Kọ Whọ be Ruẹrẹ Oma Kpahe kẹ Ekareghẹhọ Na?

Ehaa Ọnyavrẹ urere nọ Jesu o ru o wuzou gaga. Fikinọ oke uwhu riẹ o kẹle no, o te ru ọruẹrẹfihotọ re ọ re emu Ọnyavrẹ na kugbe ikọ riẹ, ọ vẹ jẹ to Emu Owọwọ Olori na họ, ekareghẹhọ nọ a te hai ru kukpe kukpe. Fikiere o te vi Pita avọ Jọn re a nyae ruẹrẹ ubruwou nọ a ti jo ru ehaa Ọnyavrẹ na họ. (Luk 22:7-13; rri uwoho nọ o rrọ uke obe na.) Onana o kareghẹhọ omai epanọ u wuzou te re ma ruẹrẹ oma kpahe kẹ Ekareghẹhọ nọ ma ti ru evaọ Asa 27 na. U muẹro nọ ikoko buobu a ru ọruẹrẹfihotọ epanọ a ti ro wo ebrẹdi gbe enwaene na no, a tẹ jẹ salọ oniọvo nọ ọ te kẹ ovuẹ na no, gbe eware itieye na efa. O make rrọ ere na, eme mai omomọvo ọ rẹ sai ru rọ ruẹrẹ oma kpahe kẹ Ekareghẹhọ na?

Ruẹrẹ udu ra kpahe. Se je roro didi kpahe isase Ebaibol Ekareghẹhọ na. Whọ sae jọ obe Ẹkiẹriwo Ikereakere na Kẹdẹ Kẹdẹ ruẹ omaa isase na. Evuẹ efa e tẹ jẹ rrọ Ẹme-Ofiba B12 nọ ọ rrọ Ebaibol Efafa Akpọ Ọkpokpọ ọrọ Ikereakere Efuafo Na. (Whọ sai je rri Obe Ewuhrẹ Uzuazọ gbe Usi Uwoma Ota ọrọ Ane 2020.) Wha sae jọ Watch Tower Publications Index hayo Obe Ekiakiẹ Rọkẹ Isẹri Jihova ruẹ evuẹ efa nọ e ta kpahe epanọ ẹtanigbo na o wuzou te nọ wha sai ro ru egagọ uviuwou.

Zizie amọfa ziọ Ekareghẹhọ na. Daoma wobọ ziezi evaọ okenọ a te ghale obe-uzizie Ekareghẹhọ na. Roro kpahe ahwo nọ whọ sai zizie, ahwo wọhọ, izihebro ra, emọ-uwuhrẹ Ebaibol ra vẹre, egbẹrioma, gbe imoni ra. Jọ ekpako na a ruẹ nọ a zizie ahwo nọ a siọ iruo Uvie na ba no. Kareghẹhọ nọ otẹrọnọ ohwo nọ who zizie ọ be rria oria nọ whọ be rria ha, whọ sae ruẹ oke gbe oria nọ a ti jo ru Ekareghẹhọ na evaọ oria nọ ohwo na ọ be rria nọ who te kpohọ KPAHE OMAI nọ o rrọ obehru jw.org na, whọ vẹ nẹ “Ekareghẹhọ.”

Eme ọfa ma sai ru rọ ruẹrẹ oma kpahe?