Ma Wo Owha-Iruo Usiuwoma Ota
1 Jesu o jie kẹ ilele riẹ re a ‘ru ilele ahwo erẹwho na kpobi.’ (Mat. 28:19) Evaọ ekuotọ gbe ikoliko abade nọ i bu te 232 wariẹ otọakpọ na họ, ahwo nọ a bi jiri Jihova Ọghẹnẹ nọ i bu vi ima isoi a be kẹ uvi imuẹro orọ orugba ujaje Jesu na. Kọ ẹvẹ kpahe omobọ mai? Kọ ma bi se owha-iruo usiuwoma ota mai na gboja?
2 Owha-Iruo Ezi: Owha-iruo yọ “ujaje re a ru oware nọ a gwọlọ mi ohwo.” Ma rọ otọ ujaje Kristi re ma ta usiuwoma. (Iruẹru 10:42) Pọl ukọ na ọ riẹ nọ onana u fi owha hiẹe uzou, hayo owha-iruo ezi, re o whowho usiuwoma na. (1 Kọr. 9:16) Re a rehọ oriruo dhesiẹe: Dai roro iei nọ whẹ yọ oruiruo evaọ okọ nọ u bi zue. Olori okọ na o te jeuzi k’owhẹ nọ whọ vẹvẹ ahwo nọ a rọ okọ na unu re a ruọ ekọ-adhẹzọ na. Kọ who re gbabọ kẹ ujaje oyena whọ vẹ tẹro vi esiwo omobọ ra ọvo? Vievie. Amọfa a be rẹro so owhẹ. Izuazọ rai e rọ awa. O gba owhẹ họ re who ru owha-iruo ra gba re who fiobọhọ kẹ ai.
3 Ọghẹnẹ ọ k’omai owha-iruo re ma woro unuovẹvẹ. Jihova ọ be te rehọ oba te eyero omuemu akpọ ọnana kpobi kẹle. Izuazọ ima ahwo buobu e rọ awa. Kọ u fo re ma gbolaro ku ọraha nọ ọ rọ ova dhe ahwo re ma tẹro vi epanọ ma re ro siwi omobọ mai ọvo? Vievie. O gba omai họ re ma siwi izuazọ amọfa.—1 Tim. 4:16.
4 Iriruo Ẹrọwọ nọ Ma re Lele: Izikiẹl ọruaro na ọ riẹ nọ o gba riẹ họ re ọ kẹ emọ Izrẹl nọ e kare ẹrọwọ na unuovẹvẹ. Jihova ọ nabe vẹviẹe unu kpahe oware nọ u re noi ze nọ o gbe ru owha-iruo riẹ gba ha: “Mẹ tẹ takẹ ohwo omuomu nọ, ‘Whọ rẹ te seba ewhuo ho’, whọ gbẹ vẹvẹ iẹe unu hu . . . , ohwo-omuomu ọyena o reti whuẹ eva izieraha riẹ, rekọ eva obọ ra mẹ jẹ te nekpẹ azẹ riẹ.” (Izik. 3:18) Izikiẹl ọ rehọ omarokpotọ ru iruo riẹ gba makinọ ọ rọ ova dhe ikpokpoma buobu dede. Fikiere, ọ tẹ ghọghọ okenọ ẹdhọguo Jihova ọ ze.
5 Ikpe-udhusou buobu e vrẹ no, Pọl ukọ na o te kere kpahe owha-iruo riẹ nọ ọ rẹ rọ ta usiuwoma. O whowho nọ: “Azẹ ahwo kpobi ono omẹ uzou o te omẹ hẹ, keme me si oma hemu siọ owhai ohrẹ Ọghẹnẹ ososo ba ẹhrẹ ẹdọvo ho.” Pọl ọ ta usiuwoma evaọ ẹgbede je no uwou ruọ uwou keme ọ riẹ nọ re ọ se ere ba eruo o rẹ wha abe-ọriọ sei evaọ aro Ọghẹnẹ.—Iruẹru 20:20, 26, 27.
6 Kọ ma wo ẹzẹ Izikiẹl? Kọ ọwhọ o bi mu omai ta usiuwoma wọhọ Pọl? Owha-iruo mai na o rọ epọvo na wọhọ epanọ orai o jọ. Ma re gbe ru iruo mai gba hrọ orọ ẹvẹvẹ amọfa unu, makọ ababọ osegboja, ababọ isiuru, hayo ọwọsuọ rai dede. Idu ahwo buobu a rẹ sae gbẹ kezọ kẹ usi Uvie na a ve whowho nọ: “Je oma lele owhai, keme ma yo nọ Ọghẹnẹ avọ owhai a gbẹrọ.” (Zek. 8:23) Jọ uyoyou mai kẹ Ọghẹnẹ gbe ọrivẹ mai o wọ omai re ma siọ eri ba esehọ. Ma wo owha-iruo usiuwoma ota!