Dhesẹ Edẹro kẹ Okẹ Ọghẹnẹ nọ O Mae Rro
1. Oware ulogbo vẹ Jihova o ru nọ o d’omai ẹro fia?
1 Evaọ usu ‘ekẹ iwoma’ nọ Jihova ọ k’omai na, okẹ ẹtanigbo na họ onọ o mae rro. (Jem. 1:17) Okẹ nana o wha eghale buobu ze, wọhọ erọvrẹ izieraha. (Ẹf. 1:7) Onana o d’omai ẹro fia. Ezi Ekareghẹhọ na yọ obọdẹ oke nọ ma re ro roro didi kpahe okẹ oghaghae nana.
2. Ẹvẹ ma sai ro fi obọ họ kẹ uviuwou mai gbe omobọ mai re ma wo edẹro kẹ ẹtanigbo na?
2 Fi Obọ Họ kẹ Ai Wo Edẹro: Re whọ sai fi obọ họ kẹ uviuwou ra wo edẹro, hae jọ Uwuhrẹ Uviuwou rai nọ wha re ru owọwọ na t’ẹme kpahe ẹtanigbo na eka jọ taure March 30 o te ti te. Ofariẹ, wha hai se oria Ebaibol nọ a ruẹrẹ họ kẹ Ekareghẹhọ na kẹdẹ kẹdẹ. Roro kpahe erere nọ who wo no ẹtanigbo na ze, gbe oghẹrẹ nọ u ro kpomahọ eriwo nọ who wo kpahe Jihova, omara, amọfa, gbe obaro na. U re je woma gaga re wha wuhrẹ ile nọ a ti ro ru Ekareghẹhọ na.—Ol. 77:12.
3. Ẹvẹ ma sai ro dhesẹ edẹro kẹ ẹtanigbo na?
3 Epanọ Ma re ro Dhesẹ Edẹro: Edẹro kẹ ẹtanigbo na o rẹ wọ omai vuẹ amọfa kpahe Jihova gbe uyoyou ulogbo nọ o wọ riẹ vi Ọmọ riẹ ze. (Ol. 145:2-7) Evaọ amara Asa, Ane, gbe Asoi, iviuwou jọ a re ru ọruẹrẹfihotọ re omọvo jọ evaọ uviuwou rai o ru ọkobaro obufihọ. Otẹrọnọ onana o gbẹ lọhọ họ, kọ whọ gbẹ daoma re who fiba “oke” nọ whọ be rọ ta usiuwoma? (Ẹf. 5:16) Edẹro e te jẹ wọ omai zizie amọfa ziọ Ekareghẹhọ na. (Evia. 22:17) Jọ enẹna kere ahwo nọ who ti zizie fihotọ, wọhọ izihebro ra, emọ-uwuhrẹ Ebaibol, imoni, ibe-iruiruo, gbe ahwo nọ wha gbẹ rrọ ighẹ, re who je w’obọ ziezi evaọ uzizie kẹ Ekareghẹhọ na.
4. Ẹvẹ ma sae rọ rehọ ezi Ekareghẹhọ na ruiruo avọ areghẹ?
4 Ezi Ekareghẹhọ na o re rovie uvẹ sa-sa fihọ k’omai nọ ma re ro dhesẹ kẹ Jihova inọ okẹ nọ ọ kẹ ahwo-akpọ na o d’omai ẹro fia. J’oma rehọ oke nana dhesẹ edẹro nọ ma wo kẹ ẹtanigbo na gbe “efe odidi Kristi na.”—Ẹf. 3:8.