“Wha Ru Onana Roro Omẹ”
1 O rọ uruemu ahwo re a k’uvẹ re eware nọ e r’oja i kiekpo nọ oke o be nyaharo na. Onana họ oware jọ nọ o wha riẹ ze nọ, okenọ ọ jẹ rehọ “emu-owọwọ Ọnowo na” mu, Jesu o ro j’uzi kẹ ilele riẹ nọ: “Wha ru onana roro omẹ.” No anwọ oke oyena ze, evaọ oke ekareghẹhọ uwhu Jesu, Ileleikristi a rọ ẹmeoyo ruabọhọ ‘ewhowho uwhu Ọnowo na no bẹsenọ o re zihe tha.’—1 Kọr. 11:20, 23-26.
2 Kẹle na, Jesu o ti dede ahwo urere okiọkotọ nọ i bi dhe ẹkẹkao erọ “uthuru okakao” na rehọ evaọ obọ odhiwu. (Luk 12:32; Jọn 14:2, 3) Evaọ enukpe ọnana, okiọkotọ nọ a wholo na kugbe ogbotu obuobu ọ “igodẹ efa” na a te wariẹ wo uvẹ ọ ekoko Emu Owọwọ Olori na, eva April 11. (Jọn 10:16; Evia. 7:9, 10) A ti fiẹgba họ ovuhumuo kẹ uyoyou ulogbo Jihova evaọ Ọmọ ọvo riẹ nọ o vi ze rọkẹ ahwo-akpọ. A ti ru oriruo Jesu vevẹ, oyoyou riẹ, ẹrọwọ riẹ rite uwhu evaọ ẹrọkẹ ẹtanigbo na, gbe esuo riẹ enẹna wọhọ Ovie Uvie Ọghẹnẹ nọ a ro mu no, jegbe eghale nọ Uvie na o te wha se ahwo-akpọ. O ghinẹ rọ ehaa ekareghẹhọ!
3 Ruẹrẹ Oma Kpahe Enẹna: J’omai kpobi ma daoma ru etoke Ekareghẹhọ ọnana fihọ o rọ oghọghọ ulogbo avọ uyere k’omobọ mai gbe ahwo kpobi nọ a ti kuomagbe omai. Ma rẹ sae ruẹrẹ udu mai kpahe ẹkwoma ikuigbe Ebaibol nọ ma rẹ wariẹ se kpahe umutho edẹ urere ọ odibọgba Jesu gbe eware nọ i su kpohọ uwhu riẹ na. Eka buobu taure Ekareghẹhọ na u te ti te, ma rẹ sae rehọ uwuhrẹ uviuwou mai rọ kiẹ izou avọ 112-116 evaọ obe ọ Greatest Man na riwi.
4 Bro ahwo whọ riẹ nọ a sae te nyaze Ekareghẹhọ na otẹrọnọ whọ bọ ovuhumuo rai kẹ ehaa nana, zizie ai, je dede ai h’oma? Kere edẹ ahwo fihọ otọ enẹna, jẹ dao utho ẹgba ra re who fiobọhọ kẹ ae re a nyaze. Okiofariẹ, fiobọhọ kẹ ae re a gbẹ hae rro evaọ abọ-ẹzi ẹkwoma uduotahawọ nọ whọ rẹ kẹ ae re a kpohọ iwuhrẹ kẹse kẹse.
5 Evaọ ezi Ekareghẹhọ na, a ti ru obọdẹ ọruẹrẹfihotọ re u ru uvẹ usiuwoma ota ohwo kpobi rro. Nọ whọ tẹ ma oma ziezi, kọ whọ sai ru ọkobaro ubroke evaọ April? gbe evaọ May? Edhere jọ nọ ọ mai woma nọ ma sai ro dhesẹ nọ ma rọ ovuhumuo kareghẹhọ eware kpobi nọ idhe Jesu na u dhesẹ k’omai họ re ma t’ẹme kpahe Ọghẹnẹ mai, Jihova, gbe eghale nọ esuo Uvie yena o te wha ze ẹkwoma Ọmọ riẹ.—Ol. 79:13; 147:1.