Joma Dhesẹ Edẹro Mai Ekareghẹhọ nọ Ma ti Ru Evaọ April 17
1. Ẹme ọso-ilezi na vẹ u fo nọ ma re roro kpahe, maero evaọ ezi Ekareghẹhọ na?
1 Fiki edẹro kẹ ohrọ-oriọ gbe ọthọwẹ nọ o wo no obọ Jihova ze, ọso-ilezi na ọ nọ inọ: “Eme mẹ rẹ za rọ kẹ ỌNOWO fiki irere nana kpobi nọ o ro ru omẹ ọghọ na?” (Ol. 116:12) Nẹnẹ, idibo Ọghẹnẹ a wo ẹjiroro buobu nọ a rẹ rọ kẹe uyere. Ikpe buobu nọ a kere eme yena no, Jihova ọ kẹ ahwo-akpọ okẹ nọ o mae rro, koyehọ ẹtanigbo na. Nọ ma be ruẹrẹ oma kpahe kẹ Ekareghẹhọ uwhu Kristi nọ ma ti ru evaọ April 17 na, ma wo ẹjiroro nọ ma rẹ rọ kẹ Ọghẹnẹ ujiro.—Kọl. 3:15.
2. Fikieme ma je wo edẹro kẹ ẹtanigbo na?
2 Eghale Ẹtanigbo Na: Fiki ẹtanigbo na ma sai ro wo “ẹrọvrẹ izieraha.” (Kọl. 1:13, 14) Onana u re fi obọ họ kẹ omai gọ Jihova avọ obroziẹ-iroro ọfuafo. (Hib. 9:13, 14) Ma rẹ sae ta ẹme ududu nọ ma tẹ be lẹ se Jihova. (Hib. 4:14-16) Ahwo nọ a fi ẹrọwọ họ ẹtanigbo na a re wo ẹruore uzuazọ ebẹdẹ bẹdẹ!—Jọn 3:16.
3. Ẹvẹ ma sai ro dhesẹ kẹ Jihova nọ ẹtanigbo na ọ da omai ẹro?
3 Dhesẹ Edẹro: Edhere jọ nọ ma re ro dhesẹ uvi edẹro họ, eria Ebaibol Ekareghẹhọ na nọ ma re se kẹdẹ kẹdẹ je roro didi kpahe. A kere uzoẹme na “Are You Prepared for the Most Important Day of the Year?” evaọ Uwou-Eroro February 1, 2011 (ọrọ Oyibo), re u fi obọ họ kẹ omai ru onana. Ma rẹ sae jẹ jọ olẹ ta kẹ Jihova epanọ ẹtanigbo na o ghare kẹ omai te. (1 Tẹs. 5:17, 18) Ma te kpohọ Ekareghẹhọ na wọhọ epanọ Jesu ọ ta nọ ma ru yọ edhere jọ nọ ma re ro dhesẹ edẹro. (1 Kọr. 11:24, 25) Ofariẹ, aruorokele uyoyou Jihova kẹ ahwo kpobi o rẹ wọ omai zizie ahwo buobu wọhọ epanọ o rẹ sae lọhọ te kpobi.—Aiz. 55:1-3.
4. Eme ọ rẹ jọ ọtamuo mai?
4 Idibo Jihova nọ i wo edẹro a re rri ekpohọ Ekareghẹhọ na wọhọ ekpohọ ewuhrẹ ọfa gheghe he. Yọ ewuhrẹ nọ ọ mai wuzou evaọ ukpe na! Nọ Ekareghẹhọ na u bi si kẹle na, jọ ma wo ọtamuo wọhọ ọso-ilezi na nọ o kere nọ: “Ẹzi mẹ jiri ỌNOWO, whọ jọ ọghọ riẹ ọ thọrọ owhẹ ẹro ho.”—Ol. 103:2.