ re họ-ame he, ute nọ a fihọ otọ evaọ ẹwẹ-obe 98 gbe 99 evaọ obe ọ Our Ministry na u ti w’iruo. Otẹrọnọ abọ uzuazọ riẹ jọ o whaha ete riẹ, whọ rẹ sae kiẹ ebe Ukoko-Ulogbo na rọ kẹ eme obufihọ nọ i w’abọ kpahe ẹme na whọ vẹ rehọ ai leliei t’ẹme. Wọhọ oriruo, ọmọ-uwuhrẹ ọ rẹ sae wo ẹbẹbẹ evaọ obusino utaba hayo imu egaga nọ e reria obọ no. Obe ọ Reasoning na o riobọ họ eme egaga Ikereakere nọ e rẹ suẹe nọ Ileleikristi e jẹ whaha iruemu enwoma itieye na, yọ evaọ ẹwẹ-obe 112 u dhesẹ edhere obokparọ nọ a re ro fiobọhọ kẹ amọfa re a sae siobọno uruemu na. Lẹ kugbe ei kpahe ẹme na, wuhriẹe re ọ bọ ẹrorọsuọ họ Jihova rọkẹ obufihọ.—Jem. 4:8.
19 Owọ nọ a re lele re a riẹ sọ ohwo o te re o w’abọ evaọ odibọgba ẹgbede a dhesi rie fihọ Uwou-Eroro Na, ọrọ February 1, 1996, ẹwẹ-obe 9, edhe avọ 6. Ọmọ uwuhrẹ na o te te, o rẹ jọ oware obọfihọ re a ruẹrẹ oma họ kugbei kẹ ẹdẹ ọsosuọ usiuwoma ota. Avọ omaurokpotọ, t’ẹme kpahe uruemu gbe unoma ahwo nọ e vọ oria kpobi evaọ ẹkuotọ ra. O tẹ lọhọ mu ei họ evaọ iruo n’uwou ruọ uwou, jẹ rehọ ẹmẹrera wuhriẹe evaọ abọ odibọgba efa. Otẹrọnọ who ru ẹmeọta ra kpẹkpẹe lọlọhọ, o rẹ vẹrẹ kẹe re ọ raro keliei. Wo ọbọga avọ uduotahawọ, dhesẹ oghọghọ evaọ iruo na, re ọ riẹ kpahe uruemu oghọghọ ra jẹ raro keliei. (Iruẹru 18:25) Ute olele ọkpokpọ o rẹ jọ re ọ jọ owhowho-uvie emamọ usi ajọwha, ekẹse kẹse. Whọ rẹ sae fiobọhọ kẹe re o ru oma-iruo nọ a rẹ sae nya lele. Re ọ nyaharo evaọ ẹgba isẹri ise riẹ kẹ amọfa, whọ rẹ sae jiroro kugbei nọ o se Uwou-Eroro uvitha ọ August 15, 1984, ẹwẹ-obe 15-25; July 15, 1988, ẹwẹ-obe 9-20; January 15, 1991, ẹwẹ-obe 15-20; gbe January 1, 1994, ẹwẹ-obe 20-25 (erọ Oyibo).
20 Fi Ọwhọ họ Emọ-Uwuhrẹ Kpahe Omaromudhe gbe Ame-Ọhọ: O rẹ sae lọhọ re ọmọ-uwuhrẹ udu oruọzewọ o wuhrẹ ziezi ẹkwoma ewuhrẹ obe Eriariẹ na re o ru omaromudhe riẹ kẹ Ọghẹnẹ je te kẹ ame-ọhọ. (Wawo Iruẹru 8:27-39; 16:25-34.) Ghele na, taure oma o tẹ te wọ ohwo re o ru omaromudhe, o gwọlọ nọ ọ rẹ roma kẹ Jihova. (Ol. 73:25-28) Evaọ etoke ewuhrẹ na kpobi, gwọlọ uvẹ nọ whọ rẹ rọ bọ ovuhumuo riẹ kẹ ekwakwa-aghae Jihova. T’ẹme te iroro ididi ra kpahe Ọghẹnẹ. Fiobọhọ kẹ ọmọ-uwuhrẹ na re o roro kpahe abọ ewo usu oruọruọ kugbe Jihova. Ọ tẹ ghinẹ riẹ je wo uyoyou kẹ Ọghẹnẹ, ọ te gọ’E avọ ẹrọwọ, keme omarọkẹ Ọghẹnẹ u re w’abọ kpahe epanọ o romai oma kpahe Jihova wọhọ ohwo.—1 Tim. 4:7, 8; riwi School Guidebook, ẹwẹ-obe 76, edhe avọ 11.
21 Daoma te udu ọmọ-uwuhrẹ na. (Ol. 119:11; Iruẹru 16:14; Rom 10:10) U fo re ọ ruẹ epanọ uzẹme na u kpoma hiẹe te re ọ jẹ jiroro oware nọ ọ rẹ rehọ eware nọ o wuhrẹ ru. (Rom 12:2) Kọ ọ ghinẹ rọwo uzẹme nọ a bi dhesẹ kẹe k’oka k’oka? (1 Tẹs. 2:13) Fikiere, whọ rẹ sae riẹ eva ọmọ-uwuhrẹ na ẹkwoma enọ eriwo riẹ, wọhọ: Ẹvẹ onana o rọ owhẹ oma? Ẹvẹ whọ sae ro fi onana họ iruo evaọ uzuazọ ra? Ẹkwoma uyo riẹ whọ rẹ sae riẹ oria nọ ọ jẹ mae gwọlọ obọfihọ re a nyate udu riẹ. (Luk 8:15; riwi School Guidebook, ẹwẹ-obe 52, edhe avọ 11.) Izoeme ifoto nọ e rọ ẹwẹ-obe 172 gbe 174 evaọ obe Eriariẹ na e nọ inọ: “Kọ whọ rehọ oma ra mudhe kẹ Ọghẹnẹ no evaọ olẹ?” gbe “Eme ọ be whaha owhẹ ame-ọhọ?” Enana e rẹ sae wọ ọmọ-uwuhrẹ na kpohọ owojẹ.
22 Epanọ a re ru okenọ owhowho-uvie nọ ọ re họ-ame he ọ tẹ gwọlọ họ-ame a kere i rie fihọ Uwou-Eroro Na ọrọ February 1, 1996, ẹwẹ-obe 10, edhe avọ 9. A kere obe Eriariẹ na avọ ẹjiroro ohwo ruẹrẹhọ kẹ iyo “Enọ kẹ Ahwo nọ A Gwọlọ Họ-Ame,” nọ a rẹ ruẹ evaọ abefẹ obe ọ Our Ministry na, nọ ekpako ukoko a rẹ rọ kiẹe riwi. Otẹrọnọ who fiẹgba họ iyo enọ na evaọ obe Eriariẹ na, ọmọ-uwuhrẹ na ọ rẹ thomavẹrẹ ziezi kẹ abọ enọ nọ ekpako ukoko na a ti ru kugbei rọ ruẹriẹe họ kẹ ame-ọhọ riẹ.
23 Fiobọhọ k’Ahwo nọ A Ru Obe Uwuhrẹ Ebaibol Re No: U fo re a rẹro nọ bọo okenọ ohwo o ti wuhrẹ obe Eriariẹ na re no, yọ ọriẹruo gbe ekodo isiuru riẹ kpahe ẹgọ Ọghẹnẹ e roma via no. (Mat. 13:23) Oyejabọ nọ uzoẹme osese urere obe na o jẹ nọ inọ, “Eme Who Ti Ru?” Edhe-eme urere na i ru ọmọ-uwuhrẹ na tẹro vi usu nọ u fo nọ o re wo kugbe Ọghẹnẹ, ẹgwọlọ nọ o re ro fi eriariẹ nọ o wuhrẹ họ iruo, gbe ẹgwọlọ nọ ọ rẹ rọ jowọ vẹrẹ ro dhesẹ uyoyou riẹ kẹ Jihova. Ọruẹrẹfihotọ ọvo ọ riẹ hẹ re a wuhrẹ obe ọfa kugbe ahwo nọ a wuhrẹ obe Eriariẹ na re no. Rehọ uwowou dhesẹ vevẹ kẹ ọmọ-uwuhrẹ nọ ọ jowọ kẹ eriariẹ Ọghẹnẹ hẹ kpahe oware nọ o re ru re ọ nyaharo evaọ ẹzi. Whọ rẹ sae wẹriẹ oria riẹ otiẹse, who re rovie edhere kẹe re ọ sae jowọ nọ u re su kpohọ uzuazọ ebẹdẹ bẹdẹ.—Okoko. 12:13.
24 Olele ọkpokpọ nọ o dede uzẹme na rehọ jẹ họ-ame no o gbe wo ẹnyaharo buobu nọ o re ru evaọ eriariẹ gbe otoriẹ re ọ sae kpomamu evaọ ẹrọwọ na. (Kọl. 2:6, 7) Ukpenọ who re gbe ru obe uwuhrẹ Ebaibol kugbei nọ wha te wuhrẹ obe Eriariẹ na re no, whọ rẹ sae fialoma ra via kẹe re whọ kẹ obọfihọ nọ ọ gwọlọ re ọ sae kpako evaọ ẹzi. (Gal. 6:10; Hib. 6:1) Evaọ abọ riẹ, ọ rẹ sae ru otoriẹ riẹ gba ẹkwoma isase Ebaibol ekẹdẹ kẹdẹ, ewuhrẹ Uwou-Eroro Na gbe ebe efa nọ ‘ọrigbo ẹrọwọ’ na o kporo kẹ omobọ riẹ, omaruẹrẹhọ gbe ekpohọ iwuhrẹ, je gbiku uzẹme na kugbe ibe enọ e rọwo. (Mat. 24:45-47; Ol. 1:2; Iruẹru 2:41, 42; Kọl. 1:9, 10) Ese obe ọ Our Ministry riẹ gbe efihọ iruo eware nọ e riẹ eva o rẹ suẹe ze nọ o je w’abọ buobu re ọ jọ gaga evaọ ukoko Ọghẹnẹ re o ru odibọgba riẹ gbunu ziezi.—2 Tim. 2:2; 4:5.
25 Wuhrẹ Ona Ahwo O Wuhrẹ: A vi omai no re ma ‘ru ilele ahwo . . . , je wuhrẹ ai.’ (Mat. 28:19, 20) Nọ ona ewuhrẹ u wo ohẹriẹ no ilele ru hu na, ma gwọlọ wuhrẹ re ma nyaharo wọhọ iwuhrẹ. (1 Tim. 4:16; 2 Tim. 4:2) Rọkẹ ẹjiroro efa kpahe epanọ a re ro wuhrẹ ona ewuhrẹ, whọ rẹ sae se: “Developing the Art of Teaching” (Ewuhrẹ Ona Ahwo O Uwuhrẹ) gbe “Reaching the Heart of Your Listeners” (Te Udu Enọ E be Gaviezọ kẹ Owhẹ) evaọ obe ọ School Guidebook, iwuhrẹ avọ 10 gbe ọrọ avọ 15; “Teacher, Teaching” (Owuhrẹ, Ewuhrẹ) evaọ obe ọ Insight, Uko avọ 2; gbe uzoẹme Uwou-Eroro na “Building With Fire-Resistant Materials” (Bọ avọ Eware nọ Erae e rẹ Mahe He) gbe “When You Teach, Reach the Heart” (Okenọ Who bi Wuhrẹ, Te Udu Na), ukere August 1, 1984; “Do You Effectively Reason From the Scriptures?” (Kọ Whọ be Jiroro No Ikereakere na Ze avọ Ẹgba?), ukere March 1, 1986; gbe “How to Find Joy in Disciple Making” (Epanọ Who re ro Duku Oghọghọ Evaọ Eruo Ilele), ukere February 15, 1996 (erọ Oyibo).
26 Nọ whọ be daoma ru ilele na, avọ obe Eriariẹ nọ who bi ro ruiruo na, hae lẹ nọ Jihova, ọnọ “o ru rie i ro,” ọ ghale omodawọ ra evaọ emamọ usi Uvie na nọ who re ru nyate idu ahwo. (1 Kọr. 3:5-7) Jọ who wo oghọghọ nọ u re no ewuhrẹ amọfa ze re a wo otoriẹ, vuhumu, jẹ jowọ kpahe eriariẹ nọ i re su kpohọ uzuazọ ebẹdẹ bẹdẹ!