Fiobọhọ kẹ Erivẹ Ra re A Duku Edidi Evawere Uviuwou
1 Ohwo-akpọ ọ jọ abọ otokiẹ-eriariẹ wo ẹnyaharo gaga no evaọ ikpe-udhusoi avọ 20 nana. Onana o rehọ eware nọ e r’oja kẹ uzuazọ rọkẹ unu ahwo buobu no vi epaọ anwẹdẹ kpobi. Dede na, ahwo buobu nọ i no k’abọ k’abọ ze a kie no riẹriẹriẹ evaọ abọ jọ uzuazọ ohwo-akpọ—uviuwou na. Ekie rai o rọ fiki ọ ọjẹfiẹ ọkpọvio nọ o no obọ Ọnọ “a rehọ odẹ riẹ bi se uviuwou kpobi nọ [orọ] ehru gbe akpọ” ze, Jihova Ọghẹnẹ.—Ẹf. 3:15.
2 Iviuwou nọ i w’unu hu i wo Ebaibol, rekọ ovu o ruru rie no evaọ evu-ebe na viukpenọ a rẹ rehọ iẹe ro ku ebẹbẹ uviuwou họ. Re a sai wo evawere uviuwou, a re fiọ ọkpọvio gbe ehri-izi Ikereakere họ iruo hrọ. Evaọ February, ma te daoma gaga re ma ghale obe ọ Edidi Evawere Uviuwou na kugbe ohwo kpobi. Ẹjiroro jọ nọ a re ro fi obe na họ ada ena:
3 Nọ whọ tẹ nyaku ọyewọ evaọ iruo n’uwou ruọ uwou na, whọ sae rehọ edhere ọnana rọ kpare isiuru:
◼ “Avọ idhọvẹ gbe awa-ọruọ nọ ma rẹriẹ aro ku kẹdẹ kẹdẹ na, kọ who roro nọ o lọhọ re a wo uvi uzuazọ uviuwou evawere? [K’uvẹ kẹ uyo.] A rẹ ruẹ edidi evawere uviuwou uzẹme nẹnẹ na evaọ efihiruo ọ ehri-izi Ebaibol. Uviuwou nọ u fi rai họ iruo o rẹ reawere ọ udhedhẹ Ọghẹnẹ. [Se Aizaya 32:17, 18.] Obe onana, Edidi Evawere Uviuwou, u dhesẹ ehri-izi nọ e rẹ sai fiobọhọ k’omai bọ uviuwou mai ga.” Rovie kpohọ ẹwẹ-obe avọ 11, je se edhe-ẹme avọ 20. Fi obe na họ ada evaọ azọhọ ₦55.
4 Nọ who te zihe bru ei whọ sae t’ẹme na haro evaọ edhere ọnana:
◼ “Okenọ ma kake ruẹ ẹro, me vuhumu nnọ whọ be daezọ uviuwou ra gaga. Mẹ gwọlọ jọ evaọ obe nọ whọ rehọ na dhesẹ oware jọ k’owhẹ nọ me roro nọ o te were owhẹ. Uzoẹme urere na u dhesẹ uvi edidi evawere uviuwou. [Se edhe-ẹme avọ 2 evaọ ẹwẹ-obe avọ 183.] Muẹrohọ nnọ oma nọ a re kugbe re a ru oreva Ọghẹnẹ họ usiavẹ na. Ma j’iroro nọ iviuwou i wuhrẹ Ebaibol na kugbe re a riẹ oware nọ oreva Ọghẹnẹ o rọ gbe oghẹrẹ nọ a sai ro fi ei họ iruo evaọ uviuwou na. Ma be k’ahwo oma ewuhrẹ Ebaibol na nọ o rẹ rehọ umutho emerae jọ ọvo. Whọ tẹ k’omẹ uvẹ, me ti dhesẹ epanọ a re ru ei k’owhẹ.” Zihe nya avọ obe Eriariẹ na re wha gbẹ t’ẹme na haro.
5 Nọ whọ tẹ be t’ẹme kẹ izoge evaọ ẹkwotọ na, whọ sae rehọ onana ruiruo:
◼ “Izoge buobu nẹnẹ a bi gu nnọ esẹ gbe ini rai a bi w’otoriẹ rai hi. Kọ eme who roro nọ o be wha onana ze? [K’uvẹ kẹ uyo.] Obe onana nọ a ruẹrẹ ziezi re u fiobọhọ evaọ ebẹbẹ uviuwou na o kpahe ẹme isiuru ọnana fihọ uzoẹme ọ ‘Ẹmeọta-Kugbe Avọ Oruọzewọ nọ U no Eva Ze.’ [Se edhe-ẹme avọ 4 evaọ ẹwẹ-obe avọ 65 evaọ obe ọ Evawere Uviuwou na.] Idhe-ẹme nọ i lele i rie na e kẹ ohrẹ kpahe oghẹrẹ nọ a sai ro wo ẹnyaharo ẹmeọta-kugbe evaọ uviuwou. Uzoẹme obe onana họ Edidi Evawere Uviuwou. Whọ sae rehọ onana evaọ azọhọ ₦55.” Ru ọruẹrẹfihọ kẹ ozihebro.
6 Whọ sae t’ẹme ọ iweze ọsosuọ ra kugbe uzoge na haro kpahe ẹmeọta-kugbe ọyewọ gbe ọmọ na evaọ oghẹrẹ onana:
◼ “Isiuru ra re who wo emamọ ẹmeọta-kugbe evaọ uviuwou ra u siomẹ urru gaga. Wọhọ uzoge, azọhọ vẹ whọ rẹ sae jẹ fihọ ẹnyaharo ẹmeọta-kugbe ọsẹ gbe oni ra? [K’uvẹ kẹ uyo. Rovie kpohọ ẹwẹ-obe avọ 65 evaọ obe ọ Evawere Uviuwou na, re who se edhe-ẹme avọ 5.] Eware nọ e via no i dhesẹ nnọ a rẹ sai wo iyẹrẹ nọ e mai woma nọ a te lele uvi ehrẹ nọ e rọ Ebaibol na.” Kẹe ibroshọ na Eme Ọghẹnẹ Ọ Gwọlọ Mi Omai? Dhesẹ vevẹ nnọ iwuhrẹ 16 na e kẹ oma ọ ovuẹ Ebaibol nọ o mai w’uzou. Se ẹme-emuhọ nọ ọ rọ ẹwẹ-obe avọ 2 na, wha ve wuhrẹ uwuhrẹ ọsosuọ na kugbe.
7 Jọ obọ o r’owhẹ hẹ evaọ ẹkọ ibi Uvie na keme Jihova ọ te ghale omodawọ ra nọ who bi ro fiobọhọ kẹ erivẹ ra re a duku edidi evawere uviuwou na.—Mak 12:31.