Ẹvẹ Mẹ Sae Rọ Ruẹ Ọnọ Ọ Rẹ Gaviezọ?
1 Evaọ okpẹwho Filipai, ‘aye jọ nọ a re se Lidia, ọhreki ehọ pọpol, . . . ọ jẹ gaviezọ, Jihova o te rovie eva riẹ re o yo ẹme nọ Pọl ọ jẹ ta.’ (Iruẹru 16:14) Eme ekere ọnana o wuhrẹ omai? Ezọgaviẹ họ oware nọ u re rovie ẹthẹ kẹ ohwo re o wuhrẹ uzẹme na. Obọkparọ mai evaọ ẹghale usi Uvie na o kake roma-rẹrẹ unevaze ọnọ o wo uwou na re ọ gaviezọ. Ma tẹ nwane ruẹ ohwo nọ ọ be gaviezọ no, o rẹ jọ lọlọhọ re ma kẹ ovuẹ mai. Rekọ re ma ru ohwo gaviezọ o rẹ sae jọ gaga. Eme ma rẹ sai ru?
2 Taure ma te ti w’abọ evaọ usiuwoma ota, u fo re ma rẹro te ugboma mai gbe ekwakwa nọ ma ti ro ruiruo. Fikieme? Ahwo a rẹ mae gaviezọ kẹ ohwo nọ o wo oma ọghọ. Kọ ma gẹgọ owowoma jẹ rọ kpatiẹ? Dede nọ ẹgọ ewhọwhọhọ e rọ odode evaọ akpọ na, ma rẹ whaha uruemu utioye na keme mai yọ egbodibo nọ i dikihẹ kẹ Uvie Ọghẹnẹ. Eriwo ọfuafo mai u re fiba ujiro ovuẹ Uvie nọ ma bi whowho.
3 Jọ Whẹtiẹwhẹtiẹ avọ Adhẹẹ: Makinọ iruemu inẹnẹ i bi nwene, ahwo buobu a gbe wo adhẹẹ rọ kẹ Ebaibol na yọ a rẹ te kẹ emamọ uyo rọ kẹ ẹmeọta ọwhẹwhẹtiẹ avọ adhẹẹ kpahe eware nọ e rọ Ebaibol na. Oma nọ a re ru sasasa gbe ehwẹ, e rẹ sae lẹliẹ udu ọnọ o wo uwou na t’otọ je rovie edhere ẹmeọta evawere. U fo re ọriẹruo gbe emamọ uruemu mai i dhesẹ oma via evaọ ẹme-unu mai, nọ u kugbe ezọgaviẹ mai avọ adhẹẹ rọ kẹ eriwo ọnọ o wo uwou na.
4 Ẹjiroro mai họ re ma ghale ẹruore Ebaibol na kugbe amọfa. Ma te wo onana họ iroro, u re fo re u mu omai ẹro nọ ẹmeọta mai u wo isiuru, orọnikọ o rẹ jọ avọ egrẹ hayo use-abọ họ. U fo re ma raha oke kugbe ohwo ọwọsuọ nọ ọ rẹ vro-avro ho. (2 Tim. 2:23-25) Ma sae salọ idhesẹvia oghoghẹrẹ sa-sa nọ i fo nọ e rọ evaọ Odibọgba Uvie Mai gbe obe ọ Reasoning na. Dede, u fo re ma ruẹrẹ enana họ ziezi re ma sae t’ẹme ọruọruọ evaọ edhere imuẹro.—1 Pita 3:15.
5 Nọ iweze mai e tẹ vrẹ no, umutho ahwo nọ i wo uwou na eye e rẹ sae kareghẹhọ eme nọ ma ta gbagba. Ghele na, unwenọ oma rai kpobi a rẹ sae kareghẹhọ uruemu nọ ma rọ t’eme na. Ma re riwi ogaga ewoma gbe uwowou karabe vievie he. Uzẹme riẹ họ ahwo nọ i wo oma igodẹ buobu e vọ ẹkuotọ mai nọ e te gaviezọ kẹ uzẹme na wọhọ epanọ Lidia o ru evaọ ikpe-udhusoi ọsosuọ. Ma tẹ rẹro te ugboma gbe uruemu ẹmeọta mai o rẹ sae tudu họ ahwo evezi awọ re a gaviezọ kẹ Ẹme Ọghẹnẹ jẹ rehọ evawere dede iei rehọ.—Mak 4:20.