Ẹkpẹti Onọ

◼ Okenọ a te se ukoko na re a fiobọhọ evaọ ẹruẹrẹhọ uwhori, enọ enana e rẹ sae rehọ oma via:

Ono ọ rẹ kẹ ovuẹ uwhori na? Onana yọ iroro nọ ahwo uviuwou na a rẹ jẹ. A rẹ sae salọ oniọvo kpobi nọ ọ họ-ame no nọ o wo emamọ edikihẹ. Otẹrọnọ a yare ugboma ekpako na re a salọ ohwo nọ ọ rẹ kẹ ẹme na, a rẹ salọ ọkpako nọ o te ziezi re ọ kẹ ovuẹ no oma Ukoko-Ulogbo ze. Dede nọ ma re jiri ohwo nọ o whu na ha, o rẹ sai fo re ma si iroro kpohọ iruemu iwoma oriruo nọ o dhesẹ.

Kọ A sae rehọ Ọgwa Uvie na ruiruo? A rẹ sae rehiẹe ruiruo otẹrọnọ ugboma ekpako na a rọwo gbe otẹrọnọ u kie fihọ oke ewuhrẹ hẹ. A rẹ sae rehọ ọgwa na ruiruo otẹrọnọ ohwo nọ o whu na o wo emamọ odẹ ọ tẹ jẹ rọ omọvo ukoko na hayo ọmọ ọboba ọ omọvo ukoko na. Otẹrọnọ ohwo na ọ suẹme ogbotu jọ ẹkwoma uruemu nọ u fo Oleleikristi hi, hayo otẹrọnọ eware efa jọ e riẹ nọ e rẹ sae wha ekpehre odẹ se ukoko na, ekpako na a rẹ sae jiroro nọ a rehọ ọgwa na ruiruo ho.—Rri obe ọ Our Ministry, ewẹ-obe 62-63.

N’otọ ze, a rẹ rehọ Ọgwa Uvie ruiruo evaọ uwhori ahwo nọ e rọ ukoko ho ho. A rẹ sai ru enwene otẹrọnọ ahwo uviuwou riẹ a kru ukoko na gaga wọhọ iwhowho-uvie nọ e họ-ame no, otẹrọnọ ahwo ukoko na buobu a riẹ ọnọ o whu na inọ o wo emamọ uruemu kpahe uzẹme na avọ emamọ odẹ kẹ uruemu nọ u kiete evaọ okegbe na, gbe nọ a ku iruemu akpọ kugbe ọruẹrẹfihotọ na ha.

Okenọ a tẹ be k’uvẹ kẹ ero ruiruo Ọgwa Uvie na, ekpako na a re roro sọ o rọ uruemu ẹwho re ahwo a rẹro nọ a te ruẹ etehe-ori na evaọ uwhori na. Otẹ rọ ere, a rẹ sae k’uvẹ re a wọe ze ọgwa na.

Kọ ẹvẹ kpahe uwhori kẹ ahwo obọ akpọ? Otẹrọnọ ohwo nọ o whu na o wo emamọ odẹ evaọ okegbe na, oniọvo jọ ọ sae kẹ ovuẹ Ebaibol ọbọga evaọ obọ uwou hayo ighẹ ọnọ o whu na hayo evaọ abotọ uki na. Ukoko na o rẹ se uwhori ohwo nọ a riẹ nọ o re gbọfariẹ, ogbulegbu hayo nọ oghẹrẹ eyero uzuazọ riẹ o wọso ehri-izi Ebaibol. Ababọ avro, oniọvo o re w’abọ kugbe osu-egagọ evaọ eruo ọruẹrẹfihotọ okugbe-ẹrọwọ họ hayo evaọ uwhori nọ a re ru evaọ ichọche Babilọn Ologbo na ha.

Kọ ẹvẹ otẹrọnọ ọnọ o whu na a si rie no ukoko no? Ukoko na u re w’obọ kpahiẹe he. A rẹ rehọ Ọgwa Uvie na ruiruo ho. Otẹrọnọ ohwo ọyena ọ be kẹ imuẹro ekurẹriẹ yọ o bi dhesẹ isiuru eziheze, iroro oniọvo o rẹ sai kẹe uvẹ re ọ kẹ ovuẹ Ebaibol evaọ uwou hayo ighẹ ọnọ o whu na hayo abotọ uki na, re o sisẹri kẹ enọ e rọwo ho jẹ kẹ imoni riẹ ọbọga. Ghele, taure ọ tẹ sae jiroro nana, o rẹ jọ oware areghẹ re oniọvo na ọ t’ẹme kugbe ugboma ekpako na je roro kpahe uthubro nọ a sae kẹ. Evaọ oria nọ o gbẹ rọ oware areghẹ re oniọvo o w’obọ kpahiẹe he, o sai fo re oniọvo nọ ọ rọ omọvo uviuwou ọnọ o whu na ọ kẹ ovuẹ ro whrehe imoni riẹ oviẹ.

A sae ruẹ ekpọvio efa evaọ Uwou-Eroro Na, October 15, 1990, ewẹ-obe 30-31; September 15, 1981, ẹwẹ-obe avọ 31; March 15, 1980, ewẹ-obe 5-7; June 1, 1978, ewẹ-obe 5-8; June 1, 1977, ewẹ-obe 347-348; March 15, 1970, ewẹ-obe 191-192; gbe Awake! ọrọ September 8, 1990, ewẹ-obe 22-23, gbe March 22, 1977, ewẹ-obe 12-15 (erọ Oyibo).