Ẹkpẹti Onọ

◼ Eme a re ru otẹrọnọ ọnọ ọ te kẹ ovuẹ ogbotu ọ gbẹ kake nyaze ewuhrẹ hẹ?

Evaọ otiẹse, eware jọ nọ a rẹ sae whaha ha e rẹ sae ru oniọvo nọ ọ gbẹ kake nyaze te kẹ ẹme nọ a ma-oma riẹ hẹ. Otẹrọnọ ma wo imuẹro nọ ọ te nyaze, ekpako na a rẹ sae jiroro re a mu Uwuhrẹ Uwou-Eroro na họ; Ovuẹ Ogbotu na o sae leliei. Kọ ẹvẹ o tẹ rọ vevẹ inọ ọnọ ọ te kẹ ovuẹ na ọ te nyaze he? Otiẹsejọ ọjọ evaọ udevie enọ e rẹ kẹ ovuẹ ogbotu na ọ rẹ sae kẹ ẹme kpobi nọ ọ ruẹrẹ fihọ no vẹre.

Oma-ma ẹruoke o rẹ whaha ẹbẹbẹ ọnana. U fo re ọnọ ọ rẹ sẹro oma-ẹmeọta ovuẹ ogbotu na ọ nyabru ọnọ ọ te kẹ ovuẹ na, o tẹ make kawo ẹkpoka taure ẹdẹ ẹmeọta riẹ o te ti te re ọ kareghẹhọ iẹe. Ekareghẹhọ na u re kugbe oke ewuhrẹ na, adrẹse Ọgwa Uvie na, gbe edhesẹ vevẹ kpahe epanọ a rẹ rọ nyate ọgwa na. Ọnọ o wo ẹme na ọ rẹ roma totọ kere eware enana fihọ otọ hrọ. O re se ẹme na gboja, o ve ru eruẹrẹfihotọ kpobi nọ o gwọlọ evaọ eware obọ riẹ re ọ sae ru owha-iruo riẹ gba. Otẹrọnọ oware jọ nọ ọ rẹ sae whaha ha o roma via nọ o te whahiẹe nọ ọ gbẹ te sae ru ẹme riẹ hẹ, u fo re ọ nyabru ọnọ ọ be sẹro oma-ẹmeọta na kpatakpata re a rehọ omọfa ro nwene iei. U fo re a ru omodawọ kpobi re a siọ ẹwhaha idudhe ovuẹ ogbotu na ba. Otẹrọnọ ọnọ ọ te kẹ ovuẹ ogbotu na o lehie ẹnyaze yọ ọ te rehọ umutho iminiti jọ leti, ọ rẹ daoma vi ovuẹ okpakpata se ekpako na evaọ Ọgwa Uvie na re inievo na a riẹ epanọ a re ru.

Ovuhumuo kẹ ovuẹ ogbotu, emamọ oma-ma ẹruoke gbe ekareghẹhọ, gbe emamọ orimuo u re ru ei wo imuẹro nọ ukoko na o te reawere ovuẹ ogbotu nọ o rẹ kẹ erere k’oka k’oka.