‘Wha Hai Ru Onana rọ Kareghẹhọ Omẹ’
Ekareghẹhọ Uwhu Jesu nọ Ma ti Ru Evaọ April 2
1. Fikieme April 2, 2007, ọ rọ rrọ ẹdẹ nọ o wuzou?
1 Evaọ April 2, 2007, ima ahwo buobu wariẹ akpọ na họ a ti kokohọ re a ru ekareghẹhọ uwhu idheidhe Jesu. Jesu o whu fiki ẹkpare kpehru udu-esuo ehrugbakpọ orọ Ọsẹ obọ odhiwu riẹ, nọ o kẹ imuẹro inọ ọrue Setan Ẹdhọ na ọ tae inọ ahwo-akpọ a be gọ Ọghẹnẹ fiki oriobọ. (Job 2:1-5) Emu Owọwọ Olori na o tẹ jẹ kareghẹhọ omai inọ ẹkwoma uwhu riẹ wọhọ ohwo ọgbagba nọ ọ thọ uvumọ uzi hi, Jesu ọ ‘rọ rehọ uzuazọ riẹ ta ibuobu’ no igbo. (Mat. 20:28) Fikiere, Jesu o juzi kẹ ilele riẹ inọ: “Wha ru onana roro omẹ.” (Luk 22:19) Kọ ovuhumuo kẹ okẹ oghaghae Ọghẹnẹ nana o wọ owhẹ no re who mu oma họ ẹruẹrẹkpahe kẹ ekareghẹhọ oware ulogbo nana nọ u dhesẹ uyoyou Ọghẹnẹ via na?—Jọn 3:16.
2. Evẹ ma sae rọ ruẹrẹ udu mai họ kẹ Emu Owọwọ na?
2 Ruẹrẹ Udu Ra Họ: Ẹkwoma erorokpahe eware nọ e via eva okpẹdẹ ọvuọvo ọrọ edẹ urere uzuazọ Jesu wọhọ ohwo-akpọ, ma sae ruẹrẹ udu mai họ kẹ Emu Owọwọ nana. (Ẹzra 7:10) Re u fiobọhọ k’omai ru onana, ma sai duku omaa isase Ebaibol obọdẹ evaọ Ẹkiẹriwi Ikereakere Na—2007 gbe evaọ ukeledẹ 2007 mai na. A ma omaa isase ọ eware nọ e via taure Jesu o te ti whu na ro kiehọ edẹ ukeledẹ mai nẹnẹ. Edẹ gbe ideti nọ a fodẹ evaọ ikuigbe Ebaibol na yọ erọ ukeledẹ ahwo Ju, nọ a re kele okpẹdẹ rai no owọwọ ẹdẹjọ rite owọwọ ẹdẹfa. Ma wo ohẹriẹ nana nọ o rrọ ekele okpẹdẹ rai avọ ọmai na họ iroro, yọ ma ru omaa isase Ebaibol Emu Owọwọ na lele onana. Ikuigbe yena nọ e rrọ Ebaibol na nọ ma re se, gbe olẹ nọ ma rẹ lẹ je roro kpahe oghẹrẹ nọ uyoyou Ọghẹnẹ u diwi te, u ti fiobọhọ k’omai wo erere vọvọ no Emu Owọwọ na ze.
3. Ẹvẹ ma sai ro fiobọhọ kẹ ahwo nọ i wo isiuru gbe enọ e siọ iruo Uvie ba no re a wo erere no Emu Owọwọ na ze?
3 Zizie Amọfa: Uko-obeva Odibọgba Uvie Mai ọrọ February o ta kpahe usi-uwhowho obọdẹ nọ ma ti ro zizie ahwo ziọ ekareghẹhọ na. Kọ whọ ruẹrẹ oma kpahe no re who wobọ vọvọ evaọ usi-uwhowho nana? Kọ who kere edẹ ahwo nọ who ti zizie no, kọ who mu rai họ ezizie no? Daoma kaki te oria nọ wha te jọ ru Emu Owọwọ na re who dede ahwo nọ who zizie na rehọ gbe amọfa nọ a wo isiuru nọ e nyaze. Whọ sae keria gba ae, jẹ ruẹ nọ a wo Ebaibol gbe obe-ile. Dhesẹ ai kẹ inievo ukoko na. Nọ a te ku Emu Owọwọ na họ no, daoma ruẹ nọ whọ kẹ uyo enọ nọ a te nọ. Zizie ai re a nyaze te kezọ kẹ ovuẹ ogbotu obọdẹ nọ a te kẹ evaọ April 15 na. Maero ekpako na a ti muẹrohọ inọ a zizie enọ i je kuomagbe ukoko na vẹre nọ e se iruo Uvie ba no re a ziọ Emu Owọwọ na gbe ovuẹ ogbotu obọdẹ na.
4. Ẹvẹ ma sai ro fiobọhọ kẹ ahwo re a gbe wo ẹnyaharo abọ-ẹzi nọ a te ru Emu Owọwọ na no?
4 Fiobọhọ kẹ Ahwo Ọkpokpọ gbe Enọ E Siọ Iruo Uvie ba no Wo Ẹnyaharo: Ohwo nọ ọ te kẹ ovuẹ Emu Owọwọ na ọ te ta kpẹkpẹ kpahe ọruẹrẹfihotọ nọ ma re ro ru uwuhrẹ Ebaibol kugbe ahwo jẹ tuduhọ ahwo ọkpokpọ nọ i wo isiuru awọ re a ruabọhọ ewuhrẹ kpahe Jihova. Whọ sai fi eme riẹ jọ ba ẹme ra ro lele ahwo nọ who zizie na tẹme rọ tuduhọ ai awọ re a gbe wuhrẹ ziezi kpahe Jihova. Otẹrọnọ a ri muọ Ebaibol họ ewuhrẹ vẹre he, daoma weze bru ai ababọ okioraha nọ a te ru Emu Owọwọ na no, re whọ ta kẹ ae nọ whọ gwọlọ ru obe-uwuhrẹ Ebaibol kugbe ai je dhesẹ epanọ a re ru ei. Re a sai wo ẹnyaharo abọ-ẹzi, o gwọlọ nọ a re kpohọ iwuhrẹ ukoko. (Hib. 10:24, 25) Re a sai ru oyena, tuduhọ ai awọ nọ a kpohọ iwuhrẹ na ẹsikpobi. Ekpako ukoko a re ru ọruẹrẹfihotọ nọ a re ro weze bru Ileleikristi nọ e se iruo Uvie ba no nọ e ziọ Emu Owọwọ na a vẹ tuduhọ ai awọ re a roro kpahe eme nọ a yo na. Onana o sae bọ ae ga nọ a rẹ rọ wariẹ mu iruẹru rai họ evaọ ukoko na.
5. Eme Emu Owọwọ na o re fiobọhọ k’omai ru?
5 Emu Owọwọ na ọ rẹ kẹ omai uvẹ nọ ma re ro roro didi kpahe oware nọ Jihova gbe Jesu a ru kẹ omai. Eroro-didi otiọye o rẹ lẹliẹ uyoyou nọ ma wo kẹ Jihova gbe Jesu kodo je kpomahọ uruemu mai. (2 Kọr. 5:14, 15; 1 Jọn 4:11) Enẹna họ oke nọ ma rẹ rọ ruẹrẹ oma mai gbe enọ i wo isiuru kpahe kẹ Ekareghẹhọ obọdẹ nana nọ o rrọ etoke nọ ma re jo ‘whowho uwhu Olori na.’—1 Kọr. 11:26.