Kareghẹhọ Ẹtanigbo na avọ Edẹro
1, 2. Fikieme u je fo re ma kareghẹhọ ẹtanigbo na avọ ovuhumuo?
1 Ẹmeoyo kẹ ujaje Jesu o te lẹliẹ Ileleikristi wariẹ akpọ na soso họ ru ekareghẹhọ uwhu Jesu Kristi nọ ọre o te kiediwi no evaọ Ẹdẹ-Ọmaha, March 22, 2008. (Luk 22:19; 1 Kọr. 11:23-26) Ovuhumuo kẹ oware jọ nọ o via ikpe 1,975 nọ e vrẹ o be te w’omai ru onana. Jesu ọ rọ ẹkwoma ẹgbakiete nọ o kru rite urere nọ o ro whu uwhu oja ro ru odẹ Ọsẹ riẹ fo, jẹ rọ ere kuyo kẹ ẹpoviẹ Setan.—Job 1:11; Itẹ 27:11.
2 Azẹ Jesu nọ o hwẹ a rọ to ọvọ ọkpokpọ na họ, nọ u ru rie lọhọ kẹ ahwo-akpọ nọ a gba ha re a zihe ruọ emọ Ọghẹnẹ nọ i wo ẹruore esu kugbe Kristi evaọ Uvie obọ odhiwu riẹ. (Jeri. 31:31-34; Mak 14:24) Ofariẹ, epanọ uyoyou Ọghẹnẹ kẹ ahwo-akpọ u kodo te u dhesẹ oma via evaọ ọmọ ọghaghae riẹ nọ o siobọno ro dhidhe fiki mai, wọhọ epanọ Jesu omariẹ ọ ta kẹ Nikodimọs.—Jọn 3:16.
3. Didi erere o ti te ahwo nọ a te ziọ Ekareghẹhọ na?
3 Zizie Amọfa: Odibọgba Uvie Mai ọrọ amara nukpo o tuduhọ omai awọ nọ ma kere edẹ ahwo nọ ma gwọlọ zizie fihotọ, re ma jẹ nyai zizie ai. Kọ who muọ ahwo nọ who kere fihotọ họ ezizie no? Kọ who bi ru ọruẹrẹfihotọ re who wobọ evaọ usi-uwhowho nọ u ti muhọ evaọ March 1 nọ ma ti ro zizie ahwo ziọ Ekareghẹhọ na? Enọ e te ziọ Ekareghẹhọ na kpobi a ti yo ovuẹ Ikereakere nọ o rẹ sai ru ohwo fi ẹrọwọ họ ẹtanigbo na, nọ u re su kpohọ uzuazọ ebẹdẹ bẹdẹ.—Rom 10:17.
4. Fikieme u ro fo re ma kaki te oria nọ a ti jo ru Ekareghẹhọ na?
4 U fo inọ ahwo kpobi nọ o rẹ sae lọhọ kẹ a kake nyaze oria nọ a ti jo ru Ekareghẹhọ na re a dede ahwo nọ ma zizie nọ a te nyaze rehọ sasasa. Fikinọ ahwo nọ a rẹ nyaze Ekareghẹhọ na a rẹ jọ buobu, u wuzou gaga re ma muẹrohotọ ziezi kẹ ahwo ọkpokpọ gbe ahwo nọ a rẹ ziọ iwuhrẹ ẹsejọ nọ a nyaze.
5. Ẹvẹ whọ sae rọ ruẹrẹ udu ra kpahe kẹ Ekareghẹhọ na?
5 Ruẹrẹ Udu Ra Kpahe: Ẹkiẹriwi Ikereakere Na—2008 gbe ukeledẹ 2008 na i wo omaa isase obọdẹ orọ Ebaibol kẹ Ekareghẹhọ na nọ u ti muhọ evaọ March 17. Ese kpahe eware nọ e via evaọ edẹ urere erọ uzuazọ Jesu evaọ otọakpọ u ti fiobọhọ k’owhẹ ruẹrẹ udu ra kpahe kẹ Ekareghẹhọ na. (Ẹzra 7:10) Olẹ gbe eroro didi kpahe iku Ebaibol nana u ti ru owhẹ wo ovuhumuo ziezi kẹ uyoyou nọ Jihova avọ Ọmọ riẹ a rọ ẹkwoma ẹtanigbo na dhesẹ.—Ol. 143:5.
6. Ẹvẹ edẹro nọ ma re wo kẹ ẹtanigbo na u re ro fiobọhọ k’omai?
6 Nọ oke Ekareghẹhọ na o be kẹle na, ruẹ nọ whọ ruẹrẹ oma kpahe je zizie amọfa kẹ Ekareghẹhọ obọdẹ nana. Ẹtanigbo na nọ ma rẹ kareghẹhọ avọ edẹro u ti ru usu mai kugbe Jihova avọ Ọmọ riẹ ga ziezi. (2 Kọr. 5:14, 15) O te jẹ w’omai rọ aro kele ai dhesẹ uvi uyoyou kẹ amọfa.—1 Jọn 4:11.