Fi Obọ họ kẹ Amọfa Wo Erere no Idhe Ẹtanigbo na Ze
Ekareghẹhọ Uwhu Kristi nọ A Ti Ru Eva April 12
1 “Uyere u te Ọghẹnẹ fiki okẹ riẹ nọ a sae ruẹ unu ta ha!” (2 Kọr. 9:15) Eme yena e nwani dhesẹ oghẹrẹ nọ o rrọ omai oma kpahe ewoma gbe uyoyou-ẹwo nọ Ọghẹnẹ ọ rọ ẹkwoma Ọmọ riẹ, Jesu Kristi dhesẹ kẹ ahwo riẹ. Ovuhumuo otiọye na ọ te mai dhesẹ oma via ziezi nọ ma ti kokohọ eva April 12 re ma ru Ekareghẹhọ uwhu Kristi na.
2 Kukpe kukpe, amọfa nọ a bi kuomagbe idibo Jihova eva oke Ekareghẹhọ na a bu te oware wọhọ ima ikpe. Evaọ ere oruo, a bi dhesẹ ovuhumuo nọ a wo kẹ idhe ẹtanigbo Kristi na. Rekọ, re a wo erere no ẹtanigbo na ze, u fo nọ a re wo ẹrọwọ kpahe iẹe. (Jọn 3:16, 36) Ẹvẹ ma sai ro fiobọhọ kẹ ae wo ẹrọwọ otiọye? Eva ezi Ekareghẹhọ nana, ma sae tuduhọ ae awọ re a ru uwuhrẹ Ebaibol kẹ omobọ rai, re a je kpohọ iwuhrẹ ukoko mai nọ ma re ru koka koka. Dai roro kpahe iroro nọ a jẹ fihọ obotọ na.
3 Ebe-Iwuhrẹ Ebaibol: Nọ who te bi zizie ahwo nọ a wo isiuru kpohọ Ekareghẹhọ na, kọ whọ gbẹ daoma rehọ obe ọ Ebaibol Wuhrẹ na mu obe-uwuhrẹ Ebaibol họ kugbe ai? Daoma ru ẹjiroro nọ ma be hai ro ru Ekareghẹhọ na vẹ kẹ ohwo na ẹkwoma ẹwẹ-obe avọ 206-208 nọ who re rovie kpohọ wha ve se uzoẹme na “Emu Owọwọ Olori Na—Ekareghẹhọ nọ E rẹ Kẹ Ọghẹnẹ Orro.” Whọ sai ru oyena evaọ iweze ọvo hayo ivẹ, ẹsejọhọ wọhọ obe-uwuhrẹ Ebaibol nọ a re ru eva unuẹthẹ. Nọ wha te se oria oyena re no, ẹsejọhọ o te were ohwo na re wha ta kpahe uzou avọ 5 na, “Ẹtanigbo na—Okẹ Ọghẹnẹ nọ O Mae Rro.” Nọ wha te mu uwuhrẹ na họ eru no ẹsikpobi, zihe kpemu re wha wuhrẹ izou ene ọsosuọ obe na.
4 Ono ma rẹ sae rọ edhere nana nọ ma jọ obehru tẹme te na mu obe-uwuhrẹ Ebaibol họ kugbe? Ẹsejọhọ ibe-iruiruo ra, ibe emọ-isukulu, hayo ahwo nọ wha gbẹ rrọ ighẹ a sae rọwo kpahe ẹmeọta otiọye na. U wo inievo-emetẹ jọ nọ ezae rai e rrọ ukoko ho, inievo-emezae na a sai weze bru ezae itieye na. Yọ whọ kpairoro vrẹ imoni ra nọ e rrọ ukoko ho ho. Fibae, ma te gwọlọ daoma ziezi re ma rọ obe-uzizie Ekareghẹhọ se ahwo nọ a jọ ukoko na kru oma ga ziezi vẹre nọ i zihe kpemu no. (Luk 15:3-7) Joma daoma fiobọhọ kẹ ahwo otiọye na kpobi wo erere no ẹtanigbo na ze.
5 Iwuhrẹ Ukoko: Ekareghẹhọ na họ ewuhrẹ ọsosuọ nọ emọ-uwuhrẹ Ebaibol buobu gbe amọfa nọ a dhesẹ isiuru a kpohọ. Kọ ẹvẹ ma sae rọ tuduhọ ae awọ re a wo erere no iwuhrẹ ukoko mai efa ze? Odibọgba Uvie Mai ọrọ April 2005, ẹwẹ-obe avọ 8, o kẹ iroro-ejẹ nana: “Fodẹ uzoẹme ovuẹ ogbotu notha na. Dhesẹ oria nọ a ti wuhrẹ evaọ Uwuhrẹ Uwou-Eroro na gbe Obe Uwuhrẹ Ukoko na kẹ ae. Dhesẹ epanọ a re ru Isukulu Odibọgba Esuo-Ọghẹnẹ gbe Ewuhrẹ Odibọgba na kẹ ae. Nọ who te wo ẹme evaọ isukulu na, otiẹsejọ whọ sai dhesẹ epanọ who ti ru ẹme na kẹ ae. Ta ugogo eware jọ nọ a jọ iwuhrẹ na ta kpahe kẹ ae. Rehọ iwoho nọ e rrọ ebe mai ro fiobọhọ kẹ ae re a jọ iroro rai ruẹ oware nọ ma re ru evaọ iwuhrẹ mai. Jọ umuo ẹdẹ ọsosuọ nọ whọ rọ to obe-uwuhrẹ Ebaibol họ kugbe ai na zizie ai re a ziọ iwuhrẹ ukoko mai.”
6 Nọ a te bi ru obe-uwuhrẹ Ebaibol ẹsikpobi kugbe ahwo udu-oruọzewọ yọ a be ziọ iwuhrẹ ukoko ẹsikpobi, onana u re fiobọhọ kẹ ai wo ẹnyaharo abọ-ẹzi ziezi. Fikiere, joma tuduhọ amọfa awọ re a wo erere no eruẹrẹfihotọ abọ-ẹzi nana gbe okẹ Ọghẹnẹ nọ o mae rro na ze—ẹtanigbo na.
[Study Questions]
1. Edhere jọ vẹ ahwo Ọghẹnẹ a re ro dhesẹ ovuhumuo rai kẹ idhe ẹtanigbo na?
2. Amono a be hai kuomagbe idibo Jihova ru Ekareghẹhọ na, kọ eme u fo nọ a re ru re a sai wo erere no ẹtanigbo na ze?
3. Ẹvẹ ma sae rọ to obe-uwuhrẹ Ebaibol họ nọ ma te bi zizie ahwo kpohọ Ekareghẹhọ na?
4. Amono ma rẹ daoma mu obe-uwuhrẹ Ebaibol họ kugbe evaọ ezi Ekareghẹhọ nana?
5. Ẹvẹ ma sae rọ tuduhọ emọ-uwuhrẹ Ebaibol gbe amọfa nọ a dhesẹ isiuru awọ re a kpohọ iwuhrẹ ukoko koka koka na?
6. Idhere ivẹ vẹ ma sai ro fiobọhọ kẹ ahwo udu-oruọzewọ wo erere no ẹtanigbo na ze?