Kọ Whọ be Ruẹrẹ Oma Kpahe kẹ Emu Owọwọ Na?

O jọ edẹ 13 amara Nisan 33 C.E. Jesu ọ riẹ nọ aso ọvuọvo o kiọkọ kẹe nọ ọ te rọ jọ kugbe ikọ riẹ taure a te ti kpei. O ti ru ehaa Ọnyavrẹ ọrọ urere kugbe ilele riẹ, kẹsena ọ vẹ te tuọ oware okpokpọ jọ họ kẹ ai, oye họ Emu Owọwọ Olori na. O gwọlọ omaruẹrẹkpahe ziezi re a sai ru onana. Fikiere o te vi Pita avọ Jọn nyae ruẹrẹ oria nọ a ti jo ru ei kpahe. (Luk 22:7-13) Anwọ oke yena ze, o gwọlọ nọ Ileleikristi nọ i bi ru lele ujaje Jesu na a rẹ ruẹrẹ oma kpahe ziezi kẹ Ekareghẹhọ na. (Luk 22:19) Ugogo eware vẹ u fo nọ ma rẹ ruẹrẹhọ kẹ Ekareghẹhọ nọ ma ti ru evaọ Ane 3 na?

Eware nọ Ekpako na A rẹ Ruẹrẹhọ:

Wha ruẹrẹ Ọgwa Uvie hayo oria ofa nọ wha te jọ ru ei họ. Wha ruẹ nọ egbara avọ ikpẹ te ofou e rrọ oria na ziezi. Wha fi ẹdẹ họ nọ wha re ro ru oria na fuafo ziezi.
Salọ oniọvo nọ ọ riẹ ẹme eru ziezi, ohwo-agbara, gbe inievo nọ e te lẹ fihọ ebrẹdi avọ udi na.
Otẹrọnọ ikoko sa-sa e te jọ oria na ru Ekareghẹhọ na ẹdẹ yena, wha ruẹrẹ oke nọ wha ti ro muhọ unọjọ utọjọ, oghẹrẹ nọ ahwo a te rọ rueva je no oria na gbe oria nọ a te dhẹ imoto gbe emashini fihọ.
Salọ inievo nọ i ti kele ahwo gbe enọ e te wọ ebrẹdi gbe udi na.
Wha wo oghẹrẹ ebrẹdi gbe udi nọ a gwọlọ na te obọ, imidhe, eglase, gbe emẹjẹ avọ ohọ-emẹjẹ.

Eware nọ Iwhowho-Uvie A re Ru:

Ruẹrẹ omaa ra kpahe re who w’obọ vọvọ evaọ ẹghale obe-uzizie Ekareghẹhọ na.
Kere edẹ emọ-uwuhrẹ Ebaibol, imoni, ibe-emọ isukulu, ahwo nọ wha gbẹ rrọ iruo, gbe egbẹrioma ra fihotọ, who ve je zizie ai.
Se je roro didi kpahe eria Ebaibol Ekareghẹhọ na.
Kake nyaze re who dede erara nọ e te nyaze rehọ.