‘Wha Hai Ru Onana’ Ma ti Ru Ekareghẹhọ Uwhu Jesu Evaọ April 5
1. Eme o ru Ekareghẹhọ na wuzou?
1 ‘Wha hai ru onana roro omẹ.’ (Luk 22:19) Jesu ọ rehọ eme yena kẹ ilele riẹ ujaje re a hai ru ekareghẹhọ uwhu riẹ. Ma te roro te oware nọ ẹtanigbo na o ru kẹ omai, ẹdẹ ọvo ọ riẹ nọ o wuzou kẹ Ileleikristi te ẹdẹ ekareghẹhọ ẹsiẹvo ẹgbukpe na ha. Nọ ẹdẹ avọ 5 amara Ane ọ be kẹle na ẹvẹ ma sai ro yere Jihova rọ kẹ oware nọ o ru kẹ omai na?—Kọl. 3:15.
2. Ẹvẹ ma sai ro dhesẹ nọ Ekareghẹhọ na i wuzou kẹ omai?
2 Ruẹrẹ Oma Kpahe: Ma be hae ruẹrẹ oma kpahe kẹ eware nọ i wuzou evaọ uzuazọ mai. Iviuwou kpobi e sae ruẹrẹ udu rai kpahe kẹ Ekareghẹhọ na ẹkwoma ese gbe eroro didi kpahe eware nọ e via kẹ Jesu edẹ jọ taure o te ti whu gbe nọ ọ kparoma no. (Ẹzra 7:10) Whọ te jọ ukeledẹ mai gbe Ẹkiẹriwo Ikereakere na Kẹdẹ Kẹdẹ ruẹ ikere nọ e ta kpahe onana.
3. Edhere ọfa vẹ ma re ro dhesẹ nọ Ekareghẹhọ na i wuzou kẹ omai?
3 Ta Usiuwoma: Edhere jọ nọ ma sai ro dhesẹ nnọ ẹtanigbo na o wuzou kẹ omai gaga họ, iruo odibọgba na nọ ma rẹ roma kẹ ziezi. (Luk 6:45) Ẹdẹ-Ọmaha, March 17 ma ti ro mu ahwo họ ezizie kẹ Ekareghẹhọ na evaọ akpọ na soso. Kọ whọ gbẹ daoma ruẹrẹ oke ra họ re who fiba odibọgba ra ẹkwoma ọkobaro obufihọ nọ who re ru? U ti woma otẹrọnọ wha rẹ rehọ iẹe jiroro evaọ egagọ Uviuwou rai n’otha?
4. Irere vẹ ma re wo no eruo Ekareghẹhọ na ze?
4 Ekpohọ Ekareghẹhọ na kukpe kukpe o rẹ wha irere buobu se omai! Ma te bi roro kpahe ọghọ nọ Jihova o ru kẹ omai nọ ọ rọ rehọ Ọmọvo riẹ t’omai no igbo, evawere gbe uyoyou nọ ma wo kẹ Ọghẹnẹ i re vihọ. (Jọn 3:16; 1 Jọn 4:9, 10) Onana o rẹ whae ze nọ ma gbe yeri uzuazọ kẹ oma mai ọvo ho. (2 Kọr. 5:14, 15) O rẹ jẹ lẹliẹ omai jiri Jihova evaọ ẹgbede. (Ol. 102:19-21) Idibo Jihova a be rọ ọwhọ rẹro ẹdẹ avọ 5 amara Ane nọ a ti ro ru Ekareghẹhọ nọ a ti ro ru ahwo riẹ kpahe “uwhu Ọnowo na.”—1 Kọr. 11:26.