Ẹkpẹti Onọ

◼ Oghẹrẹ vẹ a rẹ rọ rehọ ole rovie Isukulu Odibọgba Esuo-Ọghẹnẹ, Ewuhrẹ Odibọgba, Ovuẹ Ogbotu, gbe Ewuhrẹ Uwou-Eroro Na, kọ ono o re ru onana?

Ile nọ a re ro mu ewuhrẹ Isukulu Odibọgba Esuo-Ọghẹnẹ na họ koka koka e rrọ Omaa Isukulu Odibọgba Esuo-Ọghẹnẹ nọ o rrọ uko-obeva Odibọgba Uvie Mai ọrọ October. Ile emuhọ gbe ekuhọ erọ Ewuhrẹ Odibọgba koka koka e rẹ jọ ẹwẹ-obe avọ 2 ọrọ Odibọgba Uvie Mai kpobi. Epọvo na re, ile nọ a rẹ so evaọ Uwuhrẹ Uwou-Eroro ẹkpoka na e rẹ jọ ẹwẹ-obe avọ 2 ọrọ uvitha Uwou-Eroro kpobi. Ile nọ a fihọ kẹ abọ ewuhrẹ ọvuọvo na yọ abọjọ ewuhrẹ yena, fikiere orọnikọ oniọvo nọ o rovie ewuhrẹ ọsosuọ na ọye o re zizie ahwo kẹ ẹsuọ ole nọ a re ro rovie ewuhrẹ avivẹ na ha.

Wọhọ oriruo, ọsẹro Isukulu Odibọgba Esuo-Ọghẹnẹ na o re dede ogbotu na rehọ, zizie ogbotu na kẹ ole emuhọ na, ru isukulu na, nọ isukulu na i je kuhọ no o ve zizie oniọvo nọ o wo abọ ọsosuọ ọrọ Ewuhrẹ Odibọgba na ziọ eplatfọmo na. Oniọvo nọ o wo abọ ọsosuọ Ewuhrẹ Odibọgba ọye o re zizie ogbotu na kẹ ole emuhọ Ewuhrẹ Odibọgba na.

Edhere ọvona ohwo-agbara o re ro rovie Ewuhrẹ Ovuẹ ogbotu na. O re dede ogbotu na rehọ sasasa o ve zizie ai re a kuomagbe so ole emuhọ nọ ohwo nọ ọ te kẹ ovuẹ na ọ salọ. Ohwo-agbara na (hayo oniọvo ọfa nọ o te nọ a ta kẹ kpahotọ) ọ vẹ lẹ olẹ emuhọ na. Ohwo-agbara na ọ vẹ fodẹ odẹ ọkovuẹ na gbe uzoẹme ovuẹ ogbotu na, je zizie ọkovuẹ na ziọ eplatfọmo na. Ovuẹ na u te kuhọ no ohwo-agbara na ọ vẹ ta eme ovuhumuo kpahe ovuẹ na kpẹkpẹe, orọnikọ ọ rẹ wariẹ igogo-eme nọ a jọ ovuẹ na ta ha. O re whowho uzoẹme ovuẹ ogbotu oka notha, ọ vẹ tuduhọ ogbotu na awọ re a gbẹ keria kẹ Uwuhrẹ Uwou-Eroro na. Otẹrọnọ okovuẹ ọrara ọ kẹ ovuẹ na, u du gwọlọ nọ ohwo-agbara na ọ rẹ nọ ogbotu na sọ a te gwọlọ vi uyere se ukoko okovuẹ ọrara na ha. Ohwo-agbara na o ve zizie oniọvo nọ o ti ru Uwuhrẹ Uwou-Eroro na ziọ eplatfọmo na.

Ọnọ o bi ti ru Uwuhrẹ Uwou-Eroro na ọ vẹ fodẹ ole nọ a bi ro mu uwuhrẹ na họ je zizie ogbotu na kẹ ẹsuọ ole na. O re ru uwuhrẹ na wọhọ epaọ ithubro nọ ukoko o kẹ, evaọ ekuhọ ọ vẹ fodẹ ole ekuhọ na. Ọnọ o ru Uwuhrẹ Uwou-Eroro na o re zizie oniọvo nọ ọ kẹ ovuẹ ogbotu na re ọ lẹ olẹ ekuhọ na.

Ma tẹ nya lele ekpọvio nana, i ti fiobọhọ kẹ omai ruẹ inọ mai kpobi ma bi ru iwuhrẹ ukoko mai evaọ edhere ọvona.