Enẹna O Jẹ Mae Roja Re Ma Rroro
‘Fikiere wha hai rroro, keme wha riẹ ẹdẹ nọ Ọnowo rai ọ rẹ te tha ha.’—MATIU 24:42.
1, 2. Eme o dhesẹ nọ ma be rria evaọ edẹ urere ọ eyero nana?
“OWARE nọ o mae viodẹ eva ikpe-udhusoi avọ udhe na họ ẹmo-ofio,” ere okere-ebe na Bill Emmott ọ tae. Dedenọ o vuhumu nnọ ahwo a ruẹ uye ẹmo gbe ozighi no evaọ ikuigbe ohwo-akpọ kpobi, o fibae nọ: “Ikpe-udhusoi avọ udhe na u wo ohẹriẹ hẹ, ẹgaga riẹ ọvo o wo ofẹnẹ. Oye họ ikpe-udhusoi ọsosuọ nọ a jọ fi ẹmo nọ ọ kẹre te akpọ-soso . . . Jẹ mai yoma na, orọnikọ ẹmo akpọ-soso otiọye na ọvuọvo a fi hi rekọ ivẹ.”
2 Jesu Kristi ọ ruẹaro kpahe emo nọ ‘orẹwho o rẹ te kpare bru orẹwho, gbe uvie o rẹ te kpare bru uvie.’ Dede na, eyena yọ abọ jọ gheghe ọrọ ‘oka ọzino Kristi gbe urere akpọ na.’ Evaọ eruẹaruẹ nana nọ e viodẹ na, Jesu ọ fodẹ ohọwo, ẹyao gbe etọ nọ i re ti nuhẹ re. (Matiu 24:3, 7, 8; Luk 21:6, 7, 10, 11) Evaọ idhere sa-sa, oghẹrẹ okpẹtu nọ ma fodẹ na e rro haro jẹ ga viere no. Eyoma ohwo-akpọ ọ da otọ fia, wọhọ epanọ ma be ruẹ evaọ uruemu riẹ kpahe Ọghẹnẹ gbe ọrivẹ riẹ. Uruemu ezi u bi kiekpo yọ ethube gbe ozighi i bi viharo. Ahwo a you igho siọ Ọghẹnẹ ba, a du oma họ le no evaọ omawere. Enana kpobi e kẹ imuẹro inọ ma be rria eva “oke ẹbẹbẹ.”—2 Timoti 3:1-5.
3. Ẹvẹ u fo nọ “eware-oka oke onana” i re kpomahọ omai?
3 Ẹvẹ who rri eyero ohwo-akpọ nọ ọ be raha vrẹ ẹta na? Ahwo buobu a se onana gboja ha, a be tubẹ dawo ezọ eware nọ e be via evaọ edẹ mai na ha. Ikpahwo gbe egba-eriariẹ akpọ na a wo otoriẹ ọ “eware-oka oke onana ha”; isu egagọ dede a be kẹ emamọ ọkpọvio ọvuọvo kpahe ẹme nana ha. (Matiu 16:1-3) Rekọ Jesu ọ hrẹ ilele riẹ nọ: ‘Fikiere wha hai rroro, keme wha riẹ ẹdẹ nọ Ọnowo rai ọ rẹ te tha ha.’ (Matiu 24:42) Orọnikọ Jesu ọ jọ etenẹ ta udu họ omai awọ nọ ma jaja aro vi ọvo ho rekọ anọ ma “hai rroro.” Re ma hai rroro, o gbahọ nọ ma re muẹrohotọ jẹ jaja aro vi. Onana u vi evuhumu ọvo inọ ma be rria evaọ edẹ urere na, je vi ẹriẹ inọ oke na o ghinẹ rrọ bẹbẹ. Ma re wo imuẹro egaga hrọ inọ: “Urere eware kpobi o kẹlino.” (1 Pita 4:7) Enẹ oruo ma te rọ ruẹ nọ ma bi rroro vi epaọ anwẹdẹ. Fikiere, onọ nọ o gbahọ nọ ma re roro kpahe họ: ‘Eme o re fi obọ họ kẹ omai bọ imuẹro mai ga nnọ urere na o kẹlino?’
4, 5. (a) Eme ọ te bọ imuẹro mai ga inọ urere eyero omuomu nana o kẹlino, kọ fikieme? (b) Ithatho jọ vẹ e rrọ edẹ Noa gbe ọzino Ọmọ ohwo?
4 Roro kpahe uzuazọ nọ a je yeri taure oware aghẹruẹ jọ o tẹ te via evaọ ikuigbe ohwo-akpọ—Ẹvo ologbo ọrọ edẹ Noa na. Ahwo a yoma te epanọ o rọ “da Ọghẹnẹ gaga.” Ọ ta nọ: “Me re ti voro ohwo nọ omẹ ma no evaọ akpọ na.” (Emuhọ 6:6, 7) Yọ ere o ghine ru. Be ta ẹme kpahe epanọ oke oyena gbe oke mai na i ro tho oma, Jesu ọ ta nọ: “Wọhọ epanọ edẹ Noa e jọ ere ẹtha Ọmọ ohwo ọ rẹ te jọ.”—Matiu 24:37.
5 O rrọ oware areghẹ re ma roro inọ epanọ o jọ Jihova oma kpahe akpọ nọ ọ jọ taure Ẹvo na ọ tẹ ze na, epọvo na o riẹ oma kpahe akpọ inẹnẹ re. Nọ ọ rehọ akpọ edẹ Noa nọ ọ riẹ Ọghẹnẹ hẹ te oba na, ọ te se akpọ oyoma inẹnẹ na ba ẹraha ha. Nọ ma tẹ riẹ ithatho nọ e rrọ oke oyena gbe edẹ mai na vevẹ, o rẹ bọ imuẹro mai ga inọ urere akpọ nana o kẹlino. Kọ ithatho vẹ e riẹ? O tẹ kawo, e rehọ eware isoi tho oma. Orọ ọsosuọ họ, a whowho unuovẹvẹ ọraha nọ ọ be tha vevẹ.
A Vẹvẹ Unu Kpahe “Eware Eka nọ A rẹ te Ruẹ Hẹ”
6. Eme Jihova ọ gbamu nọ o ti ru evaọ edẹ Noa?
6 Evaọ edẹ Noa, Jihova ọ ta nọ: “Ẹzi mẹ ọ gbẹ te ria eva ohwo bẹdẹ hẹ, epanọ ọ rọ uwo, rekọ ikpe riẹ e rẹ te jọ udhukpe ozeza.” (Emuhọ 6:3) Ẹme nana nọ Ọghẹnẹ ọ ta evaọ 2490 B.C.E. na u kpoka họ emuhọ omoke nọ u kiọkọ kẹ akpọ yena nọ ọ riẹ Ọghẹnẹ hẹ na. Dai roro epanọ oyena u ti kpomahọ ahwo nọ a jẹ rria evaọ oke yena! Ikpe 120 ọvo i kiọkọ kẹsena Jihova ọ vẹ te “rehọ ame ẹvo ku akpọ na nọ o re ti kpe iwo kpobi nọ i wo ẹwẹ-uzuazọ evaọ otọ akpọ na.”—Emuhọ 6:17.
7. (a) Didi owọ Noa ọ jẹ kpahe unuovẹvẹ Ẹvo na? (b) Owọ vẹ u fo nọ ma rẹ jẹ kẹ unuovẹvẹ sa-sa kpahe ekuhọ eyero ọnana?
7 A kẹ Noa unuovẹvẹ okpẹtu nọ ọ be tha na ikpe buobu taure oke na u te ti te, ọ tẹ rehọ oke na ruiruo avọ areghẹ rọ ruẹrẹ oma họ kẹ esiwo. Pọl ukọ na ọ ta nọ: ‘Nọ Ọghẹnẹ ọ vẹvẹ Noa unu kpahọ eware eka nọ a re te ruẹ hẹ, o te yo ẹme nọ o ro ku okọ nọ o ro siwi unuwou riẹ soso.’ (Ahwo Hibru 11:7) Kọ ẹvẹ kpahe omai? Oware wọhọ ikpe 90 e vrẹ no anwẹnọ edẹ urere eyero nana i ro muhọ evaọ 1914. “Oke urere” na ma ghinẹ rrọ na. (Daniẹl 12:4) Kọ ẹvẹ u fo nọ ma rẹ jowọ kẹ unuovẹvẹ sa-sa nọ a kẹ omai no na? Ebaibol na e ta nọ: “Ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:17) Fikiere, enẹna họ oke nọ ma rẹ rọ tẹrovi oreva Jihova uruo avọ oma ovẹrẹ.
8, 9. Unuovẹvẹ sa-sa vẹ a kẹ evaọ edẹ mai na no, kọ ẹvẹ a bi ro whowho ai?
8 Evaọ oke mai na, uvi emọ-uwuhrẹ Ebaibol a wuhrẹ no Ikereakere na ze no inọ eyero ọnana o bi kpohọ ọraha. Kọ ma rọwo onana? Muẹrohọ ẹme nọ Jesu Kristi ọ ta vevẹ inọ: “Uye obẹbẹ ruaro o rẹ te jọ, u tioye o te jọ no emuhọ akpọ na ze ri te enẹ hẹ, ijo, o gbẹ sae jọ ofa ha.” (Matiu 24:21) Jesu ọ tẹ jẹ ta inọ ọ rẹ te nya ze wọhọ Obruoziẹ nọ Ọghẹnẹ o ro mu jẹ hẹriẹ ahwo wọhọ epanọ othuru-igodẹ ọ rẹ hẹriẹ igodẹ no ewe. Enọ ọ ruẹ nọ i te he i re ti ‘kpohọ ọraha ibẹdẹ bẹdẹ, rekọ ikiẹrẹe i ve ti kpohọ uzuazọ ebẹdẹ bẹdẹ.’—Matiu 25:31-33, 46.
9 Jihova ọ be rehọ ẹkwoma ekareghẹhọ ẹruoke ọrọ emu abọ-ẹzi nọ o bi no obọ ‘ọrigbo nọ o wo ẹrọwọ avọ areghẹ na’ ze rọ kẹ ahwo riẹ unuovẹvẹ sa-sa nana. (Matiu 24:45-47) Ofariẹ, a zizie erẹwho, erua, evẹrẹ gbe ahwo kpobi re a “dhozọ Ọghẹnẹ jẹ rehọ oruaro kẹ e, keme oke oziẹobro riẹ o te no.” (Eviavia 14:6, 7) Abọ ologbo ovuẹ Uvie na nọ Isẹri Jihova a bi whowho nya akpọ na duwu họ, unuovẹvẹ na inọ kẹle na Uvie Ọghẹnẹ u ti si esuo ahwo-kpọ no otọ. (Daniẹl 2:44) A re rri unuovẹvẹ onana vo vievie he. Ọghẹnẹ Erumeru na o re ru ẹme riẹ gba ẹsikpobi. (Aizaya 55:10, 11) O ru ẹme riẹ gba evaọ edẹ Noa, yọ o ti ru ere evaọ edẹ mai na re.—2 Pita 3:3-7.
Ọfariẹ-Ogbe Ọ d’Otọ Fia
10. Eme a rẹ sae ta kpahe ogbekuo owezẹ ezae-avọ-eyae evaọ edẹ Noa?
10 Oke mai na u tho edẹ Noa evaọ edhere ọfa jọ. Jihova o jie uzi kẹ ọzae gbe aye ọsosuọ na inọ a yẹ ‘akpọ na vọ’ ẹkwoma ẹgba owezẹ ọzae-avọ-aye nọ Ọghẹnẹ ọ kẹ rai nọ a re ro ru iruo avọ adhẹẹ eva ọruẹrẹfihotọ orọo. (Emuhọ 1:28) Evaọ edẹ Noa, ijẹle aghẹmeeyo a rehọ ẹkwoma oghẹrẹ owezẹ ezae-avọ-eyae nọ u fo ho ro gbe uyẹ ahwo-akpọ ku. A rehọ oma iwo ziọ otọ-akpọ, wezẹ kugbe eyae nọ i wo erru, a tẹ rehọ ere yẹ emọ nọ e rrọ abọjọ ohwo-akpọ, abọjọ idhivẹri—Nẹfilim na. (Emuhọ 6:2, 4) Uzioraha nọ urusio ijẹle nana u su kpohọ u tho uruemu ogbekuo owezẹ nọ o jọ Sọdọm avọ Gomora. (Jud 6, 7) Fikiere, uruemu ogbekuo owezẹ ezae-avọ-eyae u je titi evaọ edẹ yena.
11. Didi oghẹrẹ uyero abọ uruemu u ru oke mai na tho edẹ Noa?
11 Kọ ẹvẹ uyero na o rrọ nẹnẹ evaọ abọ ẹfuọ uruemu? Evaọ edẹ urere nana, ọfariẹ-ogbe ọvo họ oware nọ ahwo buobu a bi roro kpahe. Pọl o dhesẹ ahwo otiọye na vevẹ wọhọ otu nọ i “zihe ruọ igheghẹ”; nọ ibuobu rai e rehọ oma kẹ ‘uzuazọ-ugbegbe, be rọ ọwhọ ru eghẹrẹ eware igbegbe kpobi.’ (Ahwo Ẹfẹsọs 4:19) Ifoto ẹbẹba, ọfariẹ-ogbe, emọ nọ a rẹ gbadu, gbe ezae-duezae yọ eware nọ i bi wowẹ. Otujọ a ‘jọ ugboma rai wo osa umuomu’ no, ẹkwoma eyao nọ a wo no igberẹ-ibro rai ze, ẹtahaku uzuazọ uviuwou rai, gbe ebẹbẹ uyerakpọ efa.—Ahwo Rom 1:26, 27.
12. Fikieme ma je wo omukpahọ kẹ oware uyoma?
12 Evaọ edẹ Noa, Jihova ọ rehọ Ẹvo ologbo na ze rọ rehọ akpọ yena nọ ọfariẹ-ogbe ọ da fia na te oba. O rẹ thọrọ omai ẹro vievie he inọ oke mai na u ghine tho edẹ Noa. ‘Uye ulogbo’ nọ o be tha na u ti hwere ‘ibruẹnwae, igberedha, ahwo nọ a re ru iruemu etọtọ, gbe ezae nọ i re du ezae,’ no otọakpọ na no. (Matiu 24:21; 1 Ahwo Kọrint 6:9, 10; Eviavia 21:8) Ẹvẹ o kpata te re ma wo omukpahọ kẹ oware nọ u yoma jẹ kẹnoma kẹ iyero nọ e rẹ sai su kpohọ ọfariẹ-ogbe!—Olezi 97:10; 1 Ahwo Kọrint 6:18.
“Ozighi Ọ tẹ Vọ” Akpọ Soso
13. Eme ọ lẹliẹ ‘ozighi da akpọ fia’ evaọ edẹ Noa?
13 Bi dhesẹ oware ofa nọ u kpoka họ edẹ Noa, Ebaibol na e ta nọ: “Akpọ o te gbeku evaọ aro Ọghẹnẹ, ozighi ọ tẹ vọ akpọ na soso.” (Emuhọ 6:11) O nwane rọnọ oke oyena ozighi o ro muhọ họ. Keni ọmọ Adamu o kpe oniọvo okiẹrẹe riẹ. (Emuhọ 4:8) Bi dhesẹ oghẹrẹ ẹzi ozighi nọ ọ j’otọ evaọ edẹ riẹ, Lemẹk ọ t’ẹme eha-ise kpahe epanọ o ro kpe upelẹ ọzae jọ, be ta nọ o ru ere fikinọ ọ jẹ thọ oma riẹ. (Emuhọ 4:23, 24) Oware nọ u ru edẹ Noa wo ohẹriẹ họ, epanọ ozighi na o kpehru te. Nọ emọ Ọghẹnẹ nọ i zihe ruọ ijẹle aghẹmeeyo a rọo eyae ahwo-akpọ je yẹ emọ—Nẹfilim na—ozighi ọ tẹ ga vi epanọ a riẹ vẹre. Efafa New World Translation i dhesẹ nọ ubiẹme Hibru ọsosuọ nọ a ro dhesẹ egwara yena u wo otofa ọ ‘Emare-ahwo’—‘enọ e rẹ rehọ ahwo fotọ.’ (Emuhọ 6:4) Fiki oyena, ‘ozighi ọ tẹ da akpọ fia.’ (Emuhọ 6:13) Dai roro kpahe ebẹbẹ nọ Noa ọ rẹriẹ ovao dhe nọ ọ jẹ yọrọ emọ riẹ evaọ okegbe otiọye! Ghele na, Noa ‘o kiẹrẹe eva aro ỌNOWO eva oge ọyena.’—Emuhọ 7:1.
14. Oghẹrẹ vẹ ‘ozighi ọ rọ da akpọ fia’ nẹnẹ?
14 Ozighi o kri otọ no evaọ ikuigbe ohwo akpọ. Rekọ wọhọ epanọ o jọ evaọ edẹ Noa, oke mai na o rọ ẹro ruẹ ozighi nọ a re ruẹ obọ riẹ hẹ no. Ẹsikpobi ma be hai yo kpahe ozighi uviuwou, iruẹru ozighi ọkparesuọ, ewhowho ikpakpe-otu, gbe otu nọ i bi mu sa ahwo kpe. Fiba enana họ ahwo nọ ẹmo o bi kpe kufiẹ. Ozighi ọ wariẹ da akpọ fia no. Fikieme? Eme ọ so riẹ ze nọ o jẹ ga te enẹ? Uyo na o rehọ omai te edhere ọfa nọ akpọ inẹnẹ o ro tho ọrọ edẹ Noa.
15. (a) Eme ọ lẹliẹ ozighi bi vihọ evaọ edẹ urere na? (b) Eme ma wo imuẹro riẹ nọ o te via hrọ?
15 Nọ a rehọ Uvie Mesaya Ọghẹnẹ mu evaọ obọ odhiwu evaọ 1914, Ovie nọ a ro mu na, Jesu Kristi, ọ tẹ jẹ owọ ulogbo jọ. A gele Setan Ẹdhọ na avọ ikọ riẹ no odhiwu ziọ otọakpọ. (Eviavia 12:9-12) Taure Ẹvo na ọ tẹ ze, ijẹle aghẹmeeyo a rehọ iroro obọrai no oria nọ a jọ evaọ obọ odhiwu; rekọ evaọ oke mai na, a rehọ ogaga gbolo ai no odhiwu ze. Ofariẹ, a gbẹ sae rẹriẹ ruọ ahwo-akpọ enẹna ha re a ruẹse re omawere abọ-iwo nọ u fo ho. Fikiere avọ uzou-udhe, ofu, gbe ozodhẹ ẹdhoguo nọ ọ kẹlino, a te bi gele ahwo gbe ikoko ahwo-akpọ họ re a wha iruẹru ethube haro gbe ozighi nọ ọ tubẹ ga vi onọ o jọ otọ evaọ edẹ Noa. Nọ ijẹle aghẹmeeyo gbe emọ rai a te rehọ eyoma vọ akpọ oke yena no, Jihova ọ tẹ raha akpọ nọ ọ jọ taure Ẹvo na ọ tẹ ze na muotọ. Who riwi iei vo vievie he, o ti ru epọvo na re evaọ edẹ mai na! (Olezi 37:10) Dede na, enọ i bi rroro nẹnẹ a riẹ nnọ esiwo rai ọ kẹlino.
A bi Whowho Ovuẹ Na
16, 17. Eme họ oware avene nọ edẹ Noa avọ edẹ mai na i ro tho oma?
16 Oware avene nọ edẹ inẹnẹ gbe akpọ nọ ọ jọ taure Ẹvo na ọ tẹ ze i ro tho oma họ iruo nọ a kẹ Noa nọ o ru. Noa ọ bọ okọ ulogbo. Ọ tẹ jẹ jọ “ọvuẹovuẹ.” (2 Pita 2:5) Didi ovuẹ o whowho? U muẹro inọ usiuwoma ota Noa u kugbe ubo ekurẹriẹ gbe unuovẹvẹ orọ ọraha nọ ọ be tha na. Jesu ọ ta nọ ahwo edẹ Noa a “riẹ hẹ bẹsenọ ẹvo ọ rọ ze, ọ jẹ rehọ ai kpobi vrẹ.”—Matiu 24:38, 39.
17 Epọvo na re, nọ Isẹri Jihova a be rehọ ajọwha vuẹ uwou nọ a vi rai na, ovuẹ Uvie Ọghẹnẹ o be nya te oka avọ oka akpọ na. Evaọ enwenọ kabọ kabọ akpọ na, ahwo a be sai yo je se ovuẹ Uvie na evaọ ẹvẹrẹ obọ rai. Unu emagazini Uwou-Eroro, onọ u bi whowho Uvie Jihova na, nọ a bi kere kamara kamara u bu vi 25,000,000, evaọ evẹrẹ nọ i bu vi 140. Evaọ uzẹme, a bi whowho emamọ usi Uvie Ọghẹnẹ na ‘evaọ erẹwho akpọ na kpobi.’ Nọ a te ru iruo yena te ẹgwọlọ Ọghẹnẹ no, urere na o vẹ te ze.—Matiu 24:14.
18. Ẹvẹ owojẹ ahwo buobu kpahe iruẹru usiuwoma ota mai na u ro tho orọ ahwo edẹ Noa?
18 Nọ ma te roro kpahe abọgbekẹ ẹfuọ abọ-ẹzi gbe ọrọ uruemu nọ ọ jọ otọ taure Ẹvo na ọ tẹ ze, o bẹ hẹ re ma riẹ oware nọ o soriẹ nọ erivẹ nọ e rọwo eme riẹ hẹ a je ro se uviuwou Noa ẹkoko jẹ la ai eka. Akpọ yena o te oba ghele. Epọvo na re, evaọ edẹ urere na, ‘iseẹkoko avọ ẹkoko-ose rai’ e vọ riẹ. Ebaibol na e ta nọ: “Rekọ ẹdẹ Ọnowo ọ rẹ te tha wọhọ oji.” (2 Pita 3:3, 4, 10) Ọ te seba ẹtha ha eva oke nọ a fihọ na. Ọ te raha oke he. (Habakuk 2:3) Ẹvẹ o rrọ oware areghẹ te re ma hai rroro!
Umutho Ahwo Jọ Ọvo A Zọ
19, 20. Ithatho vẹ ma rẹ sae fodẹ kpahe Ẹvo na gbe ọraha nọ o ti te eyero ọnana?
19 Orọnikọ eyoma ahwo na gbe ọraha rai ọvo edẹ Noa avọ edẹ mai na i ro tho oma ha. Wọhọ epanọ ahwo jọ a zọ vrẹ Ẹvo na, ere ọvona ahwo jọ a te zọ vrẹ ekuhọ eyero ọnana. Itu omarokpotọ nọ i yeri uzuazọ nọ u wo ohẹriẹ no orọ ahwo nọ a kiọkọ họ enọ e zọ vrẹ Ẹvo na. A kezọ kẹ unuovẹvẹ Ọghẹnẹ je si oma no akpọ oyoma oke yena. Ebaibol na e ta nọ: ‘Noa o wo aruoriwo evaọ aro Ọghẹnẹ. Noa ọ kare ẹpoviẹ evaọ oge riẹ.’ (Emuhọ 6:8, 9) Evaọ uyẹ ahwo-akpọ kpobi, uviuwou ovo, ‘umutho ahwo, koyehọ, imaeree e zọ no uwhu ame na.’ (1 Pita 3:20) Jihova Ọghẹnẹ ọ ta kẹ ae nọ: “Wha mọ ibi, wha vi, re wha vọ akpọ na.”—Emuhọ 9:1.
20 Ẹme Ọghẹnẹ ọ kẹ omai imuẹro nnọ “otu obuobu jọ” o ti ‘no uye ulogbo na ze.’ (Eviavia 7:9, 14) Bro ahwo a ti ru otu obuobu na? Whaọ Jesu omariẹ ọ ta nọ: “Edhere nọ a re ro kpohọ uzuazọ ọ rẹ kekeke, unu riẹ ọ rẹ hwahwa, enọ e ro riẹ e rẹ kakao.” (Matiu 7:13, 14) Nọ a tẹ rehọ iẹe wawo ima-idu erọ ahwo nọ a rrọ akpọ na soso, enọ e te zọ vrẹ uye ulogbo nọ o be tha na e be te jọ umutho ahwo. Rekọ ẹsejọhọ a ti wo utiọ uvẹ nọ a kẹ ahwo nọ a zọ vrẹ Ẹvo na. Ẹsejọhọ, evaọ omoke jọ, enọ e te zọ a ti yẹ emọ nọ e te jọ abọjọ okegbe akpọ ọkpokpọ na.—Aizaya 65:23.
“Wha Hai Rroro”
21, 22. (a) Erere vẹ who wo no ọkiẹriwo nana kpahe ikuigbe Ẹvo na ze? (b) Eme họ uzoẹme ẹgbukpe ọ 2004, kọ fikieme u je fo nọ ma kezọ kẹ uthubro riẹ?
21 Dedenọ u kri no nọ Ẹvo na o ro ku, o kẹ unuovẹvẹ uvevẹ nọ ma re rri vo vievie he. (Ahwo Rom 15:4) Jọ ithatho nọ e rrọ edẹ Noa avọ edẹ mai na e wọ omai vuhu eware nọ e be via na mu jẹ lẹliẹ omai jaja aro vi kẹ ẹtha idudhe ọrọ Jesu nọ o ti ro brukpe irumuemu na.
22 Enẹna, Jesu Kristi ọ be kpọ iruo ilogbo erọ ebabọ abọ-ẹzi. Aparadase abọ-ẹzi nọ ọ wọhọ okọ ọ riẹ nẹnẹ rọkẹ ọthọwẹ gbe azọ ọrọ egegagọ uzẹme. (2 Ahwo Kọrint 12:3, 4) Re a ruẹse thọ omai no uye ulogbo na, o gbahọ nọ ma rẹ jọ evaọ aparadase yena. Akpọ Setan ọ wariẹ okegbe aparadase na họ, o rovie enu fihọ be hẹrẹ ọnọ owezẹ abọ-ẹzi u bi su nọ o re mu lọ. U wuzou gaga re ma ‘hai rroro’ je dhesẹ nọ ma ruẹrẹ oma kpahe no kẹ ẹdẹ Jihova.—Matiu 24:42, 44.
Kọ Whọ Kareghẹhọ?
• Ohrẹ vẹ Jesu ọ kẹ kpahe ẹtha riẹ?
• Eme Jesu ọ rehọ oke ọzino riẹ dhesẹ?
• Evaọ idhere vẹ oke mai na u ro tho edẹ Noa?
• Oghẹrẹ vẹ u fo nọ eroro kpahe ithatho nọ e rrọ edẹ Noa avọ edẹ mai na i re kpomahọ ọwhọ nọ ma bi ro rroro?
[Ẹme nọ a fi ẹgba họ nọ ọ rrọ ẹwẹ-obe avọ 10]
Uzoẹme ẹgbukpe ọ 2004 na họ: “Wha rroro . . . Wha ruẹrẹ oma kpahe.”—Matiu 24:42, 44, NW.
[Uwoho nọ o rrọ ẹwẹ-obe avọ 7]
Noa ọ kezọ kẹ unuovẹvẹ Ọghẹnẹ. Kọ ma bi ru ere re?
[Iwoho nọ e rrọ ẹwẹ-obe avọ 8, 9]
“Wọhọ epanọ edẹ Noa e jọ ere ẹtha Ọmọ ohwo ọ rẹ te jọ”