W’Abọ Evaọ Iruo nọ A te Wariẹ Ru Vievie He Na
1 Evaọ oke sa-sa evaọ etoke ikuigbe ohwo-akpọ, o jọ oware nọ u fo re Jihova o bruoziẹ kpe ewegrẹ riẹ. Ghele, fiki ohrọoriọ riẹ, ọ kẹ erọ udu-oruọzewọ uvẹ re a wo usiwo. (Ol. 103:13) Ẹmeoyo rai oye u dhesẹ sọ a rẹ zọ.
2 Wọhọ oriruo, taure Ẹvo na ọ tẹ te via, evaọ 2370 B.C.E., Noa ọ jọ “ọvuẹovuẹ ẹrẹreokie.” Ahwo nọ i gbabọkẹ unuovẹvẹ Ọghẹnẹ họ enọ i whu. (2 Pita 2:5; Hib. 11:7) Taure a tẹ te raha Jerusalẹm evaọ 70 C.E., Jesu o dhesẹ vevẹ owọjẹ nọ a te gwọlọ mi ohwo kpobi nọ ọ gwọlọ dhẹvabọ no ọraha nọ o ti te okpẹwho na. Ahwo kpobi nọ a se unuovẹvẹ riẹ a ruẹ uye ulogbo. (Luk 21:20-24) A wariẹ unuovẹvẹ gbe oziẹobro Ọghẹnẹ itieye na ẹsibuobu no evaọ ikuigbe.
3 Iruo Unuovẹvẹ Oke Mai Nana: U kri no nọ Jihova o ro whowho nọ o ti ku ofu riẹ ku eyero omuomu inẹnẹ na gbe nọ ahwo omarokpotọ ọvo a te zọ. (Zẹf. 2:2, 3; 3:8) Oke nọ a re ro whowho ovuẹ unuovẹvẹ ọnana o be dhẹ te oba no! “Uye ulogbo” na o nwane rọ obaro, yọ a bi koko enọ i kiẹrẹe na họ. Uzẹme, “idhu” na e “fa no kẹ evuo.” Fikiere, a rẹ sae rehọ iruo ọfa wawo onana ha wọhọ onọ o mai wuzou jẹ kpata.—Mat. 24:14, 21, 22; Jọn 4:35.
4 Ma re w’abọ hrọ evaọ ewhowhovia unuovẹvẹ oke mai nana kẹ amọfa, ‘sọ a ti yo hayo a ti yo ho.’ Onana yọ iruo nọ Ọghẹnẹ ọ k’omai, onọ ma re rri vo vievie he. (Izik. 2:4, 5; 3:17, 18) Abọ nọ ma re wo vọvọ evaọ iruo nana o rẹ kẹ odhesẹvia imuẹro orọ uyoyou udidi mai kẹ Ọghẹnẹ, obọdẹ ọdawẹ mai kẹ erivẹ mai, gbe ẹrọwọ ọgaga mai fihọ Osiwi mai, Jesu Kristi.
5 Enẹna Họ Oke nọ A rẹ rọ j’Owọ: Nọ iziẹobro Jihova e tẹ vrẹ no, ẹsikpobi emuemu ọ vẹ wariẹ vaze keme Setan gbe idhivẹri riẹ a gbẹ rọ iruo. Ghele, oke onana u ti wo ohẹriẹ. A ti si ọwhẹruọ Setan no. A te gbẹ wariẹ unuovẹvẹ akpọ-soso kpahe ‘uye ulogbo’ nọ o be tha ha. (Evia. 7:14; Rom 16:20) Ma wo obọdẹ uvẹ nọ ma re ro w’abọ evaọ iruo nọ a te wariẹ ru vievie he na. Enẹna họ oke nọ ma rẹ rọ rehọ uvẹ onana ruiruo vọvọ.
6 Kpahe iruo ewhowho na, Pọl ukọ na, avọ imuẹro ilogbo, ọ ta nọ: “Azẹ ahwo kpobi ono omẹ uzou.” (Iruẹru 20:26) O roro nọ ọ reabe azẹ fikinọ ọ sai whowho unuovẹvẹ na ha ha. Fikieme? Keme ọ ta kpahe odibọgba riẹ nọ: “Fiki onana mẹ jẹ be ruẹ uye, họre avọ ogaga mẹ kpobi.” (Kọl. 1:29) Joma reawere oghẹrẹ evevọwẹ ọvona ọrọ abọ owo vọvọ te epanọ o rẹ lọhọ te kpobi evaọ iruo nọ a te wariẹ ru vievie he na!—2 Tim. 2:15.