Ono O Te kẹ Usiuwoma Ota?
1 Rọ kpahe odibọgba na, kọ oma u ru owhẹ no ẹdẹjọ wọhọ Mosis? Ọ ta nọ: “O ỌNOWO mẹ, mẹ rọ ọgbẹme he makọ enẹna hayo anwọ okenọ whọ rọ ta kẹ odibo ra.” (Ọny. 4:10) O tẹ rọ owhẹ oma erei, whọ rẹ sai si uke kpemu. Ghele, Jesu ‘o jie uzi k’omai re ma vuẹ ahwo na je sisẹri muotọ.’ (Iruẹru 10:42) Fikiere ẹvẹ ma sae ro te wọhọ evuovuẹ emamọ usi na?
2 Orọnikọ epanọ ma kpohọ isukulu te u re ru omai te kẹ odibọgba na ha. Pọl ọ ta nọ ‘orọnikọ ibuobu nọ i wo areghẹ akpọ a se he’ gbe nọ “areghẹ akpọ ọnana ugheghẹ obọ Ọghẹnẹ.” (1 Kọr. 1:26; 3:19) Jesu ọ salọ ikọ riẹ no udevie otu nọ o wo okọ obọ rai ze—o tẹ make kao ene rai iye kpe họ okọ rai. Isu egagọ omoya na a je riwi ai avọ ọjẹfiẹ wọhọ ahwo nọ ‘a wuhrẹ hẹ gbe ahwo gheghe.’ A tẹ rehọ ute obọ akpọ riwi ai, ikọ na a te kẹ usiuwoma ota ha. Ghele, ona ẹmeọta Pita nọ o ru eva ẹdẹ Pẹntikọst o wọ ahwo 3,000 nọ a rọ họ-ame!—Iruẹru 2:14, 37-41; 4:13.
3 Jihova O Ru Omai Te re Ma Ta Usiuwoma: Pọl o whowho nọ: “Ete mai obọ Ọghẹnẹ o nọze.” (2 Kọr. 3:5) Jihova, Ehri areghẹ na, o bi wuhrẹ ima ahwo buobu re a whowho uzẹme Uvie na kẹ amọfa. (Aiz. 54:13) Ẹgba gbe ẹvi iruo nana a rẹ sae rue riẹ evaọ ahwo 338,491 nọ e họ-ame ukpe n’ukpo wọhọ ‘ebe ajiri’ nọ e be rria. (2 Kọr. 3:1-3) Ma wo ẹjiroro kpobi nọ ma re ro whowho avọ aruọwha gbe imuẹro kpahe eware nọ ma wuhrẹ no obọ Jihova ze.
4 Ukoko Ọghẹnẹ o rehọ ọruẹrẹfihotọ ewuhrẹ akpọ soso mu no kẹ egbodibo. Ẹkwoma Ikereakere na gbe ebe sa-sa erọ obufihọ ewuhrẹ Ebaibol, a wuhrẹ je fi omai họ isukulu no re ma ‘ruẹse gba kiete, jẹ thomavẹre’ kẹ usiuwoma ota. (2 Tim. 3:16, 17) Oma o were ahwo buobu kpahe eriariẹ ewuhrẹ nọ a ruẹ evaọ ebe Ukoko-Ulogbo na no. Wọhọ oriruo, obe usi ọ ahwo Sweden jọ o ta nọ: “Otokiẹ-eriariẹ Ebaibol okpehru nọ o nya akpọ duwu o ye o rọ emu ọ ẹrọwọ nọ Isẹri Jihova a bi whowho.”
5 Avọ ọkpọvio nọ a be kẹ evaọ iwuhrẹ isoi ẹkpoka mai, ọruẹrẹfihotọ mai kẹ isase Ebaibol gbe ewuhrẹ, ohrẹ nọ a rẹ kẹ evaọ Isukulu Odibọgba Ọghẹnẹ na, obufihọ egbodibo efa nọ i wo otoriẹ, jẹ mae rro, uketha ẹzi ọfuafo Jihova, o rẹ sae mu omai ẹro nnọ Jihova o riwi omai wọhọ enọ i te kẹ usiuwoma ota. ‘Ẹhẹ, ma wọhọ uvi ahwo, enọ Ọghẹnẹ ọ kẹ udu, eva aro Ọghẹnẹ ma je bi dhesẹ oma mai wọhọ ahwo Kristi.’—2 Kọr. 2:17.
6 Otẹrọnọ ma rehọ uvẹ ewuhrẹ nọ Ọghẹnẹ ọ kẹ ẹkwoma ukoko riẹ, oware ovo o rẹ whae ze nọ ma je si uke kpemu hayo dhozọ họ. Ma rẹ sae ta usiuwoma kẹ amọfa avọ oghọghọ, gbe imuẹro nọ Jihova ọ te ghale omodawọ mai.—1 Kọr. 3:6.