Rehọ Evawere Ruẹrẹ Oma Kpahe Kẹ Emu Owọwọ Na
1. Ezi Emu Owọwọ na yọ oke nọ ma re ro ru eme?
1 Emu Owọwọ nọ ma ti ru evaọ Edivẹ-Oka March 26 na o rẹ lẹliẹ eva were omai fiki oware nọ Ọghẹnẹ o ru re ma sai wo esiwo. (Aiz. 61:10) Evawere yena o rẹ whae ze nọ ma jẹ ruẹrẹ oma kpahe ziezi. Kọ ẹvẹ ma rẹ rọ ruẹrẹ oma kpahe?
2. Eme o be lẹliẹ omai ruẹrẹ oma kpahe kẹ Emu Owọwọ na?
2 Oma Oruẹrẹ-Kpahe: Emu Owọwọ Olori na u wuzou gaga dede nọ a rẹ jariẹ ru eware buobu hu. Ghele na, o gwọlọ nọ ma rẹ kaki mu eware họ ẹruẹrẹ-kpahe, re eware nọ i wuzou e siọ ẹro ba evo. (Itẹ 21:5) A re fi oke na họ jẹ gwọlọ oria nọ u kiehọ nọ a te jọ ru Emu Owọwọ na kpahe. A rẹ gwọlọ ebrẹdi gbe udi na kpahe. A re ru oria na fo jẹ ruẹrẹ eware na họ. Oniọvo nọ ọ te kẹ ovuẹ na o re wuhrẹ ẹme na ziezi, yọ a rẹ vuẹ enọ e te wọ ebrẹdi gbe enọ e te ruẹrẹ ahwo họ oware nọ a ti ru. Ma riẹ nọ wha joma ru eware nana no. Ma bi ru eware nana fikinọ uwhu Jesu o da omai ẹro fia.—1 Pita 1:8, 9.
3. Ẹvẹ ma rẹ rọ ruẹrẹ udu mai họ kẹ Emu Owọwọ Olori na?
3 Ruẹrẹ Udu Ra Họ: U fo nọ ma rẹ ruẹrẹ udu mai kpahe re ma sai wo edẹro ziezi kpahe oware nọ ma be te rehọ fiki riẹ ru Emu Owọwọ na. (Ẹzra 7:10) U te no ere no, o gwọlọ nọ ma fi oke họ nọ ma re ro se eria Ebaibol Emu Owọwọ na, je roro kpahe edẹ urere Jesu evaọ otọakpọ. Onana o te whae ze nọ ma te rọ gwọlọ rọ aro kele uruemu omaurodhidhe Jesu.—Gal. 2:20.
4. Eme o lẹliẹ ẹtanigbo na were owhẹ gaga?
4 Uwhu Kristi u dhesẹ nọ Jihova họ osu idhiwu gbe akpọ nọ ma re yoẹme kẹ. U ti si omai no uzioraha gbe uwhu. (1 Jọn 2:2) O rẹ sae lẹliẹ omai jọ egbẹnyusu Ọghẹnẹ je wo uzuazọ ebẹdẹ bẹdẹ. (Kọl. 1:21, 22) U ti je fi obọ kẹ omai ru eyaa nọ ma yaa kẹ Jihova evaọ olẹ omauromudhe mai, jẹ jọ ilele Jesu. (Mat. 16:24) Ajọ oghọghọ ra u vihọ nọ whọ be ruẹrẹ oma kpahe kẹ Emu Owọwọ na!