Fiobọhọ k’Amọfa Ruẹ Omosasọ
1 Iyẹrẹ kpahe ọraha, emo, ugbarugba, gbe uye-oruẹ e bẹ ahwo buobu t’unu no. Omosasọ họ oware nọ ohwo-akpọ ọ ghinẹ gwọlọ, dede nọ a be jọ iyẹrẹ inẹnẹ t’ẹme tei vievie he. Re a sasa ohwo oma u dhesẹ nọ, “re a rehọ ẹgba gbe ẹruore kẹ” jegbe “re a ru uweri hayo idhọvẹ lọhọ kẹ” amọfa. Wọhọ Isẹri Jihova, a thomai vẹre no re ma fiobọhọ kẹ ahwo evaọ edhere ọnana. (2 Kọr. 1:3, 4) Evuẹ omosasọ uzẹme e rọ evaọ ibroshọ mai nọ a kere no Ebaibol ze nọ ma ti fihọ ada evaọ July gbe August. (Rom 15:4) Iroro jọ e rọ etenẹ nọ a re ro fi ai họ ada evaọ oghẹrẹ iyero sa-sa:
2 Ikuigbe iyẹrẹ iyoma e rẹ sae wha uvẹ ze nọ a re ro sisẹri jẹ wha omosasọ se amọfa, ẹsejọhọ evaọ ẹme otiọna:
◼ “Nọ eware itieye na e tẹ via, u re gbe otujọ unu sọ Ọghẹnẹ ọ ghinẹ rrọ, gbe sọ ọ be daezọ mai otẹrọnọ ọ ghinẹ rrọ. Ẹvẹ who roro? [Kuvẹ kẹ uyo.] Edhere jọ nọ a rẹ rọ riẹ sọ Ọghẹnẹ ọ rrọ họ, efihiruo ehri-uzi jọ nọ a riẹ ziezi.” Se obe Ahwo Hibru 3:4. Fodẹ eware efa nọ e wariẹ omai họ nọ i re vevẹ nọ e gwọlọ ọwena. Whọ vẹ ta haro nọ: “Me wo ibroshọ jọ nọ mẹ riẹ nọ o te sasa owhẹ oma. Uzoẹme riẹ họ Kọ Ọghẹnẹ Ọ Be Ghinẹ Daezọ Mai? [Se onọ nọ o rọ uke riẹ na.] Imuẹro ivevẹ e r’eva riẹ inọ orọnikọ Ọghẹnẹ ọ be rria ọvo ho rekọ kẹle na ọ rẹ te rehọ oba te iyero okienyẹ kpobi nọ ma rẹriẹ ova dhe nẹnẹ na. Whọ sai wo onana evaọ azọhọ ₦15.” Ru ọruẹrẹfihotọ kẹ ozihebro.
3 Evaọ ozihebro ra, whọ sae ta nọ:
◼ “Ma jẹ t’ẹme kpahe imuẹro ẹria Ọghẹnẹ evaọ okenọ mẹ nya siọ ibroshọ na Kọ Ọghẹnẹ Ọ Be Ghinẹ Daezọ Mai? ba k’owhẹ. Ẹsejọhọ who muẹrohọ ẹme ọnana evaọ ẹwẹ-obe avọ 7 na. [Dhesẹ uwoho na jẹ rehọ umutho ẹme ro dhesẹ edhe-ẹme avọ 15 na.] Onana yọ oriruo jọ nọ u dhesẹ nọ Ọghẹnẹ nọ ọ rẹ daezọ ọ ghinẹ be rria. [Se edhe-ẹme avọ 27 evaọ ẹwẹ-obe avọ 9.] Ewuhrẹ omobọmẹ ọrọ Ebaibol na o fiobọhọ k’omẹ sae thihakọ awa-ọruọ ebẹbẹ ikẹdẹ kẹdẹ uzuazọ no, fikinọ u dhesẹ eriwo Ọghẹnẹ kpahe eware.” Fodẹ odhesẹvia obe uwuhrẹ kẹe.
4 Whọ tẹ be rehọ ibroshọ na “Eme Họ Ẹjiroro Uzuazọ? Ẹvẹ Whọ Sai Ro Duku Ei?” ro ruiruo, whọ sai dhesẹ oma ra whọ vẹ ta nọ:
◼ “Mẹ wha ovuẹ jọ nọ u w’uzou se owhẹ nọ a dhesẹ vevẹ evaọ ibroshọ ọnana, Eme Họ Ẹjiroro Uzuazọ? Ẹvẹ Whọ Sai Ro Duku Ei?” Se edhe-ẹme ọsosuọ na evaọ ẹwẹ-obe avọ 4 ọ ibroshọ na. Nọ ọnọ o wo uwou na epanọ o roro, whọ vẹ k’uvẹ kẹ uyo. “Evaọ Aizaya 45:18, Ebaibol na o dhesẹ nọ a wo omai h’eva rọ ma otọakpọ na.” [Sei.] Kẹsena, who ve ru ẹjiroro ibroshọ na vevẹ, who ve fi ọvo jọ h’ada kẹe evaọ azọhọ ₦15.
5 Eva ozihebro, whọ sae dao edhere ọnana ro mu ewuhrẹ họ:
◼ “Ro fiba ẹmeọta mai ẹdẹ na, mẹ gwọlọ dhesẹ k’owhẹ ohwo nọ ọ rẹ sai dhesẹ ẹjiroro uzuazọ k’omai. [T’ẹme nọ ọ rọ edhe-ẹme 1 gbe 2 evaọ ẹwẹ-obe avọ 6 evaọ ibroshọ Ẹjiroro Uzuazọ na.] Eviavia 4:11 o dhesẹ nọ Jihova Ọghẹnẹ họ Ọnọma omai. [Sei.] O ghine wo ẹjiroro jọ nọ ọ rọ ma omai. Ahwo nọ a gwọlọ riẹ kpahe ẹjiroro na a re wuhrẹ Ẹme Ọghẹnẹ nọ a kere fihọ otọ hrọ, Ebaibol na. Mẹ gwọlọ ru uvẹ yena lọhọ k’owhẹ.” Dhesẹ oghẹrẹ nọ a re ru obe uwuhrẹ Ebaibol ọvọvẹ mai, je ru ọruẹrẹfihotọ kẹ emuhọ ewuhrẹ.
6 Edhere ọliọliọ ọnana ọ rẹ sae sasa ahwo nọ oyoyou rai jọ o whu no oma:
◼ “Me bi fiobọhọ kẹ ohwo kpobi nọ oyoyou riẹ jọ o whu no. Nọ onana o rẹ sae jọ bẹbẹ re a thihakọ riẹ na, a kere ibroshọ ọnana, Okenọ Ohwo nọ Who You O te Whu, re u fiobọhọ k’owhẹ. U fiobọhọ kẹ ima ahwo buobu no. Mẹ gwọlọ nọ me re dhesẹ oware nọ o ta kpahe eyaa omosasa nọ Jesu Kristi ọ yaa k’owhẹ. [Se edhe-ẹme avọ isoi evaọ ẹwẹ-obe avọ 26, kugbe obe ọ Jọn 5:21, 28, 29.] Muẹrohọ ifoto nana evaọ ẹwẹ-obe avọ 29 nọ u dhesẹ ikuigbe Usiuwoma Jesu nọ ọ jẹ ghinẹ kpare Lazarọs no uwhu ze. O te wer’omẹ re mẹ nyasiọ ibroshọ omosasa ọnana ba k’owhẹ evaọ azọhọ ₦15.”
7 Nọ who te zihe, whọ sae wariẹ dhesẹ ifoto n’orọ ẹwẹ-obe avọ 29 ọ ibroshọ na “Okenọ Ohwo nọ Who You O te Whu” whọ vẹ ta nọ:
◼ “Kareghẹhọ ẹmeọta mai kpahe Kristi nọ ọ kpare Lazarọs no iwhuowhu ze. [Se ẹme nọ olele uwoho nọ o rọ ẹwẹ-obe avọ 28 na, jẹ t’ẹme nọ ọ rọ otọ uzoẹme-osese na “Kọ O Ghinẹ Via?”] Otẹrọnọ ẹrọwọ na inọ whọ sae te wariẹ ruẹ oyoyou ra nọ o whu no o siowhẹ urru, jọ me fiobọhọ k’owhẹ re who wo ẹruore fihọ ẹkparomatha na.” Fodẹ obe uwuhrẹ Ebaibol kẹe.
8 Joma ru utho ẹgba mai evaọ emera obaro na re ma raro kele Jesu ‘jaja enọ e rọ uweri oma.’—Aiz. 61:2.